Международное объединение содействия развитию абазино-абхазского этноса «Алашара»

Мыхц Кьарим Льиуан йпа: «Ахърыкъьара аламкIва хвду аквсцIитI сара а-Литература институт йгIасыланацIаз»

Керим Леонидович Мхце: «Трудно переоценить то, что дал мне Литературный институт»


Кьарим йбергьльу алитературадырыгIв, Маяковский В. йыршIыйарала гIвмонография дукI равтор Михайлов А.А. унашва зхъицIуз ауысара семинар даларцIатI. Литература ъазара ауысла йрыдынхалуазгьи асеминар аунашвачпагIв йакIвын. АпхъанчIвидза литературала йайрыпхьун апрофессор Тахо-Годи А.А., 17-18 асквшышвква рагIан йгIаншаз агIвымакъраль литературала – апрофессор Артамонов С.Д. Арат ракIвын ауи азаман йхIаракIу апхьартаква рпны астудентква афилология ъачIвагIаква йызладрыпхьуз апхьагаква йыравторыз. Совет литературала йайрыпхьун арыпхьари анауки руысла аинститут апроректор Галанов А.М., атеатр азъазара ащатадыррала – аректор Пименов В., аквтанай сквшышвкви а-ГIащаквгылхра гIамти рагIан йгIаншаз агIвымакъраль литературала – Провансаль лирика анархартала йъачIвагIагIв ъазаз  арыпхьагIв Дынник В.А. Алекцияква анакIвлыршуз ауи француз бызшвала ауысакви лхъатала дыздынхалыз ауат ратакIракви дгIарыпхьалун. Астудентква ауи йыргвапхауа ныжьхата гвлахIара дута йырзалуан.  

Аинститут апны йщаквгылаз адемократия азазаъащаквагьи гвышхвара гIадрыцIсуан. «АрыпхьагIвчва акъыльти культурати йынкъвыргузи хIара йынкъвыгIгузи ашIуырпшуашта йгьаъамызтI – «хвагьи тобагьи рызбжьапI» ззырхIвауа йапшын. УадыргIванагьи ауат хIара дара хIрыквлазшва, пIатIу гIахIыквырцIауа, мачIкIгьи йкьангьашуазшва йхIзыъан. Сара ауи магIны ду азызбун, йгьи ауи йгIалцIла нцIрата йсыму гвыли-псыли сырзыразпI».

Ауысара семинар аунашвачпагIв Михайлов Александр Алексей йпа йыхъазла Кьарим араса йхIвун: «Ауи агIвычIвгIвыс культура ду нкъвигун. Ауи йсеминарква швабыж йджьащахъван. Швабыж щарда гIасылайырхIатI ауи. Анышв тIайы пкъыгIва шгIалырхуа апшта ужвы йсмагIну гIасылызхыз ауи йакIвпI. Акъыль ду шйымазгьи ауи зынгьи хъардура гьгIаймырбузтI. 17 сквша дыртата Абашта айсра Ду далан, йквпква агIвхъатакIлагьи аорденквали амедальквали йырчвын. ХIъадзапхьуз ауи гьхIымдыртI, хIангIалгуз йхIзадыргалыз ахъвлапын айсыгIв фаша йышвата даныгIба асхъан акIвпI йаныгIдыр. Йара уыжвгIандзарагьи дгIахIызцIгIитI, йайрыпхьаз зымгIвагьи дырхъпшылитI. Сара агIвгIвчва р-АдкIылара саннарахв уыста йчпатI телефон дсызгIасын дгIасайхIвахIвтI, йара дшсхъаштылдзахызгьи…»

Йапхъахуз агъын сессия Кьарим льальата йкIытI: гIв-«пщбакI» (аистория шIыци ашIыцдзи, апхъанчIви урышв литература), гIв-«хпакI» (апхъанчIвидза литература, абызшвадырра агIаджвыквцIага). ЙащтагIайуаз, апхын сессия апны йуысква агалагьи йагъьын: алитературадырра агIаджвыквцIага, 18 асквшышв аурышв литература, аквтанай сквшышвкви а-ГIащаквгылхра гIамти рагIан йгIаншаз агIвымакъраль литература – «хвбала» йкIытI, СССР аистория йгьи уыжвгIанчIви урышв бызшва – «пщбала». ЙащтагIайуаз агIамта аурала аэкзаменква ргIарбараква абараса йщаквгылата йгIамгIвайстI, ага зынзамызадза а-«хпаква» гIаншарыгьи.

Асквш 1971 февраль мыз агIан Кьарим арра къвырльыкъв йхауата КПСС алалра дакандидатхищтара сквшыкI цIытI. Ауи архъвыхра пIатла анагIвс амщтахь аинститут дапхьауата ауи апартия днарахвтI. ЙгIвбахауа акурс йгIашIарышвта Кьарим аинститут апартбюрогьи далан, астудпрофкомгьи дасекретарын.

Йапхъахауа акурс амщтахь Кьарим йапхьари йаъащакви йгIарыквчважвауа швъа ргIвытI, ашвъа рымачвква ацIан апарторг, апрофорг йгьи агвып астудентква рапхъагылагIв: Мыхц Кь.Ль, КПСС йалу, аинститут апны дапхьауищтара зшан щаквгылхьу, ъадаб нкъвызгауа студентта тшгIайырбатI, апхьара джьауапкIра йымата дазаъапI, асеминарквагьи апрактика апхьараквагьи джьгарта дрылалитI. ГIвыра щарда дрыпхьитI, акъраль абзазара апны йгIаншалакIгьи акъыльпшгIарала йалйыргитI, агIвымакъраль нхагIвчва рбзазара гIальаматра азйымапI. Агвып рбзазара джьгарта далапI, а-Стипендия комиссия, ауагIа хъпшылыгIвчва ргвып дрылата дынхитI. Йшанла дъасапI, дбагъьапI. 12.5.71».

Йара ауи агIан йхъатала азаъащата йстудент йызйыму гIайырбауата швъа йгIвытI асеминар аунашвачпагIв Михайлов А.А.: «Ага дшIазтынгьи (ауи сквшы 22 йхъыцIитI) Мыхц Кьарим абаза бызшвала гIвуыса азкIкIра хвыцкI гIацIищтхьатI. Ауысара гвыбзыгъата дадгылитI. Пасачвата «уасаражвра» ъагIайылалыз акIвпI ауи йнамдзарата йупхьадза йауаш, швабыж йтахъыпI дызту аныбыжь ацкIыс дахIбата тшичпарныс, уахьчIва дшаъу апш дчкIвынта, дбылуата тшгIайырбарныс дшвитI. Сара Кьарим ауи дызчвшвауа дачвымшварныс даквгIазшIыститI. Датша йыгхауа закIгьи гьаъам, зымгIва йылапI. Йхъа йазхъайцIарквын, уыжвгIанчIви темаква дрыдгылырквын ауысара амгIва тыбгIа дзыквылуашта даъапI. ЙгIвбахауа акурс дахъгара йквнагитI. 20.05.71».  

Михайлов йара ари апш швъа мачвы ацIайцIатI Кьарим йыхъазла ауи йгIвбахауа акурс дангIалга амщтахьгьи: «Зшан щаквгылу дстудентпI. Зхъа йтахъвыцуа дгIвычIвгIвысшва даъапI – асеминар арыпхьараква рпны мачIдзапI дангIачважвауа, уыста йыхъвда йанхъауцIарагIваца. ЙагIвсыз асквш йашIуырпшрыквын йылубгIитI ацIаснкъвгарагIваца, ашIыпIахъвыцщагIваца рпны дгIанымхауата апхъала дшчIвырхъаз, атемаква ргьагьара агIвына шауацIихыз. Ауи ауысла йчIвырхъаква ужвыгьи йгьбагъьам, ауаса йхъвыцща цIолапI. Урышв бызшвала ратакIраква гIаджвыквицIатI йара йуысакви йыгIвзачва руысакви. Зунашва схIвауа агвацчпара атакIраква ракIвпI. Ауат хвы рыквсцIарныс ужвыгьи сгьалагум. Йхпахауа акурс дахъгара йквнагитI. 11.05.72».  

Йхпахауа акурс дапхьауата Кьарим апхьарасквш нхара йгIвытI ари атемала: «Абаза уысагIв ЧквтIу Микаэль йыршIыйара апны ацIаснкъвгари ауыжвгIанчIви адгылщи». Ауи рецензия азигIвуата арыпхьарали наука нхарали апроректор Галанов А.М. араса йгIвытI: «Ари анхара гвыли-псыли йадгалапI, абаза литература йахъазымкIва анахьанат ауагIа хвыцква рлитератураквагьи баргвырата, рхъйачIвыта рпахь йгылу гIазырбауа нхарапI. Мыхц Кь. йхътIыта йгIвитI йцри бызшви йцри литератури рпхыцIа знархару йгвыргIваква. Ауи йцри литература асовет заман агIан акIвпI йангIанша йгьи, йшйыгIвуала, гIамта айшысдзала анахьанат ауагIахъаква рлитератураква йырхьыдзарныс ахъазла йхъацIауачву ачIвырхъа ауацIых ачпара атахъыпI. Автор йхъвыцраква рпны амакIыра гIазлыцIуашгьи, йрейшачву ажванахъаквагьи урынйитI, ауаса дызквчвжвауагьи дызхъгвыргIвауагьи щата рымахарныс ауаштI. Абаратква зымгIва рунашва йасхIвтI йынхара ахъгалракви абжаракви руысла хIанйата хIанайчважвуз. Швабыж йгвлахIарапI йгIалукIгIарныс автор урышв бызшвала йдырраква шбзийу, йшцIолу: швабыж ймачIпI орфография цIасквала ныжьхта астилистика цIасквла ахальатIкви анамдзаракви».  

Гватра азалхра атахъыпI йащтагIайуаз асквш апны апхьарасквш нхара темата Кьарим йъагIалихыз Маяковский йыршIыйара паса. Ауи джьаущушта йаъапI, йшпакIву ухIварыквын апролетарий уысагIв зынгьи дыгьрылапхьадзамызтI ауи йгвыпхуз ауысагIвчва, йыршIыйара пшгIараква рпынгьи ауи йгIвыраква тшгьырзынаймырхузтI. Ауаса йхIвара атахъыпI зынзамыза Мыхц Кь. йлирика фыри Маяковский йлирика фыри аквшвара шгIарбжьашвуз. Йшцауала, ауи Маяковский закIыла дхъихуан, дйымагIальаматын, хвы йыквицIун.

Анхара зырхъвыхыз адоцент Бирюков йакIвпI, йгьи асквш 1973 декабр а 26 атшын ауи йнардзата йпхьадзатI. Даквчважвауата йгIвыз асатарыква айшысын, йбахын: «Атема тамамта дадгылитI. Анхара апны гIвыра щарда гIарысабаппI. Ащтацаща нардзата йаныргIалпI. Йхъвыцраква йзыгIарбитI, йажванахъаква йзырзахвитI». 

Мыхц Кьарим йапхьара бзазара ачIвырхъаквагьи гIалхIкIгIапI:

асквш 1972 ноябр а 20 йгIашIарышвта а 23-дза Тула къала апны рхарджьра практика дахъыстI, ауаъа йыцапхьуз йыгIвзачвагьи йыцта акъала абзазагIвчви анхартаква рынхагIвчви рквтала йакIвшуз алитература анйараква дрылан;

мачIкIла рыцIа паса ауи йгьи астудент Луцкий С.А. Литература институт ащтийыгIвчва гвып йрылата Герман Демократ Республика апны йаъан, ащтийыгIвчва гвып унашва рхъицIун Бондарев Юрий, йауацIыхта йбергьльу ароманква «Йбылуа асы» йгьи «Адзтшпы» равтор;

асквш 1974 апрель а 5 йгIашIарышвта июнь а 30-дза абаза газет «Коммунизм алашара» аредакция культурала ахъвшара апны адиплом нхара адгалра знархараз апхьара-рхарджьра практика дахъыстI;

Асквш 1975 мартI а 13 адоцент Михайлов А.А. йунашва дацIата йрыхIазыртI йгьи «хвбала» йхчатI йдиплом нхара абари апш ршIыйара тема ахъагылата: «Акаца шкIвокIваква ангIашIыхара»;

йара ауи асквш июнь а 3 марксист-ленин философияла къральыгIва экзамен йкIын «пщба» гIайгтI, мчбжьыкI анагIвс амщтахь – урышв йгьи совет литературала акъральыгIва экзамен (ауылагьи «пщба» гIайгтI);

йгьи июнь а 20 атшын мачвы ацIарцIатI хвысквша рурала ауи йапхьара ахIисап гIазырбуз Литуратура институтла ащаквыргылра: «Горький А.М. йыхьыз нкъвызгауа СССР агIвгIвчва р-АдкIылара а-Литература институт «литература нхагIвы» ъачIвагIала диплом рымата йгIалгата йпхьадзара йащтагIайуа астудентква: 21. Мыхц Абдул-Кьарим Льиуан йпа».

А-Литература институт апны дъадзапхьуз Кьарим йгIайыквшватI дырра СССР аисторияла, агIвымакъраль история шIыц йгьи шIыцдза, КПСС аистория, политика экономия, наука коммунизм ащатадырра. АгIвымакъраль литература абгата дахъыстI апхъанчIвидза литература йгIашIарышвта уыжвгIанчIви литературадза, аурышв литература шабгу афольклори апхъанчIвидза урышв литератури рпны йгIашIарышвта йгIважвахауа асквшышв йгIвбахауа аъагIарагIвшара алитературадза. Швабыж магIны рыман атеория дырраква: литературадырра аджвыквцIага, уысалацIаща атеории апрактики, адрама, агвацчпа проза йгьи атакIра. Апрограмма апны ргыларта багъьан абызшвадырра акурсква: урышв литература бызшва аистория, абызшвадырра аджвыквцIага, уыжвгIанчIви урышв бызшва, апрактика стилистика, аредактор нхара атеории апрактики. АгIвычIвгIвыс йкультура гвыбзыгъара ауацIыхра апны магIны ду рыман музыка, суратгIвра, театр ршIыйарала, акинодраматургияла, акино азъазарала ащатадырраква. Адырра нархартаква зымгIва шалу 45 йнадзун, ауат йрыуата апщба ракIвпI «хпа» злагIайгыз, ауат йрыуата агIвба абызшва рнархартан. Адиплом йацыз ашвъала йгIауахвырквын Мыхц Кьарим зачётта 21-за, йазалху акурсла, асеминарла гIайгтI, «апщбаква» 11 йнадзауата, «ахвбаква» 9 йнадзауата йыздыргылтI. Ауат рымщтахьла гIвкъральыгIва экзаменкI йкIытI (марксист-ленин философияла, урышв йгьи совет литературала), аршIыйарала диплом нхара йхчатI. 

ЙпхыцIа апны аинститут магIныта йазибауа ауысла азцIгIара абари апш джьауап гIайттI ауысагIв: «А-Литература институт апхъала сара сакъыльи скультура анадзари раъаща мцыран хIва ауаштI. Аинститут сангIалга ауи аъара йцIоламызтынгьи сара адуней культура ауысла адырраква сыман. ЙгIвуа агIвычIвгIвыс йыхъазла ауи амагIны швабыж йдупI. Сара сабаза гIвгIвызтын ауи йгьгIаныцIуам суагIахъа литература ацIасгIвацаквала сбзазара атахъыта, датша культура щайдза сахагIвазамкIва, датша нархартакI тшазынасмырхауата саъазларныс. Ауи апш хъвыцра хIымата хIбзазарквын хIыршIыйара чIвырхъакIлагьи алитература апхъала йгьнанарыскIушым. Ауи ауысла ахърыкъьара аламкIва йдупI сара а-Литература институт йгIасыланацIаз: ауи цIгIва змам гIалцIыртапI».