International Association for Assistance to the Abaza-Abkhazian ethnos «Alashara»

«Ажәеи» абазақәеи: Ахәыҷқәа рзы аҳамҭа

«СЛОВО» И АБАЗИНЫ: ПОДАРОК МАЛЫШАМ


«Ҳара ҳазхиоуп аусура ацҵара, абазатә бызшәа аиқәырхара аус аҟны ҳахәҭаа алаҳгаларц», – абарҭ ажәақәа рыла ҳаицәажәара хиркәшеит Родион Светличныи, 2017 шықәса, рашәарамзазы Санкт-Петербургтәи алингвист ҭҵаарақәа ргәыҳалалратә ҭҵаарадыррақәа руаажәларратә фонд «Ажәа» аҭҵааҩцәа-аволонтиорцәа ргәыҧ раҧхьатәи аекспедициа аихшьаалақәа рзы. Абар 2018-тәи ашықәс: изаамҭанытәиу аекспедициа аусура аихшьаалақәа рыҟаҵара.

 

Ахәыҷқәеи урҭ рҭаацәеи рзы аҳамҭақәа

 

– Сынтәа ҳара аус аауан мызкы иназынаҧшуа, ҳҿаҧхьа иқәҳаргылоз аҳасабтәқәагьы даҽакын, – иҳәоит Родион. – Ҵыҧхтәи ашықәс азы, ҳара иҭаҳҵааит абазатә бызшәа аҭагылазаашьа, иахьатәи аамҭазы иара адиалектқәеи ацәажәареи, ахәыҷқәеи адуцәеи рхатәы бызшәа адырра аҩаӡара ауадаҩрақәа аанарҧшит. Убри аҟынтә уажәазы ҳара ҳааит аус аҟны хәарҭарак ааҳарҧшырц хықәкыс иҟаҵаны. Аамҭа маҷны иҳаман, убри аҟнытә ҳазлацәажәоз рацәак идумыз апроект акәын, мызкы аҩныҵҟа инаҳагӡашаз. Сара сгәы иаанагоит ари аҳасабтә анагӡара ҳалшеит ҳәа ҳҩызцәа рыцхыраара иабзоураны. Раҧхьатәи аиҧылара мҩаҧысит аҵарадырра аусзуҩцәа рзанааҭтә зыҟаҵара аизырҳара ареспубликатә институт аҟабарда-черқьестәи абазатәи бызшәақәеи алитературақәеи ркафедраҿы. Ҧсыжтәи агимназиа № 1  алагарҭатә классқәа рырҵаҩы Аминат Булатовеи аекспедициа анапхгаҩы Родион Светличныи, акафедра аиҳабыи ажәалагалақәеи урҭ рынагӡашьеи иалацәажәаны, ирыӡбеит аудиопрограмма аздырхиарц ашколқәранӡатәи аусҳәарҭақәеи, алагарҭатә классқәеи, аҭаацәеи рыцхрааразы. Аминат Виктор-иҧҳа Булатова апрограмма еиқәлыршәеит, аусутә гәыҧ ҳәаақәҵаҩыс дыҟан.   Апроект ацхыраара ду алҭеит Абазатә муниципалтә раион Ҧсыж ахәыҷ баҳча «Звездочка» аиҳабы Маргарита Малхозова, лара аусуразы ауада хәыда-ҧсада ирылҭеит. Ахәыҷқәа рзы абаза бызшәала аҭыжьымҭақәа рахьтә иалхын 63  ҩымҭа: алакәқәа, ажәеинраалақәа, ажәабжьқәа. Урҭ абжьы ахарҵеит  11-ҩык. Абжьы аоператори, абжьы арежиссиори рус наигӡон Родион ихаҭа.

– Хара имгакәа адискқәа ирнырҵаз аудиопрограмма рыҭахоит абазатә хәыҷбаҳчақәеи ашколқәеи зегьы, – ҳәа азгәеиҭеит Светличныи. – Апроект адгылара аиуит ҳфонд анапхгаҩы Е. И. Захарова лҟынтәи.

 

Аекспедициа акоманда

 

Сынтәа акоманда аилазаара ҧсахын, ирҭбаан, аха рыцҳарас иҟалаз 2017 шықәсазтәи аекспедициа алахәылацәа руаӡәык Сергеи Биктимиркин дзымааит. Командацыҧхьаӡа рҿаҧхьа иқәгылаз аҳасабтәқәа хаз-хазын.

Маргарита Кравцова – дыпсихологуп, дынхоит, аус луеит Киев,  ООН Жәларбжьаратәи афонд апроект аҳәаақәа ирҭагӡаны аус зуа ауаажәларратә еиҿкаара аусзуҩыс дыҟоуп.

– Сара раҧхьаӡа акәны саҭааит асасдкылара злоу шәтәыла. Аекспедициа аилазаараҿы сара саҳасабтәқәагьы адҳәалан апсихологиа, – лцәаныррақәа ҳацеиҩылшоит Маргарита. – Даара аинтерес аҵан аицәажәара аҧсихологиатә моментқәа рыцклаҧшра.  Ҟарачы-Черқьес инхоит згәы аарту ауаа, ҳаргьы агәахәара ҳнаҭон, иаҳзымариан аицәажәара. Ҳара ҳарҭаауан еиуеиҧшым аҭаацәарақәа, урҭ реиҳараҩык интернационалтәқәан, иаҳҳәап ахаҵа дабазазар, иҧҳәыс дҟарачуп, мамзаргьы ахаҵа даурысуп иҧҳәыс дабазоуп. Ҳара ҳаицәажәара еснагь иаартын: ҳара иаҳзеиҭарҳәон ажәлар рҭоурых, аҭаацәа, ажәла рҭоурых, амилаҭтә қьабзқәа, иаҳҳәап, ақьаӷьариара, ачара шымҩаҧысуа. Аматериал сара исоуз даара ахә ҳаракуп, иуникалтәуп, сара агәахәара ду снаҭоит уи.

Елена Гуц, Драгоманов ихьӡ зху Киевтәи ауниверситет астудентка,аҧхьаҟа илингвистхараны иҟоу, иацылҵеит лколлега лажәабжь:

– Сара сиит Иакутиа, ҳазну аамҭазы аҵара сҵоит Киев. Ҟарачы-Черқьестәыла сара раҧхьаӡа акәны сааит. Араҟа иџьоушьаша рацәоуп. Ақалақь ду иацу аилыхара ашьҭахь, араҟа улаҧш иҵашәоит аҭышәынтәалара. Сара игәасҭеит, араҟа аҭыҧҳацәа реиҳараҩык аҵкы ауқәа рышәҵаны ишныҟәо, рмаӷрақәа аууп, рыхәда акасы ҧшӡақәа ахоуп. Уи аганахьала аҳҭнықалақь иузадкылом. Сара гәахәарыла срыцклаҧшуан ари аҽынкылара, аразра зныҧшуаз аҭагылазаашьа. Ҿыц иалаго ҭҵааҩык иаҳасабала, сара сеигәырӷьоит асеиҧш иуадаҩу абаза бызшәа ахьсықәшәаз. Аул Ново-Кувинск арҵаҩы аурок маҷ ҳзымҩаҧылгеит. Абасеиҧш иҟоу ажәарццакқәа  «хә-ҳәыҳәк хә-хаҳәк ирықәтәоуп», сара сзы аартрак иаҩызахеит. Убри аан сара еилыскааит, уи уҵар шалшо, амала уҽадуцалароуп. Араҟа ауаагьы џьашьатәуп, аҧсабара аҧшӡарагьы џьоушьартә иҟоуп.

Маргаритеи Еленеи ражәақәа ахҳәаа рзыҟаҵо Родион игәалашәеит, ҵыҧх ашьхаҟа ишзымцаз. Сынтәа акәзар, рҩызцәа рҭаацәа рҟны асасра иахьӡеит, Старо-Кувинск, Красныи Восток аулқәа рҿы аиҧыларақәа, Архызҟа аекскурсиа амҩаҧгара, Черкьесск ақалақь аҟны анеи-ааира, уимоу ргәабзиара аиӷьтәразы атермалтә ӡқәа ркомплекс «Жемчужина Кавказа» иаҭааит.

– Агәахәара ҳнаҭеит Жәларбжьаратәи аидҵа «Алашара», аколлектив рбара – иҳәеит Светличныи. – Дара иҟарҵо рацәоуп абаза бызшәа аиқәырхаразы. Ҳара уи ҳахнахит. Аиҧылараан ҳалацәажәеит «Алашара» ацхыраарала иазҳархиаз аудиопрограмма аус адуланы акьыҧхь версиа аҭыжьразы иҟоу алшарақәа. Ҳақәгәыӷуеит иааигәаны аусеицура аҧхьаҟагьы.   

Абаза бызшәа атранскрипциазы

 

Аекспедициа аилазаара далан, убасгьы Родион иҧшәма ҧҳәыс Елена Светличнаиа,  аҩыра змам Африкатәи ажәларқәа аус рыдулараҟны аҧышәа ду змоу аспециалист,  Миддлсектәи ауниверситет ахархәаратә лингвистика амагистр.

– Сара сзы лингвистк иаҳасабала даара аинтерес аҵан, абызшәа шеилоу абара, – еиҭалҳәоит Елена. – Сара салагеит афонетика ала. Сара иџьасшьеит, ацыбжьыҟақәа ари аҟара иахьырацәоу. Абаза бызшәа зҵарц зҭаху ауаҩы, даара иҽазишәароуп абарҭ ашьҭыбжьқәа зегь рҳәара. Сара сгәаанагарала, убраҟоуп абызшәа аҧшӡара ахьыҟоугьы. Родиони сареи дырҩагьых ҳаауеит, еиҳа инарҵауланы издырыр сҭахуп абаза бызшәа.

  Елена Светличнаиа акыр шықәса аус луан Кении, аҩыра змамыз аплемиақәа џьоукы аҩыра рзаҧҵаразы. Ҳәарада, асеиҧш зыҩаӡара ҳараку аҧышәа змоу аспециалист абаза бызшәа атранскрипциа аус адулараҟны уи ухы даумырхәар гәнаҳароуп.

– Атранскрипциатә алфавит аредакциа азыруеит Жәларбжьаратәи афонетикатә ассоциациа, 2005 шықәсазтәи аҭагылазаашьаҟны ари алфавит шьақәгылоуп 107 символқәа-анбанқәеи, 52 символ – диакриттә дыргеи, 4 символк – адырга просодии, – еиҭалҳәоит Елена. – Атранскрипциа ашьҭыбжьқәа даара ирыхәоит алингвистцәа, абызшәа аҵараан, ашьҭыбжьқәа ииашаны рҳәаразы. Ҳара ҳҽазаҳшәеит абаза бызшәа ашьҭыбжьқәаеи ари алфавити реидкылара, аусгьы адаҳулеит ҳара ҳтаблица.

Ари ахырхарҭала раҧхьатәи ашьаҿақәа ҟаиҵеит америкатәи алингвист Браиан ОʾХерин, уи акыр шықәса рыҩныҵҟа аҭҵаарадыррақәа мҩаҧигон абаза бызшәа еиуеиҧшым апрактикатә атеоретикатә зҵаарақәа рзы, абаза бызшәа аграмматиказы акьыҧхьымҭақәеи амонографиақәеи имоуп. Ҟарачы-Черқьестәыла лыҟазаара амшқәа раан Елена Светличнаиа иҭҵааны аус адылулеит абаза бызшәа атранскрипциа апроект, Браиан илыдигалаз ала, ҳаргьы ари апроект аспециалистцәа ирыдаҳгалоит агәаҭаразы. 

Афонд «Ажәеи»  абазақәеи

 

Акспедициа иалахәу афонд «Ажәа» волонтиорцәас иҟоуп, уи аусура атәы ҳзеиҭарҳәеит дара иааркьаҿны.

Санкт-Петербургтәи алингвистикатә ҭҵаарақәа рҵарадырратә, ауаажәларратә «Ажәа» аҧҵан 1996 шықәсазы Урыстәылеи СНГ ажәларқәа рбызшәақәа рҩырақәа рырҿиареи рыҭҵаареи ацхраара хықәкыс иҟаҵаны.  2000 шықәса раахыс уи аусура аҳәаақәа ирҭагӡаны адәахьтәи алингвистикеи, алингвистикатә рбагақәа рбаза аҧҵареи рзы апроектқәа нарыгӡоит, иара убас аиҭага атеориеи апрактикеи, асоциолингвистикеи асоциалтә ҧсихологиеи рзы.

– Сара идуӡӡан иҭабуп ҳәа расҳәар сҭахуп уск иҳацаҿу зегьы, апроект анагӡара иацхрааз, еиҳаракгьы ахәыҷқәа, атекстқәа ирыҧхьоз, - иҳәеит ҳаиҧылара ахыркәшамҭаз Родион Светличныи. – Сара гәахәарыла иџьасшьеит абазақәа рхатәы акьанџьатә театр ахьрымоу, аус ицура гәахәаран иара анапхгаҩы Зураб Копсергенов. Ҳара уажәнатә апланқәа шьақәҳаргылоит ҽааны азы, ҳақәгәыӷуеит ацхыраара, апроектқәа аҧхьаҟагьы рынагӡара ҟны аусеицура иацҵахап ҳәа. 

Абазатә уаажәларра гәык-ҧсыкала иҭабуп ҳәа рарҳәоит Санкт-Петербургтәи аҵарадырратә ауаажәларратә фонд «Ажәа» уи анапхгаҩы Елена Захарова.