International Association for Assistance to the Abaza-Abkhazian ethnos «Alashara»

Абыжьбатәи Жәларбжьаратәи аҧсуа-абаза жәлар рконгресс аҟны. Аҩбатәи амш.

На VII Конгрессе МАААН. День второй

Абыжьбатәи Адунеизегьтәи аҧсуа-абаза жәлар рконгресс аҩбатәи амш азы ихҭыс хаданы иҟалеит анапхгара ралхра.

Аизара ду аан иҧсахын Адунеизегьтәи аҧсуа-абаза жәлар конгресс аҧҟаҧҵа, иаҧыхын аконгресс ахада имаҵура, иаҧҵан Иреиҳаӡоу ахеилак. Аконгресс амаӡаныҟәгаҩ хада имаҵура иахьӡхоит  «Анагӡаратә маӡаныҟәгаҩ».

Адунеизегьтәи Аҧсуа-абаза жәлар рконгресс Ассоциациа Иреиҳаӡоу Ахеилак ахантәаҩыс еицҿакны далхын Мусса Екзеков – еицырдыруа абизнесуаҩ, аҵарауаҩ, ауаажәларратә усзуҩы, Жәларбжьаратәи аидҵа «Алашара» ахада, абазатә уаажәларратә еиҿкаарақәа рассоциациа «Аҧсадгьыл» ахантәаҩы.

Ари, Ассоциациа аҧҵоижьҭеи ҩажәи хәба шықәса рыҩныҵҟа анапхгаратә еилазаараҿы раҧхьатәи алхроуп. Аҧсуа-абаза жәлар рконгресс ҧасатәи ахантәаҩы Тарас Шамба дҟалоит аиҿкаара ҳаҭыр зқәу ахадас.

Анагӡаратә маӡаныҟәгаҩыс далхын Инар Гыцба.

Инар Гыцба диит Тҟәарчал ақалақь аҿы, 2002 шықәсазы далгеит Гагратәи «Башаран -коллеџь»,  2007 шықәсазы – Гданьтәи Аҳәынҭқарратә университет (Польша), афакультет «Политологиа»,  «Жәларбжьаратәи аизыҟазаашьа» азанааҭ ала.

 «Сара агәра згоит, иҿаҧхьа иқәгылоу аҳасабтәқәа уахгьы-ҽынгьы аус шрыдиуло, ажәалагала ҟасҵоит иара икандидатура шәадгыларц», - иҳәеит Ассоциациа Иреиҳаӡоу Ахеилак ахантәаҩыс  иалхыз Мусса Екзеков.  158-ҩык аделегатцәа ари ажәалагала иадгылеит.