Международное объединение содействия развитию абазино-абхазского этноса «Алашара»

ЙагIвсыз азаман акъару

Притяжение прошлого

Черкесск, агIвырагIацIщтырта Тдзы апны Этлыхв Олег йроман шIыц «Йуыхъуа акъару» апрезентация акIвшатI. Ауи Москва йгIацIцIтI, йгIазквчважвауа йагIвсыз асквшышв ахъа Россия йгьи Апсны рпны йакIвшуз агIаншараква ракIвпI. ЙцIыхъвахауа ахсквша руацIа зыхьыз дута йзыргаз агIвгIвы йпны ари акнига пщбахитI. Йапхъахауа – «Аща азшIытра» – асквш 2003 агIан йгIацIцIтI, ауи ашвъаква йгIархъыхта йаныргIалпI йгьи асквшква 1992-1993 агIан йакIвшуз Апсны Абашта айсра агIаншараква йгIарыквчважвитI. ЙащтагIайуата Олег Адыль-Гьари йпа агвацчпа литература тшазынайырхан ауищтара ансисквша романкI гIацIищтитI: асквш 2016 агIан – «Апхартшахъва йану ащтаква», асквш 2017 агIан – «Каир ахъахьла айачIваква», йгьи абар ужвы – аэпика гIвыра шIыц. ЙцIыхъвахауа акнига «Невский Александр» йыхьызла йщаквгылу Россия атурых-литература согIат йанархару анкъвакъвра йалапI.

Арат ахроманкIгьи алитература жвлара ргватра ду азынархапI. Агазетква «Алитература амш» йгьи «Алитература газет» рнапаква йгIарыквшватI «Каир ахъахьла айачIваква» йгьи «Йуыхъуа акъару» йгIарыквчважвауа йауацIыху арецензияква. Ауат дыравторпI ауысагIв, апрозагIвгIвы, ацIбацIбагIв, атакIыгIв, Россия агIвгIвчва р-АдкIылара аунашвахъцIарта асекретар Переяслов Николай Владимир йпа. Йазалху ргIвыраква рпны Этлыхв Олег йроманква йгIарыквчважватI пIатIу зкву аъачIвагIагIвчва – ацIбацIбагIв-литературадырыгIв, афилология наукаква рдоктор, апрофессор, Анаукаква р-Дуней адгьа академия академик Бекьыз Лейла Абубакьыр йпхIа, РФ агIвгIвчва р-АдкIылара йалу, атехника наукаква рдоктор, апрофессор Тахтамышев Хзыр МахIмуд йпа, Къарча-Черкес Республика ауагIа уысагIв, Къарча-Черкес Республикала Россия агIвгIвчва р-АдкIылара ашIыпIа хъвшара алитература кьангьашагIв Щбзыхва Лариса Къвырнамби йпхIа.

Зынла йхIвара атахъыпI йапхъахауа агIвкнигакI корректура рымамкIва йшгIацIцIыз, йгвы цхIауата ауи даквчважватI Переяслов Владимир. АгIацIщтраква ари рхъата лгватра азыналырхатI Щбзыхва Ларисагьи: «Автор абызшва йгьи агвацчпара амальква ртшауацIыхра цIолата дадынхалра атахъыпI». Ауаса агIвыраква рпны аъачIвагIагIвчва зымгIва йрапхъата йдырхъвыхауа ауат гIазквчважвауа, хъвыцрата, акъыль ныршарата йрылу акIвпI.

«Акнига «Апхартшахъва йану ащтаква» ахъаз тшалаупщауата угьзапхьум, – йхIвитI Тахтамышев Хзыр. – Ауи агIвыра бзазара хъата щарда зму ахъвыцра цIолаквала йчвыпI йгьи апхьагIв щарда цIуата йщаквгылхьу, йгвынгIвыру абзазара цIасква шIыц-шIыц дрызхъвыцхырныс даквгIазшIнатитI».

Гончаров И.А. йыхьыз зыргаз йроман заджвыкI «Обломов» швапхата йгIайгуата Тахтамышев Хзыр йрыбагъьитI: «Гончаров йапшта Этлыхв Олеггьи йынхара цIолу йроман «Апхартшахъва йану ащтаква» мгIва рейша йзыщтIанацIитI Россия алитература аклассикква йрызцауата».

Алитература жвлара лахIвара ду рзыгIанарыцIстI акнига «Каир ахъахьла айачIваква». Переяслов Николай йшихIвауала, «ароман йгIащаквнаргылхитI зыхьыз бергьльу агIвычIвгIвыс, акъраль унашвахъцIагIв, айсыгIв, аполитика уысхагIв Али-Бей Ду йбзазара. Ауи йщала дапсыуапI, асквш 1768 агIан Осман паштахIыгIва рмахъарыхъвара йацIаз Египет гIайырхвитхтI, асквш 1770 агIан ачIахIныгIва хьзы Египет асултIан данкъвгагIвхатI». Йбергьльу алитература цIбацIбагIв хъата щардала дадгылуамцара агIвыра йырхъвыхитI йгьи йшипхьадзауала, ауи «айсыгIв йпха, абашта йанархару абзибара рынкъвгара йырарыпхьагапI», «ауагIа уасаражвра йгьи ажважвква йразкIкIрапI». Ауи йгIаликIгIитI агIвыра апны «апхъанчIвиква руасаражвра нахвата йгIазырбауа ажванахъаква шмачIым».  

Переяслов Николай «Каир ахъахьла айачIваква» «ауагIа рылахь, асквшызкьква йрылалуа ркультура, йалкIгIата ракъыль ныршара ду, шIырпшыра змам ръадаб гIазырбауа» агIвыра дуква йрылайпхьадзитI йгьи арат агIвыраква рсатыр йалайцIитI: Толстой Лев йроман «Айсра йгьи амамырра», Шолохов Михаил йроман «ЙщаквкIу а-Дон», Толстой Алексей йроман «АгIазаб джыпха йтагылу абзазара», Симонов Константин йроман «Абзачви апсчви».

АгIвычIвгIвыс й-Абашта йазйыму абзибара цIола йанархара хъадата йылпхьадзитI Щбзыхва Лариса ароман «Каир ахъахьла айачIваква». «Этлыхв Олег йроман йапхьаз дзачIвызлакIгьи цIолата йылайхIвуштI Абазара (Апсуара) нкъвызгауа ауагIа ркъаруи руасаражври, – лхIвитI ауи. – АуагIа ракъыль ныршара мчы нахвата йрылубгIитI з-Псадгьыл йакъвыцIхыз ачкIвынгьи, агIвыма хакв йгIатадрита ауи ацIасквала йгIадзынгылыз абанпарагьи». 

«Каир ахъахьла айачIваква» хцIара зму гIаншарата йылпхьадзитI ари ауысагIв абаза литература апынгьи Россия алитература апынгьи. «Ауи апш эпика гIвыра ду агIаншара збзирата йпхьадза йауаш ари акIвпI: йзачIв заманызлакIгьи йара йаквыргIапсу, ршIыйара мчы злу акъару гIазхъшахъыцIуа агIвгIвы дгIаннаршитI», – лхIвитI ауи. 

«Абзазара амагIны йазхъвыцуа дзачIв гIвычIвгIвысызлакIгьи йаргванпI автор ауи ауысла йхъвыцраква. ХIыззбзазауа ачIвыйа? ХIабацауа? ЙачIвыйа йхIызпшуа хъагьи цIхъвагьи змамызшва йыгIбауа ари амгIва ацIыхъва? АгIвыра апхьагIв йхъвыцраква рпны йгIацIсуа абари акъыльпшгIара акIвпI ауи адунейла йбергьльу аклассика гIвыраква рсатыр йызлалапхьадзахауа», – араса йылгIвитI акнига ахъазла Бекьыз Лейла. Ауи йшылпхьадзауала, «ари апш хIагIара зму агIвырала Этлыхв Олег квпшыра шIыц зму турыхдырра роман гIанйыршитI йгьи йцIыхъвахауа азаман Россия апны йгIацIцIыз ароманква рквтала ароман «Каир ахъахьла айачIваква» йаквнагу агыларта хIагIа амазлуштI». 

Этлыхв Олег йгIвыра шIыц Лагъь КIавкIаз апны граждан айсра ацIыхъва йаквшваз агIаншараква йгIарыквчважвитI. Ауаса Переяслов Николай йшихIвауала, ароман гIазквчважвауа амакIыра гьакIвым – йзахвуи, йзахвами – «акъапщква» ракIвма момкIва «ашкIвокIваква» ракIвма. «АгIвычIвгIвыс намыс нкъвигарныс, ауи гIайхчарныс акIвпI ароман апны йхъаду, – араса йгIвитI ауи ароман дгIаквчважвауата («Убзазара ацкIыс уынамыс рыцIа йхъадапI», «ЛГ», № 19, асквш 2018 май а 16). – АгIвычIвгIвыс йынамыс амагIны КIавкIаз апны ауралагьи йдууын, асабиква ргIадзныргылра апны ауи гватра ду азырбун, агIвычIвгIвыс нцIрата йыму ауи дазсакъхауа йынкъвигун, йшпакIву ухIварыквын ауи йпха йхъихызтын дызуу аткъвымгьи пхащарата йырзалуан». 

Алитература цIбацIбагIв Шолохов Михаили Этлыхв Олеги рроманква ашIйырпшуата дрылачважватI: «Ароман «Йуыхъуа акъару» атеми Шолохов йроман «ЙщаквкIу а-Дон» атеми злаквшвауа гьмачIым: агIвбагьи Россия агIвадахь шIыпIа астаницаква рпны совет власт шщаквгылуаз, ауи йапшIагылуаз йшрабакIуаз йгIаквчважвитI». Йгьи ари апш хIисап йчпитI: «Этлыхв Олег йкнига «Йуыхъуа акъару» ззынарху абазакви апсуакви йгьырхъазым, ауи апхъала СССР ачIвылаква йырбзазагIвчваз зымгIвагьи йхIзынархапI, йшпакIву ухIварыквын уыжв азаман щардагIвы рцIасквагьи рыбызшвагьи рхъаштылхитI, рчважващагьи рлитературагьи гIвыма ажвала йаладырпIатIитI, йгIаншитI рцри алфавит йгIвыму латин алфавитла йанырпсахуагьи. Ароман ахьызгьи йгIаныцIуа ари акIвпI: агIвычIвгIвыс йщала йыхъуа йцри хакв, йыбызшва, йуагIахъа культура тшрыдикIылра шатахъу».  

Ароман «Йуыхъуа акъару» апрезентация апны йгIачважваз зымгIвагьи йгIалыркIгIатI алитература жвлара йгьи Россия ахабарргагаква ари апш гIальаматра анрызрымазара Этлыхв Олег йгIвыраква рмагIны шдуу, йшпакIву ухIварыквын ауи апш гватра ззалырхуа агIвыра шIыцква гьщардам. Ареспублика газетква рредактор хъадаква Къвыл Фардауыс, Кратов Евгений, Уазден Альберт, Атуова Алтынай агIвгIвы йыршIыйара рыцIагьи тшауацIнахырныс йзыртахъта йайхIвахIвтI.  

Йара Олег Адыль-Гьари йпа йшихIвазла, атурых йшаъадзаз апшта йгIайырбарныс йтахъын. «Ауи шгIасдахIвыз апхьагIвчва йдырхъвыххыргIатI», – йгIацицIахтI ауи йгьи анйара адгалагIвчва дшырзыразу йхIватI.