Международное объединение содействия развитию абазино-абхазского этноса «Алашара»

ХIуачIвымш лашарахара ахъазла

Во имя светлого будущего


Апсуа-абаза уагIахъа р-Дуней ассоциация йбыжьбахауа айззара ду апны ауи гIаншищтара йцIуа асквш 25 рурала нхарата йакIвшаз агIарбараква йрылачважватI. Йапхъахауа айззара ду асквш 1992 Апсны айсра алгъачI анахъагылаз агIан Лыхны кыт апны йакIвшатI. Йгьи йбыжьбахауа айззара ду ангIахъыртIуаз  атшын йымпсаххауата Ассоциация апрезидент йъанатIа нкъвызгуз Шамба Тарас йшгIаликIгIаз апшта, «агъа хIкъральыгIва йкIырныс анимурадха хIацIагылын ауи хIипшIагылырныс, далахIрыхъвашарныс, ахъахвитра гIатыгIгарныс  хIылшатI».

– Апсны рыхъазла йхьантаз асквш 1992 агIан атурых апны зыхьыз хIаракIу хI-Президент Ардзынба Владислав йгIанйыршатI з-Псадгьыл йгьи агIвымакъральква рпны йбзазауа апсуаква, абазаква, айщчва уагIахъаква адызкIылыз а-Дуней апсуа-абаза Конгресс. Ари ачIвырхъа ауи апхъахьыла хъарата дшпшуаз йаквшахIатпI. Айщчва уагIахъаква радкIылра агъа йпшIагылыз къару мчхъахатI. Ртурых аурала йшаъаз йапшдзата уахьчIвалагьи апсуа-абаза уагIа рпахь мурад хъадата йгылапI йгIадзынгылуа абанпараква рыхъазла руагIахъара агIахчара. Ари амурад хъйара ахъазла хIуагIа, зпсадгьыл йтабзазауагьи агIвымакъральква йыртабзазауагьи, тшагIвхIымшауата хIацынхара атахъыпI, – йхIватI Тарас Мирон йпа.

Согъвым апны йакIвшуз йбыжьбахауа айззара ду йалан Апсны, Россия, Трыквшта, Сирия, Йордания, Египет, Англия йгьи адуней анахьанат акъральква йыргIащтийыгIвчвата уагIа 300-гIв райхIа. Ауат хIвахIвра ажвала тшырзынайырхатI Апсны Республика а-Президент Хаджимба Рауль. Ауи йшипхьадзауала, ари айззара ду апхъахьыла хIуагIахъаква ртшауацIыхра, рацзакIыра, райгвара апны магIны ду зму гIаншарапI.

– УахьчIва а-Конгресс апны йгIайззаз ауагIа адызкIылуа закIыпI – апхъахьылагьи айгIайри Апсны ахъахвитри ртшауацIнарыхра йгьи ррыбагъьара. Ауи ахъазла Абашта апачва цIабыргква зкьыгIвпхьадзара йнадзауата рхъа щтIарцIатI. ХIара хIаднакIылитI абарат йрапшу ауысква рырхъайара апны амальква ргIаура: адемаграфия аъаща агъьчIвра, акъральыгIва гIалцIыртаква йрылархIара, апсуа йгьи абаза бызшваква ргIахчара йгьи ртшауацIыхра, – йхIватI Апсны апхъагылагIв.   

Йхъаду политика мурадта Хаджимба Рауль йгIаликIгIатI апсуа-абаза уагIахъа руачIвбзазара арылашарара. «ХIара ауи амурад хIайжьарныс хIгьахвитым, момызтын йхIчпалакIгьи амагIны мцыразлуштI. ХIара хIуагIахъакIызтын хIхъатачIв гIальаматраква нахIрыскIьата хIайщчвара, хIазакIыра, хI-Псадгьыл гIахIхчауата хIацынхара атахъыпI», – йгIаликIгIатI ауи.

Ари амурад архъйара йазынархапI Апсны къральыгIвагьи жвлара организация щардагьи рынхара. Айззара ду апны ауат руыснкъвгагIвчва гIачважвауата йгIархIватI нхарата йакIвдыршауа, хачIвыта йдырхъйауа. Ауи ауысла швапхата йгIарба йауаштI Апсуа-абаза уагIахъа ртшауацIыхра ацхърагIара знархару а-Дуней адкIылара «Алашара» авице-президент Мыхц Рамазан йгIачважвара.  

– Хвысквша руацIа хIара хIорганизация нхарата йакIвнаршаз гьмачIым. Акнигаква экземпляр зкьпхьадзара йнадзауата йгIацIцIтI, амультфильмква абаза бызшвала йатахIкIтI, абаза кIьанджь театр гIанхIыршатI, агIарбартаква, абаза ашва аконцертква акIвхIыршитI. Анып агвыргъьарамш Апсны апны апшта Къарча-Черкес Республика апынгьи, Россия анахьанат акъалаква рпынгьи, Трыквшта апынгьи йдыртлапIитI. ЙцIыхъвахауа апщсквша руацIа ари Амш артлапIара цIасхатI йгьи адунейла ауи йалапI уагIа зыкьпхьадзара. Спорт хъвмарыртата 30 раъара уыхвахатI, Гвым кыт апны йпхатшу аспорт комплекс ауыхвара ацIыхъва йнадзитI. Аспорт ъамапсымаква хIхвгIитI, аспорт анкъвакъвраква акIвхIыршитI. Ауат йрыуата йалкIгIу агыларта рымапI Абаза  хъвмарраква, – йхIватI Мыхц Рамазан.

Датшагьи ауи йгIаликIгIатI абаза бызшва агIахчарала «Алашара» адкIылара йнарахвуа амальква:

– Абаза бызшвала арыпхьара цхърагIагаква лыхпI, ххъвыкIта йалу арыпхьара курсква акIвшитI, Интернет апны апхьарасахIатта 72 онлайн амальла йакIвшатI. Ужвы ауат видеогIвыра амальла йадгалата адкIылара рсайт апынгьи ютуб канал апынгьи хвитта йгIарысабап йауитI. «Алашара» абаза бызшвала ателебара атра шIыцква радгалра йацхърагIитI. АдкIылра ргIаджвыквцIарала апхьартаква рпны абаза бызшвала асахIатква мчбжьыкI апны хпа рпны йгIанымхауата хвбадза йрылахIатI, асабигIзартаква рпны абаза бызшва арыпхьара амаль шIыцла йадгалахатI.

Апсны анаукаква р-Академия апрезидент Джапуа Зураб йгIачважвара апны айззара йалакваз ахайыргIвазатI Академия йгьи а-Дуней адкIылара «Алашара» йацлырхыз анаука программа.

– ХIара абаза бызшви апсуа бызшви ртшауацIыхра хIадынхалуаштI, ауагIахъа турыхи акультура тынхи рырхъвыхра ауысла йапшым анхараква акIвхIыршуштI. ХIынхара йгIаднакIылитI Апсны йгьи Россия, Европа йгьи Америка йрыуу апхьахьаква. Арат анархараквала йынхауа аъачIвагIагIвчва ргIарбараква тшрыхахIыргIвазитI. ЙхIвара атахъыпI хIпрограмма алыхра хIдиаспора ргIащтийыгIвчвагьи шадынхалуаз, ауи ахIатырла рыцIагьи йауацIыххатI, йцIолахатI. Йаргьи ауи йатаркIвах йгIахIнарбатI хIуысква зымгIва адиаспорагьи рылата хIацрыдынхалра шатахъу. ХIкъару адхIкIылырквын уыжвгIанчIви глобализация агIаншараква хIызрайгIайуаштI, хIуагIахъара ахъата, хIкультура, хIыбызшва, хIцIасква хIзыгIахчуштI, – йхIватI Зураб Джота йпа.

Афилология наукаква рдоктор, апрофессор Чирикба Вячеслав анаука программа апны абызшва знархару ауысква рыцIа йауацIыхта дрыквгIашIастI. Ауи анхара йацIыхъватшаразара атахъыпI асабигIзартакви апхьартакви рпны йгIашIарышвта йакIвыршачIву апсахраква. 

ЙгIачважваз ахыгIвгьи йгIалыркIгIатI ари анхара шабгу акIвыршара збзиру а-Дуней адкIылара «Алашара» апрезидент Эгьзакь Мусса шйакIву, ауи йара йахчала йшадигалуагьи. ЦIабыргыта, йара Эгьзакь Мусса ХIабальа йпа йшихIвазла, заджвы йхъазы дгьайсгIвым, аразыра ажваквагьи йара йхъазымкIва дызцынхауа агвып зымгIва йырзынархара атахъыпI. Айззара йалакваз тшырзынайырхауата Эгьзакь Мусса хIуагIахъа рпахь йгылу ахачIвква рырхъйара йыла йшгIацIалуа апшта дрыквчважватI:

– ХIапхъала йщтIу анхара апны йатахъу агIарбараква хIырзынадзара ахъазла хIара адунейла абаза уагIахъа адхIкIылта хIыбызшвагьи, хIкультурагьи, хIцIасквагьи гIахIхчара атахъыпI; йырхъйачIву ахачIвква йащтацауата йаныргIалу амальквала йадгалра атахъыпI; хIара хI-Апсны къагIауа йбзазарныс, аэкономика тшауацIнахырныс ахъазла лшарата йхIыму зымгIва адхIкIылра атахъыпI, зпсадгьыл йазгIацапахырныс гIазтахъхауа рыхъазла йнардзу амальква гIаныршара атахъыпI – Апсны тшауацIнахуазтын араъа абзазарагьи зымгIвала йнардзата йщаквгылуаштI. ЙчпачIвыйа щта ари анхара джвыквылра ахъазла? Абаза уагIахъа йырзалху информация уатыкв кIьыда гIаныршара атахъыпI: хIара хIабадыруаштI, хIайчважвуштI, хIайкьангьашуаштI – ауасамцара йлашару хIуачIвбзазара хIазычIвырхъуштI. Къраль-къральла йагвныргIвыта хIпрограммаква рынхара адгалра атахъыпI: ажвлара советква гIанхIыршапI – ауи апш совет гIаныршахьапI Къарча-Черкес апны, ауи апш совет гIанхIыршапI абазаква ъабзазауа акъральква зымгIва рпынгьи. Къральипхьадза апны абазаква ртшауацIыхра знархару апрограмма лыхIхпI – апрограммаква абзазара йалазыжьуаш ауат ажвлара советква ракIвпI. Акъральква зымгIва рпынгьи аинформация агентстваква нхуштI, нхарата йакIвхIыршауа ауат ргIвыраквала йгIадырбуштI. Ауи анхара ащтацауата, ащапIы багъьата йадызгалуаш, унашва ахъызцIуш квта штаб гIанхIыршуштI.

Эгьзакь Мусса йгIачважвара арат ажваквала йнайырдзахтI:

– Ажва гьалам хIара гIвагвана ду хIшыквылгIвацауа. Ужвы хIара хIзацынхитI, кърар хIбжьапI, акъыльпшгIарала хIацахъитI. Ауи магIны ду амапI. ХIугIахъа йырзыстахъпI сквшышвкI рурала хIпхьадзара мильуанла йыршвауата йщаквгылырныс. Ауи ахърыкъьара гьалам – хIацIагылуазтын хIуысква ащтацуштI. ЗымгIвагьи хIыбызшвала хIчважвауата йхIшврычпа, ауахьауат ауагIахъаква зымгIвагьи гIахIайхIвапсаргIатI, швапхагьи хIхъырхыргIатI.

Йшаъазла, айззара йалакваз зымгIвагьи абазаква рапхъагылагIв йхъвыцща йацыркIтI (йатахIхIвахпI, Эгьзакь Мусса абаза жвлара организацияква р-Ассоциация «Апсадгьыл» ауыснкъвгартагьи дшапредседательу). Йгьи сквшы 25 рурала МАААН йаунашвачпагIвыз Шамба Тарас Мирон йпа ари аъанатIа датша гIвычIвгIвыскI дазалххра шатахъу гIаныцIуата йхъвдаквцIараква анихъихх амщтахь а-Конгресс йалакваз йацшIакIта Эгьзакь Мусса йкандидатура йацыркIтI.

– Сара ауи джьауапкIра ду апщылата йсыласхIвитI, – йхIватI ауи ащаквыргылра дацчважвауата Мусса ХIабальа йпа. – Ауи азхъацIара ахъазла зымгIвагьи сшвзыразпI. Саргьи швара сшвайгвгъитI. ХIацIагылата хIуагIахъа рбзира хIазынхуштI. АлахI дышвзыразхатI!

А-Конгресс йалакваз хвду азырбатI сквшкъомкI руацIа Шамба Тарас нхарата йакIвйыршаз. Арат асквш 25 руацIа МАААН агенерал секретар йъанатIа нкъвызгауата ауи йыцынхуз Аламиа Геннадий йажванахъала Тарас Мирон йпа Ассоциация да-ЧIахIныгIва Президентта далххатI. Йара Геннадий Шалик йпагьи йынкъвигуз аъанатIа дшакъвыцIхуаз йхIватI, йцынхъвы дынхарныс йыхьыз гIайхIватI Гогуа Сонер. Гогуа Сонер дчкIвын шIата айсра амца йалаз Апсны абджьар йнапIыцIата дазгылырныс дгIацапахтI, араъа дгIанхахын уахьчIвала ауагIа рыхъазла агвчIагIвра знархару уыс бзи щарда нкъвигитI. Гогуа Сонер пIатIу йыквицIауата Эгьзакь Мусса йара йкандидатура гIайыргылуата йыхьыз йхIватI Гицба Инар. Ари ажванахъа апычIв кьангьашра айчважвараква рагIан йацызкIыз щардагIвын. Гогуа Сонер йара-йара хъатакIла дангыл амщтахь ащтийыгIвчва рщардагIв Гицба Инар йыхьызла напIы щтIырхтI.  

Гицба Инар Ткъварчал къала апны дйытI, асквш 2002 агIан Гагра апны «Башаран-колледж» апны дапхьатI, асквш 2007 агIан Гданьск йтагылу а-КъральыгIва университет (Польша) апны «Политология» факультет дгIалгатI, «акъральыгIва азазаъащаква» знархару аъачIвагIа гIацIигатI.

Айззара апны МАААН а-Устав аредакция шIыц ауатыкв йгIатарцIатI, ауи апроект йацыркIтI, асквш 2018 агIапын йакIвшуш йащтагIайуа айззара апны йаталапшхырныс йщаквдыргылтI. Йара ауи асхъан йщаквдыргылуаштI ЙхIаракIу а-Совет йалазлуш рыхьызквагьи. Айззара апны аштаква ргIащтийыгIвчва рпхьадзараква (аквотаква) шаъазлушгьи йалапшын щаквыргылрала йдрыбагъьатI.

Айззара анхара йцIыхъвахауа атшын йапшым акъральква ргIащтийыгIвчва йрайгван дрынйатI Апсны а-Президент Хаджимба Рауль, декабр а 10 атшын асасчва Лыхны кыт йаъан, ауаъа ауат дыртлапIауата абзазагIвчва гвыргъьамш ду рзадыргалтI.