Международное объединение содействия развитию абазино-абхазского этноса «Алашара»

«Ари хъацIауачвапI!»

"Это был шок!"


АъахIыльчва Чква Рамазан йтынхаква гIараухтI 

 

Йара Чква Рамазан адуней дшыкву аткъвымлагIвчва йанырдыр Адуней адкIылара «Алашара» йдрыхIазырыз акнига «Абазашта афырква рхъацIара» ангIацIцI амщтахь акIвпI. Акнига апны айшыста йгIарбапI ауи Абашта айсра Ду дшалаз, пшцIасракI апны фыррата йгIайырбаз ахъазла амедаль «АхъацIара ахъазла» шгIайквнадыргаз. Йаба йыхьызла йщаквдыргылтI Рамазан й-30-хауа асквшква рагIан совет власть йъапшIагылыз ахъазла йтыргаз Чква МутIальиб дшипу. МутIальиб йайщчвагьи йыцтыргатI. Рамазан 12 сквша рахIа йхъымцIуата айыбагIзарта дырган ауи амщтахь заджвгьи йхабар гьйымгIахтI. Ауи адырраква ангIапшцIига амщтахь Дагъстан нхара дырщтитI. Ауаъа акомосомол ъанатIаква нкъвигатI, «Кизляр ацIабырг» газет аредакция апны дынхатI, Абашта айсра Ду агIан айсра корреспондентта дпшцIан, асквш 1968 амщтахь арра къвырльыкъв йхатI, Одесса апынгьи, Дрезден апынгьи (Германия апны йаныргIалыз совет рхъвы дрылата – аредакция ррытаразга), Симферополь апынгьи афицар тыдзква друнашвачпагIвын, айсыгIв чын подполковник дазынадзатI.   

РыцIа йауацIыхта Чква Рамазан йунашва гIаншвалтI акнига «Айсра апхъали айсра агIани абаза интеллигенция рылахь шцаз: архив швъаква рыщтала». Ари акнигагьи «Алашара» адкIылара йгIацIырщттI. Аткъвым ртурых йадынхалуа Чква Нурби йткъвымлагIв йыщта Кизляр район апны дазыпшгIазтIхIва йгьгIайдамыхIвтI. Зны ЧкваргIа рткъвым айззара акIвшауата Чква Виктор интернетла Чква Юра Рамазан йпа йыхьызта заджвы дшйабадырыз далачважватI. АъахIыльчва ауи ахабар нкъвырцауа йалаган йгIаддырдыртI ачкIвын Чква Рамазан дшипу. Юра Татьяна лыхьызта ахщакI дйымапI, раба асквш 1990 агIан адуней йхIваджьтI. Ауи данабгаз йгIарайхIвын йырдыритI ЙынджьыгьчкIвын кыт йшауу, ауаса зынгьи ауаъа йгьаъамызтI.

Юри Татьяни ран Яковлева Анна Дмитрий йпхIа Тула область дауан. Айсра агIан лныбыжь гIвысквшала йалалырхIан афронт дпшцIалтI. СМЕРШ апны къвырльыкъв лхун. Чква Рамазани лари айсра ацIыхъва йабадыртI. АтгIачва йазыркIкIыз асуратква агIвыджь рхъазы йаныта закI рылапI, ауи ащтахь араса йаныпI: «Сарата кыт, асквш 1946».

СынчIва июнь мыз ахъа ЧкваргIа МухIарби Симферополь дцан Рамазан йтынхаква дрынйатI. Ауи акыт йтигатI нышв напIыкI йыцнайахвын ауи апи апхIи раба йнышвынтара йаквырпсатI. МухIарби согIата Юри Татьяни йриттI акнига «Айсра апхъали айсра агIани абаза интеллигенция рылахь шцаз: архив швъаква рыщтала».

– ШIала йгьузыхIвушым Симферополь санца йшгIасайгвыргъьаз, – йхIватI Чква МухIарби Кърым дцата дангIацапах. – Юра дашIамсуата йани, йаби, ртгIачви рхабарква гIасайхIвуан, Таня агвыргъьара йгIалылхын лыладзква гьылзымкIуазтI.

Чква Юра сквшы 66 йхъыцIитI, пенсия даъапI, ауаса йщапIква йыхьызтIхIва уысдъа дгьчIвам – адзы ацIахь йызлацIалуа атехника дадынхалитI, ахъвыхIква адзы йшхъумцара йгIарыквылуа агIайыраква злакIных йауаш аъамапсыма гIайхъвыцтI. ЙхIаракIу йдырраквала инженер-электрик ъачIвагIа йымапI. «Черноморнефтегаз» апны дынхун, ауаъа агазцагаква, ахъахьыла йымгIвайсуазгьи адзыцIахьла йымгIвайсуазгьи, ргIахчара дахъпшылуан. Ауи асхъан амшын гIальаматра азибатI дгидронавтхан й-80-хауа асквшква рпны йгIашIарышвта адзыцIахь аппаратквала дынхун. 

Татьяна Юра пщысквшала дйахIбапI, нцIрата йлымаз инженер уыхвагIвта дынхатI, пенсия данца амщтахь ауагIа цхърагIара рзыгIанзыршауа анхарта далагатI.

РъахIыльчва шIыцква йанрылачважвауа ражва айшыспI: «Ари хъацIауачвапI! Ауи аъарала йджьахIщачватI йгьи хIгвы швабыж йалахIатI!»

Август мыз ЧкваргIа Къарча-Черкес апны аткъвым райззара акIвдыршарныс ргвыгъапI. Кърым йту ръахIыльчва йырзымчхIахуата йазпшитI ари анйара йгьи йгвыгъитI закIгьи гIарпырамсуата йызгIадгылырныс.