Международное объединение содействия развитию абазино-абхазского этноса «Алашара»

Йапхъахуз археолог йюбилей

Юбилей первого археолога


Апсны къральыгIва музей апны йапхъахауа апсуа археолог Трапш Михаил Мамет йпа йхъыцIуа асквш 100 ахьызла «айшва гьажьы» акIвшатI. Апхьахьаква ранйара адыргалтI апхъанчIвидза замани асквшышв квтакви ртурых знархару ахъвшара анхагIвчва. Апсуа археология атшауацIыхра апны апхьахьа ду йынхара магIныта йамаз йалачважватI акультура йгьи атурыхдырра-культура тынха руысла Апсны республика аминистр йтарагылагIв Бгажба О.Х., Цвинария И.И., Сангулия Г.А., Капба Т.О., атурыхдырыгIвчва Нюшков В.А., Аджинджал Е.К., афилолог Агрба В.Б., азъазарархъвыхыгIв Сакания С.М.

ЙгIачважваз апхьахьаква йгIалыркIгIатI Трапш Михаил Диоскурия, Гуадиху, Маяк Къапщы, Согъвым быхъв рсинква цIолата йанйырхъвых амщтахь Апсны апны акъалаква ангIанымшасыз апхъазаман араъа йбзазуз атачIв уагIа ракIвта йширыбагъьаз. ЙалкIгIата ауи йакIвпI йапхъахауата йхъатазкIыз йгьи  йызрыбагъьарныс йащтаз атурых апны аджьази айхи рзаман йачIву асинква ртшауацIыхра йшIымчIвауата йащтацауа йшгIамгIвайсыз. Араъа Трапш Михаил шахIатта йгIайырбуз Лыхны, Очамчыра, Гал штаква рпны йгIарауыз апхъанчIви гврахIа щтацIартаква ракIвпI. Ауи акIвымкIвагьи Трапш Михаил йара йхъатала Апсны адзыцIахь археология ахъа джвыквицIатI. Ауи Шервашидзе Леогьи, Пачулия Вианоргьи, Соловьёв Левгьи йыцта Согъвым ацхърагIара-хчара станция аунашвачпагIв Скасырский В.И. йпны адзыцIахь нхара тшазырбжьатI, йаргьи ауи бжьагIвыта, кьангьашагIвта дырзалуан адзыцIахь рхъвыхраква анакIвдыршуз агIан. УадыргIвана йтеория дырраква йрылайырхIарныс, ауат ргIарысабапрала анхара рыцIа дазъазахарныс ахъазла йбергьльу археолог, атурыхдырыгIв, адоктор Блаватский В.Д. дзыцIахь рхъвыхра ауысла йгIанйыршаз апхьарта апны дцатI. Араъа ауи апсуа археология апны нархарата йкIыз ауысла йдырракви йылшаракви йрылайырхIатI.

Ауи унашва зхъицIуз агвып йаргьи дрылата Басла дзыгIв амшын йъалачIвауа ашIыпIа апны адзыцIахь ацIолараква рпны магIны ду змаз архъвыхра нхараква акIвдыршатI. «Диоскурий» ресторан, «Эльбрус» кафе раргванква, «Маяк Къапщы» асинква рпахьла адзыцIахь апны ауыхвараква гIараутI. Арат анхара гIарбараква Апсны амшынтшп шIыпIа йалачпу архъвыхра уыс швабыж йдырбайатI. 

Академик Бгажба Олег йгIачважвара апны йгIаликIгIатI сквшы 49 даныртаз Трапш Михаил АпхъанчIви Согъвым йгьи Цебельда асинква ртурыхла гIвдоктор диссертациякI ширыхIазырхьаз, йгьи ауи йынхараква хвтомкI йнадзауата йшгIацIырщтуаш. 

Трапш М.М. Абашта айсру Ду далан, «АхъацIара ахъазла» медаль гIайквнадыргатI.

Апхьахьа йысквш 100 йадахIвуата Апсны къральыгIва музей апхъанчIвидза замани асквшышв квтакви ртурых знархару ахъвшара анхагIвчва гIарбарта адыргалтI. Ауаъа йаъазлуштI апхъала зынгьи йгIадмырбас апкъыгIвакви йара йхъатачIв хIапчыпкви.