Международное объединение содействия развитию абазино-абхазского этноса «Алашара»

«АЖВИ» АБАЗАКВИ: АХВЫЦКВА РЫХЪАЗЛА СОГIА

«СЛОВО» И АБАЗИНЫ: ПОДАРОК МАЛЫШАМ


«ХIара абаза бызшва агIахчара хIхатI тшыткI алахIцIарныс хIтахъыта апхъахьылагьи хIынхарныс хIхIазырпI», – арат ажваквала йалйыргатI  Светличный Родион архъвыхра гIамдагIвчва гвып рынхара агIарбараква знархараз хIайчважара асквш 2017 июнь мыз агIан. Агвып гIазщтийыз Санкт-Петербург апны йаныргIалу бызшвадырра рхъвыхрала агвчIагIвчпара наука жвлара фонд «Ажва» акIвпI. Абар ужвы асквш 2018 агIан йызкьазуу архъвыхра гIамдагIвчва гвып рынхара агIарбараква хIрылачважвитI. 

 

Ахвыцкви ауат ранчва-рабачви рыхъазла согIа

 

– СынчIва мызкIы ауацIа хIынхатI, хачIвыта хIпахь йхIыргылызгьи датшан, – йхIвитI Родион. – ЦIыпх хIара абаза бызшва, ауи адиалектква, ачважващаква аъащата йызтагылу, ахвыцква ракIвызтынгьи адуква ракIвызтынгьи цри бызшва шырдыруа агьиква хIырхъвыхтI, абаргвыраква гIахIрыбергьыльтI. Ауи ахIатырла сынчIва сабап злу уыскI хIырхъйарныс хIмурадта хIгIайтI. Заманта йхIымаз гьщардамызтI, ауи ахIатырла проект ду гIаджвыквхIцIушта йгьаъамызтI, мызкIы ауацIа хIкъару зквхъуш акIвымзарквын. Сшхъвыцуала, хIмурад гIахIыдахIвтI, ауи рбзира алапI йгIахIцхърагIауата йхIыцызкIыз хIыгIвзачвагьи.   

Йапхъахауа анйара арыпхьагIвчва рдырраква йъарыладырхIауа ареспублика институт агвхъауа йгьи абаза бызшвакви литературакви ркафедра апны йакIвшатI. Псыжв кыт агимназия апычIв классква рарыпхьагIв Булатова Аминати архъвыхыгIвчва гвып рунашвачпагIв Светличный Родиони акафедра аунашвачпагIв йайкьангьашын асабигIзартаква рынхагIвчви, апычIв классква рарыпхьагIвчви, анчва-абачви йырцхърагIагата аудиопрограмма дрыхIазырныс йангIалтI.  Аминат Виктор йпхIа дадгалагIвта ауыс хъаталкIытI, апрограмма йалазлуш агIвыраква гIалрыбергьыльтI, ауат йгIарыпхьуш агвып адылкIылтI. Ауыс швабыж дацхърагIатI Абаза район йаланакIуа Псыжв кыт апны йаныргIалу асабигIзарта «АйачIвачкIвын» аунашвачпагIв МалхIваз Маргарита, ауи агвып зыгIвнанхуш апещ хвыдаъа йырзалылхтI, пыраскIгьи йанымйауата рынхара йшатахъу апш йадыргалуата. Абаза саби литература йауата гIвыра 63 гIалххатI: алокIква, агIахIвахраква, ауысачкIвынква. Ауат йгIарыпхьатI 11-гIв. Апроект бжьы операторта йгьи бжьы режиссёрта дадынхалтI йара Родион.

– Уыжв ласыла адискква йырныта аудиопрограмма рнапIыцIашвуштI абаза сабигIзартакви апхьартакви, – йхIвитI Светличный. – Апроект абгата йацылкIтI хIфонд аунашвачпагIв Захарова Е.Ю. 

 

АрхъвыхыгIвчва гвып

 

СынчIва агвып рпхьадзара йалахIатI, йалакву азджьакI рпсахтI. Ага йгвасразтынгьи, цIыпх джьгарта йынхаз Биктимиркин Сергей сынчIва дгьызгIамитI. Агвып дзачIвызлакIгьи йпахь хачIв кIьыда гылан.

Кравцова Маргарита дпсихологпI, Киев дауапI, ауаъа дбзазитI, ООН Адуней ауагIапхьадзара афонд апроектква абзазара йалазыжьуа ажвлара организация далата дынхитI.

– Йапхъахауата сгIатанагатI джькIьахбастала йхIальальу швхакв. Сара агвып рпны хачIвыта спахь йгылазгьи апсихология йапщылан, – лхIвитI Маргарита лгвгIанаграква хIыцагIвылшауата. – АуагIа разазаъащаква шщаквгылу хъатакIла угылата йануырхъвыхуа джьащахъвара щарда гвы рутитI. Къарча-Черкес йтабзазауа ауагIа ргвы хътIыпI, рлахIвараква цIарымкIуата йгIадырбитI, майрата уызрыдгылитI, уызрачважвитI. Ауи швабыж йхIгвапапI. ХIара зыбызшвала йапшым атгIачваква рпынгьи хIсасытI, ажва ахъазла, ахъацIа дабазата, апхIвыс дкъарчата, йа ахъацIа дурышвта, апхIвыс дабазата. Ауралагьи гвыхътIыла хIайчважвун: хабар щарда гIахIархIвуан, атгIачва, аткъвым ртурых гIадрахун, ахабзакви ацIаскви шакIвшауа хIрыхадыргIвазун, ажва ахъазла, тацатгара, тацанадылра. Сара заджвыла йадскIылыз адырраква шIырпшыра гьрымам, рмагIны швабыж йдупI. Ауи акIвымкIвагьи лахIвара пшдза щарда сгвы йгIатахатI.  

Гуц Елена, Драгоманов М.П. йыхьыз нкъвызгауа ауниверситет апны дапхьитI, апхъахьыла дбызшвадырыгIвхуштI. Ауи лыгIвза йхIыцагIвылшаз агвгIанаграква йрыцылкIуата йгIацылцIахыз ари акIвпI: 

– Сара Якутия апны сйытI, ужвы Киев саъата сапхьитI. Къарча-Черкес саргьи йапхъахауата сгIайтI. Араъа джьащахъварата узынйауа щардапI. Акъала дуква рпны ауагIа ралагIваласра ду амщтахь абзазара тынчта, щаквкIыта йшымгIвайсуа уыла йгIацIашвитI. АуагIа раъаща гвхвгIагапI. Гвы асттI ахIвссаква щардагIвы рчгIвыча ауырата, рнапIква, рыхъвдаква хъгIвата йшныкъвауа. Абаратква, аъадаб анкъвгара сара швабыж схъырхуата сгвы йаладырхIун. Акъала дуква рпны ауи апш цкьара угьанйахуам. Архъвыхра нхара салалгIвацитI, ауи ахIатыр йсымаджьащахъвата йбаргву абаза бызшва тшахасыргIвазун. Хъвыжвду кыт апны арыпхьагIвкI абаза бызшвала апхьарасахIат тшыткIгьи хIзакIвлыршатI. Абари йапшу ажванахъа баргвква, – «хвхIвыхIвкI хвхIахъвкI йрыквчIвапI», – гIахътIра шIыцта йсзалтI. Ауаса йгIасгвынгIвытI ага йбаргвызтынгьи абаза бызшва шузырдыруаш тIакIв тшурыгIапсарквын. Араъа ауагIа швабыж йгвапапI, апсабарагьи ауагIа рапшта йпшдзапI.  

Маргарити Елени йырхIваз даздзыргIвуата Родион йгIайгвалашвахтI цIыпх ауат ларпшра кIаразджьара йцарныс йшахамдзаз. СынчIва ауи ахьдрыдзахуата ащхъаква рпынгьи йцатI, рыгIвзачва рпны йсасытI, Хъвыжвду апынгьи Гвым апынгьи анйараква акIвдыршатI, Архыз йаъан, Черкесск гIамдарала ргвы андырчвгIатI, «КIавкIаз аналькъвытнальмас» зхьзу азгIвадарахьпшырта апны йаъан, адгьыл йгIацIцIуа адз пхала тшыркIвабатI, рызгIвадара дрыбагъьатI.  

 

– Швабыж йхIгвапата Адуней адкIылара «Алашара» анхагIвчва гвып хIатарынйахтI, – йхIвитI Светличный Родион. – Ауат уыс ду дырхъйитI абаза бызшва агIахчари атшауацIнарыхри йырзынархата. Айчважвараква анакIвшуз хIангIалтI йхIрыхIазырыз аудиопрограмма аквпшыра книга хвыцта агIацIщтра йшацхърагIушла. Апхъахьылагьи «Алашари» хIари хIацынхара штшауацIнахуашла хIгвыгъитI.

 

Абаза бызшва атранскрипция ауысла

 

АрхъвыхыгIвчва гвып дрылан Родион йхъапщыла Светличная Еленагьи. Ауи дъачIвагIагIв дупI, Африка апны гIвыра змам ауагIа дрыдынхалтI, Англьыз Миддлсекс университет апны бызшвадыррала дмагистрпI.  

– Сара сбызшвадырыгIвпI, ауи ахIатырла абызшва шаъу сымаджьащахъван, – лхIвитI Елена. – Афонетикала салагатI. Швабыж йджьасщатI абаза бызшва апны абыжьхъгIваква швабыж  йъащарду. Йара ауи йарыпшдзауата йспхьадзитI. Абаза бызшва ззырдырныс зтахъу дымгIащауата ауат абыжьква дрыдынхалра атахъыпI. Родиони сари ужвыгьи хIгIайуаштI, рыцIагьи цIолата тшахасыргIвазарныс стахъыпI абаза бызшва.

Светличная Елена сквшпхьадзара Кения даъата дынхатI, ауаъа гIвыра змамыз уагIахъакI гIвыра рызгIалхъвыцтI. ХIаргьи здырраква цIолу, зылшара хIагIу абари апш ъачIвагIагIв хIанлынйа хIгвышхвауата абаза бызшва атранскрипция адынхалра ауыс гIахIрахатI.

– Адуней фонетика ассоциация ракIвпI атранскрипция алфавит йадынхалуа, йагъьызчIвуа, псахра алазцIауа, – йгIахIгвынлыргIвитI Елена. – Асквш 2005 йгIашIарышвта ауи алфавит хIарыф-дамыгъата 107 аланакIитI, диакритика дамыгъата – 52, просодия дамыгъата – 4. Атранскрипция хIарыфква цхърагIара дута йырзалитI абызшвадырыгIвчвагьи ахъаз абызшваква ззырдыруа апхьагIвчвагьи. ХIара ауи алфавит ахIарыфкви абаза бызшва абыжькви ашIхIырпшын аквшвараква абаза бызшва атранскрипция лыхIхтI.

Ари анархартала йапхъахауа ачIвырхъаква зчпаз америка бызшвадырыгIв Брайан ОʾХерин йакIвпI. Ауи сквшкъомкI руацIа абаза бызшва йапшым ахъатаква дрыдынхалтI, йырхъвыхраква йыргIарбарата абаза грамматика знархару агIвыраква гIацIищттI. Къарча-Черкес дъадзаныз Светличная Елена Брайан йлихыз абаза бызшва атранскрипция апроект тшахалыргIвазатI, тIакIв дадынхалхын ауи апроект лрыхIазыртI. Ужвы атранскрипция апроект аъачIвагIагIвчва йгIадрысабап йауашта йадгалапI, ауат йырнапIыцIахIыршвуштI.  

 

Афонд «Ажва» йгьи абазаква

 

Къарча-Черкес йгIайыз архъвыхыгIвчва гвып зтахъырала йгIайыз уагIапI. Ауат гIарщтитI зунашва айшыста йгIахIархIвыз афонд «Ажва».

Санкт-Петербург апны йаныргIалу бызшвадырра рхъвыхрала агвчIагIвчпара наука жвлара фонд «Ажва» асквш 1996 йгIаншатI. Афонд мурадта йаман Россия йгьи СНГ ауагIахъа бызшваква рырхъвыхра, ргIвыра атшауацIнарыхра. Асквш 2000 йгIашIарышвта афонд апроектква нархарата йрымапI датшагьи абызшваква руысла адырраква радкIылра, архъвыхра гIамдараква ракIвыршара, ажвлара психология, ажвлара бызшвадырра знархару ауысква, апроектква радгалра, абзазара ралажьра.

– Сара швабыж сырзыразпI апроект абзазара йалагIжьырныс ахъазла йгIахIцхърагIаз хIыгIвзачва, йалкIгIата, атекстква бжьыла йананхIцIуз ауат йгIарыпхьуз асабиква, – йхIвитI хIайчважвара ацIыхъва Светличный Родион. – Йджьасщауата шIыцрата йсзалыз ари акIвпI. Абазаква кIьанджь театр ъашвыму. Швабыж сгвы йалахIауата сйыцынхатI атеатр аунашвачпагIв Къвапсыргьан Зураб. ХIара ужвы апхъахьыла хIацыздынхалуаш апроектква хIрызхъвыцитI, ауи ахIатырла сгвыгъитI хIацынхарагьи хIащтаныкъварагьи йшIымчIвауата апхъахьылагьи йшымгIвайсуашла.

Абаза жвлара хIхъатала швабыж хIырзыразпI Санкт-Петербург апны йаныргIалу бызшвадырра рхъвыхрала агвчIагIвчпара наука жвлара фонд «Ажва» йгьи ауи аунашвачпагIв Захарова Елена Юрий йпхIа.