Международное объединение содействия развитию абазино-абхазского этноса «Алашара»

Амара акIкIара дазхIвахIвитI ансимшы

Радоваться солнечному свету


Июнь а 15 сквшы 60 йхъыцIитI апхьахьа, арыпхьагIв, арыпхьара адгалагIв, ажурналист, атакIыгIв, ауысагIв, ашвахIвагIв ХIасарокъва Бильаль. Ауи уыста дыздкIылу акъом уанырпшра уыбыз йгIаквххитI – «АлахI йгIазылайцIауа йгIайылайцIадзитI» – ухIварныс. Ауаса Бильаль дыззычпу зымгIва мгвата йгьгIатйымгатI, йара-йара тшырзибжьатI – ауагIа зыкIыла дрыхъвара йтахъыта.

 

АткIьийра зхIальмыз айфанд Мата

Бильаль Къвбина кыт апны дйытI. Ауи йаба МхIамат дкъвыръанмольан, акыт апынгьи «айфанд Мата»-хIва акIвын йшйыпхьуз. Зын-замызагьи ауи йыхьыз ажва «тлача» гIацырцIун – йщапIыкI ъашIамыз йтшпнырхIвауата гьакIвым, «Мата» зхьзыта акыт йтаз анахьанат ахъачва далагIарылыркIгIун. МхIамат дчкIвыныркIвата дныкъвадыкъвахатI: апхъапхъа чва зхъарымбаз ахвырта йщапIы нанауахвын йхъыхра атахъхатI.

Акыт ауи агIан «маджьгыт»-хIва йызпхьауата йрымаз анышвынтара йтагылаз анамазчпарта тдзычкIвын акIвын. Анышвынтари ХIасарокъваргIа рхакви Чбыщ дзыгIвчкIвын зтысуа акIвар унахъыс-гIахъыста йаныргIалпI.

Апхынла акыт ацIайква тшкIвабара Къвбина дзыгIв йцауата Мата йгвашв йанагIвсуаз ауи амаджьгыт дгIайхуата йынйазапытуан. Айфанд акIвар анахьани атшпы дгIаквгылгIвацазтынгьи асабиква гIашIасуанта ауи псайспадза акIвар дгIатыста йпны дгваралхындзкIьа йгьымпIатIауазтI – ахIба йымгIва прымкъра ахъазла. Йалныс ауыпI ауи датша заджвы йакIвзарквын ахвыцква ахъарара йапшыта дрымбауа тшырчпата рымгIва надырдзарнысгьи. Ауаса Мата йахьыла ауи апш ъадабсызра гIадырбарныс рахIа ймаджьаныз ачкIвынчвагьи рхъа йгьакврымцIузтI. «Айфанд йымгIва пшвымкъын!» – хIва ауат йызнымкIва ранчви рабачви йгIарархIвыз дзачIвызлакIгьи йхъа багъьата йталта йаъан.

Йара Мата йхъахв щтIихуа дгьаъамызтI, дгIвычIвгIвыс тынчын, дтIатIан. Асабиква йара йахьыла йакIвым закI рымхъачпаргьи кIара гьгIалйымщтуашызтI. Ауаса дара асабиква «ауи дтIатIапI» – рхIвата йамуаш гьрымчпузтI, айфанд рыцIагьи пIатIу йыквырцIун акIвмызтын.

Бильаль жвасквшагьи гьйымрыцкьасызтI йан данихъышвт. Йалныс ауыпI ауыгьи аби апи разазаъаща апны тшгIанахIварныс. Мата йпа дгьйызгвауамызтI. Ага йара адин дачIвызтынгьи, Бильаль ауи тшадикIылырныс зынгьи дгьазадйымцалтI, тшгьйымрыткIьийуазтI, йычкIвын дхъызхуаз асуратхъыхра, агитарасра агьиквагьи йымба йамуа тшгьыйымчпузтI.

– МшкIы хIаба дызпхьуз азкьыр амакъым агитара аструнакIла йгIатысщтын – ауи закIыта йджьайщан, – йгIайгвалашвахитI Бильаль. – ХIунагIва радиолагьи гIвнан, хIабагьи йзысхвгIуз апластинкIаква йгвапхадзауата дрыздзыргIвуан.

 

Абызшваква рахьыла ахъра

Йпщбахауа акласс йгIашIарышвта Бильаль аобласть уагIахъа апхьарта-интернат дырщтийтI, квтанай дырра ъагIацIигазгьи ауаъа акIвпI. «Аинкубатор» апны (араса акIвын рапхьарта йшапхьуз ауаъа йыцIакваз) ауи абызшваква дхъырхуа далагатI, йаргьи асквш 1975 агIан Псхваба йтагылу агIвыма бызшваквала акъральыгIва педагогика институт дыцIалтI. Хвысквша анцIы ауи ауаъа француз йгьи намыца бызшваквала арыпхьагIв йдиплом йымата дгIалгатI. Ауаса аинститут дъадзапхьуз асквшква руацIа ауи аъачIвагIа тшазибжьара йахъазымкIва гIвзачва шIыцгьи йаутI, аршIыйарагьи рыцIа аргваныта тшадикIылтI. Астудентква француз бызшва йазрыпхьуз Филиппов Евгений гитара бзи йызбауа заджв йакIвта дгIацIцIтI. Ауи йгьагьара тшадызкIылыз агвып анайззарыз Высоцкий Владимир, Окуджава Булат, Никитин Сергей, Визбор Юрий датшагьи йбергьльу абардква руарадква рхIвалун. Евгений йаргьи уыса алайцIун, Бильаль ауат рыуа зджьакIы макъым рыцIайцIатI. ЙгIаншаз ашваква анбжьагIвчва ррепертуар дырбайатI. Ауи Бильаль йгвы гIащтIнахуан, йаргьи ашва шIыцква гIанйыршарныс даквнаргвышхвун. ЦIабыргыта, зныкIдза ауат ашваква йара ауи агвып ракIвымкIва датша заджвгьи йгьйымгIузтI.

Асквш 1980 агIан аъачIвагIагIв шIа йцри кыт, йымцырахаз йаба йтдзы дгIайхитI: Мата асквш 1977 агIан адуней йхIваджьтI. Къвбина акыт апхьарта апны Бильаль француз бызшвала арыпхьагIвта йынхара джвыквицIатI. АрыпхьагIвчва йрыпхьарныс йшцIасу апш ауи ужвы Бильаль МхIамат йпа – хIва акIвын штшгIайзынадырхуз. Апхьарта апны алалракI, айззаракI анаъаз Бильаль гитара дасуа уарад ацихIвауа ауатыкв дгIаталлун. АпхьагIвчва ахIбачва рыуа щардагIвы ауи тшйыцырчпауа гитара йасырныс тшазырбжьауа йалагатI. Ауи арыпхьара ахабзаква йрыквымшвауата зхIвуш даъазапI, ауаса Бильаль йгвапан апхьагIвчва арыпхьагIвгIвацата акIвымкIва нбжьагIвтагьи дъарпхьадзуз.

Хысквша данынха амщтахь Бильаль къвырльыкъвхара ар дызшIыртитI. ДангIахъынхIвых арыпхьара атаджвыквицIахитI, ауаса щарда йгьнайгуам. Асквш 1986 агIан акытсовет дадепутатта далырхитIта архъйагIв комитет асекретарра гIайыхъвдаквырцIитI.

Йдепутат хъвдаквцIараква рпIатла аналга йъачIвагIа датазгIайхитI. Ауаса Усть-Джьгваты йпщбахауа аквтанай апхьарта апны ауи асабиква зирыпхьауа абаза бызшвапI. Араъа йнанаркIыта ХIасарокъва Бильаль йынхарагьи йыршIыйарагьи йцри бызшва йапщылапI.

 

ХIа хIакIвмызтын йызчпушда?

Асквш 1991 агIан ХIасарокъва Бильаль нхара «Абазашта» газет дызшIыртитI. Абаза литература акъагIара зыхьыз йапщылаз агIвгIвчва райхIарагIв ъанхуз аредакция апны йгаз агIвысквша Бильаль йыхъаз апхьара дууын. Йагъьыз абаза уысагIвчва, агIвгIвчва, ажурналистква рпны ауи тшыззибжьуз ажва адынхалра йгьахъазымызтI, абзазара апны угыларта уазхъвыцра шатахъугьи йылайдыркIуан ахIбачва. Абазаква рлитература рахIа мчыта тшанауацIнахуаз ХХ-хуз асквшышв асквшы 60-ква рагIан йгIашIарышвта ауаса йщаквгылын – хIуагIа рпны ауысагIв дгьуысагIвгIвацамызтI. Анауки акультури йапшым рнархараквала йазалху дырра змаз аъачIвагIагIвчва ъамачIгIвыз йгIалцIла агIвгIвчва дара-дара рыхъвда щарда хъарцIун: ашва аларцIун йгьи йырхIвун, абызшва дырхъвыхуан, ажварква адыргалуан, алитература гIаншараква йрызхъвыцуан, руагIахъа ртурых ддырдыруан. «ХIа хIакIвмызтын йызчпушда?» – ари Бильаль йбзазара ахабза хъадаква йрыуа закIхатI. Ауи аршIыйара агалагьи рыцIа цIолата дадгылуа далагатI. Апхъапхъа Джьгватан Къальи, Мыхц Кьарим, Апса ФатIимат руысаква макъым рыцIайцIун, уацIыхъван йхъатала ауысаква ргIврагьи джвыквицIатI. ЙыршIыйара апынгьи абгата абаза бызшва дазцатI – ухIва ауаштI. Йапхъахауата йара-йара йгIанйыршаз ашваква йрыуапI «Пхыз», «АнцIрала хIанйатI», «Ан луасйат».

– Сара сыхъазла зджьара йгIанымхауата магIын ду аман Мыхц Кьарим съайабадырыз, – йхIвитI Бильаль. – Угвы йалалуа ауи йлирика йанакIвызлакIгьи саргъаруан. Аргваныта хIанаднагал ауи йдунейпшыщагьи рыцIа йгIасгвынгIвуа сцатI, ауи саргьи йсаргванта йгIацIцIтI. ГвынгIвырапI сара суыса шIыцквагьи зымгIва йрапхъата йызсырбуз Кьарим шйакIвыз.

Асквш 1991 йгIашIарышвта асквш 2006-дза ХIасарокъва Бильаль ажурналистика дапщылан. «Абазашта» газет амщтахь ауи ареспублика радиуа абаза хъвшара, акабель телебара «Канал-3» рпны дынхатI, «Джегутинская неделя» («Джьгваты амчыбыжь») газет даредактор хъадан. Ажурналист нхара уагIа щардагIв урабанардыритI, ауат абадырра шIыцква убзазара щардала йанырпсахуагьи ншитI.

Бильаль йыхъаз щарда гIанацIгIатI ЧквтIу Владимир йынйара. Йбергьльу амакъымгIаныршагIв, амакъымршIыйагIв, абаза ашвахIвара эстрада нархара гIалазгаз, Къарча-Черкес апны йапхъахуз авокал-ъамапсыма гвып «Абазинка» гIанзыршаз ЧквтIу Владимир абард йыхъазла цIбацIбагIв хъадата далтI. Асквш 1997 йгIашIарышвта ауат агIвыджь ауарад шIыцква ргIаныршаралагьи йацынхауа йалагатI. Ауаъадза агитара йацихIвуз ракIвымкIва уарад алазымцIуз Бильаль ЧквтIу Владимир йэстрада макъымквагьи ажва рызгIайхъвыцуа далагатI, ауыла дгIашIамсуата йара йчIвыта аэстрада уарадквагьи гIанйыршауа йджвыквицIатI. Ауат рхIвитI «АбазгьыргIа», «Локт» гвыпква, ашвахIвагIвчва Мижай Беслан, Чква Льильа. Ауат ауарадква «Асквш ашва – Абаза» анкъвакъвра апны йанга ажюри йгIалыркIгIакваз йрылашватI.

Йара Бильальгьи «ажьора дгIацIцIтI», йапшым абард фестивальква дрылазлитI, асквш 2015 агIан «Абазашта ашва шIыцква» анкъвакъвра апны дайгIайтI. АйгIайра злагIатигаз йашва «Сасы» акIвпI. Ауи Бильаль йчIвыта эстрада йацчпата йапхъахауата йыздынхалыз уарадпI. Философия цIола злу ари ашва Муренко Олег аранжировка аназыгIанйырша амщтахь абыжьгаща датшахатI, аздзыргIвчвагьи рыцIагьи мчыта ргвы йадсылуа йцатI. АшвагIаныршагIв ауагIа абзазара апны рыцIа хвы зму тамамта йазхъвыцныс йаквгIазшIититI:

«Амара акIкIара йазычпала квырмыш

Адуней лашара уазхIвахIвуа ансимшы».

 

ЙузадымкIылуаш гьаъам

Ажва дъадзадынхалуа азаман ауацIа ХIасарокъва Бильаль псайспамцара йцри бызшва ацIолара дазынадзун, ауи ахабзаква ййырдыруан, ужвы йщаквгылу атамамгIвыща алйыргун, абаза бызшвадырра апны уахьчIвала йаъу абжараква дрызхъвыцуан. Ари анхара рыцIа-рыцIа даланахIвауамцара Къарча-Черкес къральыгIва университет къабард-черкес йгьи абаза филология акафедра аспирантура дгIанагтI. Ауи дангIалга абаза бызшва апунктуаца наука амальла йалйыргарныс хъатайкIытI, ауи ауысла кандидат диссертация йгIвын асквш 2007 агIан Къабард-Балкъар къральыгIва университет апны дахIврала йхчатI.

Ауаъа йнанаркIыта Бильаль джьгарта наука айззара щарда дрылалитI. Зажва алсуа ъачIвагIагIвта дырпхьадзауата ауи акъральыгIва йгьи ажвлара уысхартаква йгIандыршауа йапшым айкьангьашыртаква экспертта дрыларцIитI. Ауи Къарча-Черкес Республика апны ауагIахъа-шта компонент йаквыргIапсу апхьага-методика адкIылраква лыхрала аэксперт совет апны абазаква ргвбайари рыбызшви руысла дкьангьашагIвпI; Къарча-Черкес Республика арыпхьагIвчва ръазара йъаладырхIауа аинститут (КЧРИПКРО) апны ацри бызшваквали алитератураквали арыпхьара-методика совет далапI; «Алашара» жвлара адкIылара абаза бызшвала Адуней координация совет апынгьи уыс йыхъвдаквпI. «Алашара» адкIылара Черкесск къала апны йгIаныршу ахъвшара апны абызшва зымдырдзаквауа рыхъазла йадгалу абаза бызшвала арыпхьараква рыхъазла арыпхьаща лызхызгьи ауи йакIвпI.

ХIасарокъва Бильаль абаза бызшвали литературали апхьагаква дрыдынхалитI, ацIбацIбара гIвыраквагьи рзигIвитI. Абаза бызшва апунктуаца, йажвыз ажваква, атамамчважваща руысла ацхърагIагаква лихитI. «Алашара» адкIылара анаука программа архъйара далата зцри бызшва зымдыруа йа бзита йзымдыруа рыхъазла «Абаза бызшва тшазыбжьага» йрыхIазыритI. Абаза бызшва астилистика ащата ауысла доктор диссертация йгIвитI.

Ауатквала ракIвымкIвагьи, ауи агIвырагIацIщтра ауыс ъайдыруа йгIалцIла (КЧРИПКРО апны гIвысквша аредакция-гIвырагIацIщтра хъвшара унашва ахъицIатI) книга гIацIызщтра зтахъу щардагIвы цхърагIара йазыбжата тшгIайзынадырхитI. Асквш 2006 агIан йгIацIцIыз «Лагъь КIавкIаз ауагIахъаква рлитератураква рантологиягьи», асквш 2007 агIан йгIацIцIыз «Абаза уысара антологиягьи», датшагьи агIацIщтраква Бильаль йгIапсара рылапI.

Ауатквала дгIанымхауата ауи абазаква рыбызшви ргвбайари ауагIа йдйырдырра дащтата «Тынха» ахьызта сайт гIанйыршатI, йапшым асайткви «Къарча-Черкес» къральыгIва телерадиуакомпании корреспонденттагьи атакIыгIвтагьи дрыцынхитI. Ауат ауысква зымгIва ауи йынхарта хъада – КЧРИПКРО апны къабард-черкес йгьи абаза бызшвакви алитературакви ркафедра унашва ахъцIара – йацйырцитI.

– Уыс швабыжта йщардапI. Ауат зымгIва заджвы йчпара атахъыпI, – мачIкIгьи дъанквынта йхIвитI Бильаль МхIамат йпа. Йгьи йтагIацицIахитI: – ХIара хIакIвмызтын йызчпушда?