Международное объединение содействия развитию абазино-абхазского этноса «Алашара»

ОрхIан йхъацIара

Гражданский подвиг Орхана


ЙгIважвахауа асквшышв й-60-хауа асквшква рагIан абаза мхIаджьырква рбжьы «айха прапса» йгIакIылсын Абазашта абзазагIвчва йырзыгIадзатI.

ГIвыма къралькI апны байата адуней

сатагIаквылхра ацкIысгьи,

гIвыма къралькI, гIвыма угIакI рпны хахвата,

йызтахъу зымгIва зауа гIвычIвгIвыста

сгIаквылхра ацкIысгьи,

С-Псадгьыл цри апны,

ОшвхIамахва ахъыкв апны

хIахъв тшытта сгIаквылхырныс стахъхарын…

Къвапсыргьан ОрхIан

ЙагIвсыз асквшышв й-60-хауа асквшква рцIыхъва абаза газет анапаква йгIарыквшваз ауыса ««Адуней сатагIаквылхзарквыныз» йгIалху арат асатырква хъвыцра цIола щарда гIадрыцIситI… Ауи атлахан йгIаджвыквылтI запхъанчIви псадгьыл гIвына амамкIва бзи йызбауа ауыса автор йгIайыквчважвауа ари атурых – жвасквшапхьадзара рурала акъральгIвынаквали «айха прапсали» йагIвшата, йхъылапсата йгIабзазаз, зчва рыцхIагIа щарда тшаз абаза уагIахъа адыздалхыз амгIва йапхъахауата йщтIазцIаз агIвычIвгIвыс.

УахьчIвала хIара хвитта агIвымакъральквагьи ачIвыла хъараквагьи гIамыгIдитI, хIунагIва апхара хIшыгIвну уыжвгIанчIви амальква гIахIрысабапуамцара адуней абзазагIвчва йъанызлакIгьи хIызрачважвитI, хIызрабадыритI, хIызрыщтаныкъвитI, ауи ахIатырла йгьмайрам уыла йгIацIаужьырныс сквшышвбжакI йадамызтынгьи щтахьла угIацапшхырквын уылапш йгIащтIнахуа абзазара ауи ауысла аъащата йызтагылаз – хIкъраль йрайгвамыз акъральква рахьыла уцарныс ахъазла архъвыхра ткIьи укIылсра шатахъыз, йхъыртIуамцара йшдырхъвыхуаз асальамшвъаквагьи, почтала йамырдуз йзачIв пкъыгIвазлакIгьи акъраль уыснкъвгагIвчва рылапш шахъырымхуаз, – айшыста йхIхIвапIта, аъахIыльчва аргванкванадзара майрата йзагIвымсуата «апрапса шкIныхIаз».  

Йшбергьльу апшта, КIавкIаз айсра анакIвшуз абазаква рщардагIв агIвымакъральквала йхънагатI, йалкIгIата Трыквштала, ауи амщтахь рцри псадгьылгьи йакъвгахатI. АуагIа гIвгIвы ТхIайцIыхв Бемырза айчважваракI апны йшыхIвазла, йащтагIайыз агIамта аурала хIкъраль апны «КIавкIаз айсра аунашва дукI ауатыкв йгьгIатарымгузтI, йгьаламчважвузтI, йара йаъамкIва акIвын йшырпхьадзуз». Ауаса ауагIа хъаштылра гьрымам. ШIакI йтыцIуа шIакI йталхуамцара йгIадзынгылуаз абанпараква йрархIвхуан КIавкIаз айсра агIан хIуагIа рчва йтшаз арыцхIагIаква, агIвымакъральквала йахънагаз раргванква, рткъвымлагIвква гьырхъмаштылуазтI… АгIвыма штаква рпынгьи йгIадзынгылуан чкIвынргIа гвыли псыли бзи йызбаз агIагвалашвахрагIвацаквала зхабар рдыруаз рапхъанчIвиква йырпсадгьылу ашта. Ауат рабадучва ахрат мгIва йыквылхындзыкIьара йашIпссгIун лацIыхъвакIлазтынгьи зны йырбахныс рцри КIавкIаз щхъаква.  

«ЙздырхитI асквш 1967 агIан зымгIвагьи алагIваласракI гIахIылазцIаз гвыргъьара хабаркI шгIагаз: а-Трыквшта йгIатыцIын сальамшвъакI абаза газет аредактор Джыр ХIамид йызгIайтI, – араса йгIайгвалашвахуан йбергьльу абаза гIвгIвы ЛагIвычв Джьамльадин йгIачважваракI апны ауи агIаншара. – Асальамшвъа абаза бызшва цкьала йгIвын. ХIара ауи джьахIщатI, йшпакIву ухIварыквын йыгIдыруан Трыкв йбзазауа абазаква гIвыра шрымамыз, хIыбызшвала йшзампхьуз».

Асальамшвъа Къвапсыргьан ОрхIан йыхьызта чкIвынкI йымачв ацIан.

Араъа зынла йхIхIвапI абазаква йрыуата асквш 1971 агIан йапхъахауата Трыквшта йцаныс йгьи ОрхIангьи дрылата амхIаджьырква ртынхаква йрынйаныс зынасып йгIанакIыз йара ЛагIвычв Джьамльадин шйакIвыз. Ауи СССР агIвгIвчва р-АдкIылара рщтийыгIвчва гвып дрылата Трыквшта апны дгIамдатI.  

ГIальаматра злата йгвнымгIвыраз ари акIвын: йшпакIву Трыквшта йтабзазуз ачкIвын цхърагIагIвгьи цIагылагьи йымамкIва цри бызшвала гIвыра шийырдырыз, дапхьауа штшибжьаз? ЙшпагIайдыр ауи абаза газет аредакция адресгьи ауи аредактор йыхьызгьи?

Арат азцIгIараква рджьауап сара йгIасауищтара щарда гьцIуам, йгIасазхIвызгьи Къарча-Черкес республика Псыжв кыт абзазагIв Джьардис Владимир йакIвпI. «Сара асквш 1940 Псыжв кыт сгIатадритI, апхьарта амщтахь ауыхвара училища сгIалгатI, сквшквакI сынхан асквш 1964 агIан Къабард-Балкъар къральыгIва университет аинженер-техника факультет сыцIалтI, ауи асквш 1969 сгIалгатI, – йгIайгвалашвахитI Владимир Адыльгьари йпа. – Зны ауаъа, Нальчик апны, сапхьаркIвауата Адыгейшта йауу сыгIвзакI дгIасзыпшгIатI сгIайауын Трыквла чкIвынкI сальамшвъала абазакI дйабадырныс шитахъу йгьи адрес дшахIвауа гIасайхIвтI».

ЙшгIацIцIхызла, къабардыйа чкIвынкI Астомбыль дауата заджвы сальамшвъала дйабадыруан. Ауи ачкIвыни ОрхIани агIвзачван. Абараса, йара Джьардис Владимиргьи йгвы йтадзамкIва, асальамшвъа гIвра ахъа джвыквылтI, ауи Трыквшти Совет Союзи йыртабзазауа абазаква аргванызчIвыз йапхъахауа чIвырхъата йщаквгылтI.

ОрхIан Владимир дгIайыхIвун  ауи йзызгIвырныс зтахъу зымгIвагьи йадрес ритырныс, абаза бызшвала йгIацIцIуа газетгьи книгагьи йзищтиныс. Владимиргьи ауи абаза книгаквакIгьи газет гIацIщтраквакIгьи йзищтитI, аредакция адресгьи аредактор йыхьызгьи йзаницIатI.

Джыр ХIамид йыргвышхван агIвгIвчви ажурналисткви, ЛагIвычв Джьамльадингьи дрылата, щардагIвы ОрхIан йзырыгIвуа йалагатI. Ауи асхъан акIвпI йанырдыр ОрхIан СССР йаъаз Трыквшта рпосольствамцара абаза книгаква шдйыргаз, ауат гIайрысабапуамцара йара-йара хIыбызшвала дапхьауа, дыгIвуа штшибжьаз. Джьардис Владимир йгIважьхаз, дыззсакъуа уыжвгIандзара йынкъвигауа асальамшвъакви асураткви сйырбатI. Араъа зынла закI аццIахра атахъыпI: Джьардис Владимир датшагьи гIвхьызкIла йыпхьитI – Дима йгьи ХIасан. Псыжв кыт апны ащардагIв ДимапI ауи дшырдыруа, ауаса ари ауыс апхъапхъадза йанизийыгIв ОрхIан ХIасанхIва йгIайыгIвуа далагатI. Ауи ахIатырла, асальамшвъаква зымгIва рпынгьи араса тшгIайзынайырхитI: «Уымш бзита, саща ХIасан!», «Спсы йапшу, сынбжьагIв ХIасан!»

Асальамшвъаква уанырпшра уыла йгIацIашвитI ахIарыфква зарбла йаквцIазшва йшгIву (сальамшвъакI апны ОрхIан йгIайгIвытI араса ахIарыфква рыгIвра рыцIа йшйымамайру, арылагьи ахIарыфква йара ауаса йрыгIвныс дахIватI). Ажвипхьадза йапхъанчIви псадгьыл бзибарата йазйыму, йгвы арыла йшаъу гIазырбауа алахIвараквала йырчвыпI. «ХIпсадгьыл йгIатыцIта йгIайыз швъакI збапхьадзагьи адуней сара йсчIвхитI… Спсуа сщтIазарквын, счмазагIвхарыквынгьи ауаса швъакI анызбара закIгьи гьсзыгIанхум… Ауи ахъаз уара псапара ду учпитI…» – араса тшгIайзынайырхитI ауи хIхаквлагIв асквш 1970 май а 26 йгIауищтыз асальамшвъа апны.

Йхъа данаквчважвуз ОрхIан щарда гьйымгIвуазтI: «Сара Астомбыль стабзазитI, юрист факультет сгIалган ужвыгьи журналист факультет сатацIалхтI… ауаъа уахъынла сапхьитI, тшынлагьи адвокатура апны сынхитI». СальамшвъакI апны (асквш 1970 май а 15 йгIайгIвыз) айшыста йтгIачва рунашва гIайрахитI: «Сара сан, саба абгапI. ГIвайщчви ахщакIи сымапI. Айщчваква рпны сара сквтанайпI йгьи сынчIва сквшы 22 салгитI. Сахща сара дсайцIбапI йгьи сквшы 20 дыртапI. Ауаса ауи тахIа дцахьатI. СащахIбагьи унагIва далалахьатI. СащайцIба 17 сквша дыртапI. СащахIба йыхьыз БубапI (трыкв хьзыта йынкъвигитI БурхIан), сащайцIба йыхьыз КъамботпI (йтрыкв хьыз ИльхIанпI). ХIахща лыхьыз ЧимапыквпI (лтрыкв хьыз ХIаджьарпI). Сара санхьызгьи ШорапI. Сангьи сабагьи сайщчваквагьи акыт йтабзазитI. Сахща Анкара къала апны дбзазитI. ХIымхIвгьи дабазапI йгьи ХIапIатIыргIа дрыуапI». ЙащтагIайуата йгIашIипхьадзатI йцри кыт йту аткъвымква зымгIва рыхьызква: «Сара скыт ужвы съану Истанбул (Астомбыль) швабыж йачвыхъарапI, километр 760 аъара рызбжьапI. ХIкыт ахьыз ЛоктпI. ХIкыт унагIва 55 раъара надзитI йгьи арат атдзахьызква аъапI: Гвана, Ажьи, ХIапIатI, Уаз, Напщ, Ныр, Чагва, ХIашвцIа, КIыкI, Латшыш (Лачвыш), Шав (Шау), КIвакIва, КIам, ШвхIамуз, Къаншокъва, Джьандар, Джуджу (Джьджьу), Хвырыгв, Къвапсыргьан, КIьабыча (Тльабыча). ХIкыт йту аугIа зымгIва абаза бызшва бзита йырдыритI…»

Асальамшвъаква рпны ОрхIан рхабарква гIайыгIвуан йкытлагIвчва, йыгIвзачва, зыхьыз бергьыльхаз агIвычIвгIвысква – актёрква, аспортсменква, ауасамцара. Сурат щарда чвахъабагата йгIайщтиуан. Ауат йрылапI адунейла зыхьыз бергьыльхаз абакIгIвы Атан ГIадиль йсуратгьи. Ауи Олимпия Хъвмарраква рджьаз согIат дагIатгагIвыпI (асквш 1952), асквш 1954 агIан йакIвшаз адуней чемпионат апны арызна согIат гIайквнадыргатI, асквш 1956 агIан адунейла дчемпионхатI. «ГIадиль йыбызшвала дабазапI, жвыхвсквша цIитIта Трыквшта апны зымгIва рацкIыс ймчхъу дабакIгIвыпI, ауи ауысла йаргвын заджвгьи дгIайщтиуам», – араса йхъа аладухауата йгIаницIатI ОрхIан асурат ащтахьла.

Къвапсыргьан ОрхIан хIхаквлагIвчва рахIвараквагьи гватра ду рызйыман, зыхьызква йзырыгIвуаз аъахIыльчва рпхыцIа шцаз, йыртынхата аджвырагIв аъазтын йгIаййырдыруан. Йшйылшуз дырзыпшгIатI Къвныжв ХIамид, Ажьи Ильас, МалхIваз ХIамид. Ильас йъахIыльчва дрыуата дгIайаутI Ажьи Ерол йгьи Къарча-Черкес йбзазауа йткъвымлагIвчва драбайырдыртI.

Асуратква датшагьи нархаракIла йгIайрысабапуан: асуратгIвацаква йырхъазхауата асальамшвъаква рызбжа ъагIамдзуз ашвхIаусыгIвала рыцIа магIны зму ажванахъаква ауат йрыквйыгIвуан. Абарауаса сураткI ащтахьла йаницIатI Къымза НихIат йыхьызта чкIвынкI араъа йткъвымлагIвчва дшырзыпшгIауа, рыжвлала йшщхъарауугьи йрытамамуата.

ОрхIан абаза книга шIыцта йгIацIцIуаз гIаййырдыруан, Владимир дгIайыхIвун йзищтиныс, рыхьызквагьи  гIашIипхьадзун: «НартыргIа Сосрыкъви Сосранпи», азкIкIраква «Шахв», «Насып», «Анурква», ТхIайцIыхв Бемырза йроман «Нышв напIыкI». ДахIвун йзырщтиныс йуысакви йгIвыракви гIазквшваз агазет гIацIщтраква. Датша сальамшвъакI апны (асквш 1970 февраль а 1 йгIайгIвыз) йзырщтиныс дахIватI арат апхьагаква: «ХIарыфба», «Цри литература 7-8 аклассква рыхъаз хрестоматия», «Цри литература 9-10 аклассква рыхъаз хрестоматия», «Абаза бызшва аграмматика 5-6 аклассква рыхъаз апхьага». «Саща, арат акнигаква схъагIваца ахъаз йгьстахъым. Ауат араъа йаъу уайшчваква, уахщчваква рхъвы алапI, ауат араъа йаъу абазаква зымгIва аргвыргъьуштI…» – йгIацицIахтI ауи йахIвара ацIахьла.  

Сальамшвъипхьадза апны ОрхIан йгвы цIикIгIауа йгIайыгIвуан Трыквшта йтабзазауа абазаква щардагIвы цри бызшвала йапхьауа, йгIвуа тшырбжьарныс швабыж йшыртахъу: «…ХIыбызшвала хIыгIвныс, хIапхьаныс йгьи хIыбызшвала апхьарта хъхIтIныс хIгьахвитым.

Араъа йаъу хIугIа ррыцхIара усырдырра йгьи йусырбара ахъаз акIвпI йзансцIауа… хIыбызшвала хIыгIвныс хIгьахвитым… Сара хIыбызшвала сапхьитI, сгIвитI, ауаса сайщчва йгьи сахщчва рыцхIаква… Ауат рыбызшвала апхьара, гIвра гьыртахъымма? ЙыртахъыпI, йыртахъыпI, уалей йшашIпссгIауа… ЗымгIвагьи рпсы штыцIуа!..»

Араъа йгIахIгвалахIыршвахпI асквш 1971 агIан ОрхIан дыркIыта ахIапса мчбыжьпхьадзара шигаз. ДаныркIы Совет Союз рпосольства абиблиотека апны йгIайахвыз акнига (ауи ауниверситет йгIайыртыз ахачIвы ахъазла йтахъын) йымата дангIашIадрыс амщтахь акIвпI, уадыргIвана йунагIва йцан йпшгIатI, абаза газетквагьи арыла йтыцIта, йызцата йымаз асальамшвъаквагьи зымгIва гIарауын йыквырхтI. Акъраль хабзаква йырпшIагылуа уыскIгьи дшаламыз анщаквдыргыл амщтахь акIвпI дандырхвитх.

Къвапсыргьан ОрхIан ауи амщтахьгьи дгьамайчуазтI – йаргьи дапхьун, йыгIвзачвагьи цри абаза бызшвала йгIвуа, йапхьауа йбжьун, анылагьи арылагьи зъахIыльчва йырзыпшгIауа дырцхърагIун, радресква гIайщтиуан, знархарала йапшым адырраква адикIылуан.

…Асквшква цатI. «Перестройка» – хIва йзпхьуз агIамта гIаталтI. ОрхIангьи пхьынцIыгIва гIайшIалызшва Абазашта «дгIапссгIатI» – ауи дрылата акытква рпны, абаза газет аредакция апны анйара пхаква акIвшатI, йъахIыльчва дрынйатI, гвыргъьарали гвапарали дгIакIвдыршатI.

Ужвы акалендар йгIанарбитI асквш 2017… Йныбыжьла атшпсщара сквшква дыртагылызтынгьи ОрхIан дгьайчуам, гIапсара йымдыруата ажвлара уысква дрылапI, абазакви абаза кыткви йгIарыквчважвауа агIвыра цIолаква адигалтI – Трыквшта йту йырхъазымкIва Абазашта акытква зымгIва йызнымкIва дгIарыкIвшатI, Абазактгьи Кълычктгьи рылата, Адыгейшти Къабард-Балкъаршти рпны апхъала абаза кытта йырпхьадзуз рпны даъан. Джьгарта далапI ажурналист нхарагьи, асайт «www.abhazhaber.com» йадынхалуа агвып дрыуазаджвыпI.

ЙухIвушта йаъума й-80-хауа асквшква рквта йакIвшаз Къвапсыргьан ОрхIани Джьардис Владимири йапхъахауа ранйара лахIвара пхала йшырчвыз?! Дара агIвыджьгьи ауи аъарала йъасапIта, ахъардура ауи аъарала йачвыхъарапIта йрыларымхIварныс ауаштI йбаргвыз й-60-хуз асквшква рагIан ауат йацатырпыз ачIвырхъа амагIны дудздза… Ауаса абаза уагIа жвлара рыхъазла кьангьашткъвымкIгьи аламкIва йгвынгIвырапI ауи ачIвырхъа хвыц хъацIара ду шалагIадырбаз.

 

Асуратква Джьардис Владимир (ХIасан) йхъатачIв архив йгIалхпI:

 

(Йхъаду асурат) Къвапсыргьан ОрхIан данстудентыз;

Джьардис Владимир (ХIасан) данстудентыз;

Атан ГIадиль – адуней чемпион;

«ХIгвы, хIпсы йгIатыцIуата сальам пха нахIтйитI». Армала йгIашIарышвта: (йгылапI) Йенемыкъва НихIи Батури, Къвапсыргьан ОрхIан, Мерзей ТурхIан, Къымза НихIат, Ажьи Ерол; (йчIвапI) ХIатIам Недждет, Ногъай ТурхIан;

ОрхIан йсальамшвъаква… АзакIы архъвыхыгIвчва рыщта шгIаквыржьыз апшта йгIанхатI.