Международное объединение содействия развитию абазино-абхазского этноса «Алашара»

«Ласылас сышвхъшвраштылх…»

Забывайте меня скорее…


Сансабийыз йгIашIарышвта сгвы йгIатахатI пшдзачкIвынта йамгваз асальамшвъаква зтаз санду лшвындыкъвара чкIвын. Ауи лпещ днашылуанта асальамшвъаква ауырата йахъылрышвтуан. Ауи агIан сара йгьгIсгвнымгIвуазтI санду ауат хвду шырзылбуз, уадыргIвана йыздырхтI асальамшвъаква асквш 1937 агIан арепрессияква йрылашваз сабаду Ахба Шварах данкIыз асхъан Омск, Томск, ЦIахь Тагил, Новосибирск къалаква рпны даъата йшгIайыгIвыз.

Асквш 1947 агIан ауи дгIауырщтхтI, ауаса Апсны апны дбзазарныс хвитнагIа гьгIайырымттI. Жвасквша анахъыцI ауи тшпсщара мзы гIайырттI йтгIачва йбарныс дахвитта. Араъа рхъазы йгIанхата йтан йхвыгIв сабичва, йан, йхъапщыла. Ауи даныркIы йпайцIба хысквша ахIа дгьыртамызтI. Рпны дангIайх йатаркIвах даквшахIатхатI йтгIачва швабыж йшгIапсуз, цIагылата дырзалырныс ахъазла араъа дкъватI.

Шварах йан лпачваква жвасквша дрызпшытI, ауат рыуа заджвзаджвыкI дангIахъынхIвых – ауыгьи пIатлала – айцIба Бирам йхабаркIгьи гьаъамызтI, щардала йылхIвауа далагатI: «Сгвы гIвчIвымыгъкI алагылан, азакIы ангIалырх арахьари хьыгIата йгIахъшахъыцIуаз гIванла йалахIатI», – хIва. ЛпайцIба дшабгахым ангIалгвынгIвы дымчахуа, дымыжвхуа дчмазагIвхан мышквакI анахъыцI лпсы тыцIтI. Шварах ауи лпсхъа найдастI, ауаса аджьабара амщтахь щарда йунагIва дгьзаъамызлахтI. Ауи йатаркIвах дтыргатI «ауагIа рагъа» йхъырхIвалгIан, ари азын Красноярск шта, Абанск район дыргатI, йаргьи дабгата дгьгIацампахтI.

Асквш 1951 агIан ауи дчмазагIв хIатлахатI. Йхъапщыли йгIарикви йрылшузла йцхърагIун: ахча, хъвшвы, фачIвы рщтиуан. Ауаса азгIва айгIайтI. Йуыс рыцIа-рыцIа йайчвахун. Абар ауи дъакIыз йыгIвзаз Чхаидзе Д. йгIайыгIвуаз: «Швъасрынашхыйауа сайгIваджьхитI. Шваба швабыж дхIатлапI, бзигвыгъакIгьи гьаъам… Сара сынбжьагIвра кърар кьангьаш азгIажвымгын, схъвдаквцIара сырхъйуштI абари ауыс хьанта апынгьи. Швбагъьаха… швгвы ззымгIвауа кIара гIаншузтын швазыхIазырызтI. ШвтгIачва квырмыш рзысчпитI. Давид».

Сабаду йцIыхъвахауата йгIайщтийыз агIвсальамшвъакI апсра тшазадигалуата йгIайгIвытI. АтгIачва ръизинла йадызгалтI ари агIвырагьи сабаду йсальамшвъаква гIасрысабапуата. АсальамшвъакI апны йтгIачва тшгIарзынайырхауата ауи араса йгIайгIвитI: «Бзила, йтлапIу ссабиква, схъапщыла, стаца, бзи сызбауа айщчва, аъахIыльчва зымгIва. Абар хымызкI цIитIта сахвран згIвала счмазагIвыпI, ауаса Анчва йымхIватI… Сара щарда цIуата йщаквсыргылтI абзазара салцIхырныс, ауаса сгвыгъун хIпныла ахъвшв гIасадзарныс, ауаса ага йгвасразтынгьи йгьгIасмадзатI. Жвипщсквша цIитIта льажьата йсыму зымдыруата гIазаб сацIапI, шваргьи швсрыгIапситI. ЙнахъапI, йгьстахъыхым ауи ахIа гIазаб счхIарныс, сара сыхъазла швымджьабан йгьи швымчIвыуын, швара щарда цIуата сышвчIвыухьатI. Хатымгьи гьатахъым, йнахъапI йсзышвхахьу акъом. ЙцIыхъвахауата зымгIва багъьата ба швасхIвитI. Бзита швбзаза. Сара ансагьи арсагьи спсра атахъыпI, ласылас сышвхъшвраштылх. Бзила, йтлапIу сунагIва, стгIачва, с-Апсны, бзила. Шварах. Асквш 1951 июль а 8. Сара спсхъа нардасуаштI Чхаидзе Давиди анахьанат агIвычIвгIвыс бзикви». Асальамшва ацIыхъва йаквыгIвпI «спны йшвщтих» – хIва. ДабгаркIвата ахъвшв йзынадзатI, ауаса ауи закIылагьи йгьгIайымтахъхатI. Ауи згIвата йыквыз йыгьсохвранмызтI, ъазагIва змам згIвачвгьан. 

ЙцIыхъвахауата йгIвыз йгIвбахауа асальамшвъа йыгIвзачва Чхаидзе Д. йгьи Маркосян С. йырзынархан: «ПIатIу ду зквсцIауа Чхаидзе Д.Н. йгьи Маркосян С.С., йсызшвыргIва ацIыхъвадза съашвзымдзыргIвыз, швара швъизиндаъа сышвкъвыцIхитI, ауи акIвымзара йгьсзыжвуашым. Апсны апны сгьдмырбзазатI, Сбыр апны сгIариква рыхъвда схъата сбзазарныс гьстахъым. СышвзыразпI швъагIасцхърагIуз ахъазла, сгIашвхчарныс ъашвтахъыз ахъазла…» ЙащтагIайуата ауи дахIвитI йгьи суратла йгIайырбитI йпсхъа шаныргIалра атахъу абыгIвква гIамта айшысла тшдрыцкьарныс ахъазла. Йдыруан йкъва-йсгIарыгьи йпачва ауаъа йцата йнышвынтара шгIатдрыпахуашыз.

Абараса йцIыхъвахауата йтгIачви йыгIвзачви тшгIарзынайырхатI. Дпсыта дангIарау асальамшвъаква уыла йшгIацIашвуш апшта йщтIан.

Асквш 1955 агIан йаба йнышвынтара гIатирыпахырныс ъизин йымамкIва сара саба ауи йнышвынтара ъащтIаз дцатI. Ауи бзигвыгъата йыман йаба йуасйат йзырхъйушта – йбыгIвшыгIвква Апсны йгIайгхта адгьыл йайтхырныс. АгIвагвана баргвын йгьи йауыран: апхъапхъа Красноярскдза дцатI, ауаъа дтыцIхын километр 600 зуру айха мгIвала Канск къала днадзатI, уадыргIвана машинала Абанск район йаланакIуа Вороьбёвка кытдза дымгIвайстI. Акыт абзазагIвчва дрынйатI, йаба дыздырквуз гIайаутI, анышвынтара йдырбатI. Ауаъа йгIатиган йыцгIайгтI хъадаса хIисапта гъвгьи, нышв напIыкIгьи (йъахIльы Аргвын Маматал йахIварала), рхъа хIврапшдза щайдзаквакIгьи. Анышв йани йаби, йабадуи рнышвынтараква йрыквырпсатI, ахIврапшдзаквагьи ларцIатI.

Анышвынтара агIатрыпара ауысла ъизин швъа ангIарырт асквш 1961 агIан акIвпI. Саба Ахба Владимири йащайцIба Ахба Леви аццан гIапсара ду рчва йтшазтынгьи раба йбыгIвшыгIвква гIаргхтI. ХIтгIачва швабыж пхата ргвы йгIатахаз Лакоба Шамиль Николай йпа йахIварала швабыж дгIарцхърагIатI Абанск район апрокуроргьи.

ХIабаду йнышвынтара йани йаби рнышвынтараква рыдзхъа йандыргIалхтI, йара дшахIваз апшта. Ауи йхIапчыпква йрыла шварацра швокькIгьи гIаргхтI араса йаныта: «Спачвакви ауат ргIарикви рыхъазла. АцIабырг ауыс шхъахьхуш йазхъасцIитI».

Чхаидзе Давид дгIахвитхахьата анышвынтара шатдрыпахыз ахабар анидыр Шварах йпачваква сальамшвъа рзыгIайщтитI: «Абараса ауарба йапшу апсыуаква – Шварах йпачваква – ракIвпI ари апш уыс ззахъвдаквыцIуа - раба йбыгIвшыгIвква гIатдрыпахырныс. Ауат Апсны йапачва цIабыргыпI, сара швабыж сайгвыргъьитI сынбжьагIв йгвала ъахъйаз – йыбыгIвква йцришта апны чIвылахъв ъарауыз…» 

Санду Таня мшигIадза йакIвшуз ахабза мыгIвхъгараква йанырзаманыз ахабарква анылхIвахуаз ауралагьи арат ажваквала лгIагвалашвахра цIыхъва алтуан: «Ауи апш рыцхIагIа зынгьи заджвгьи йчва йтымшахыргIатI».