Сайт Международного абазино-абхазского культурно-просветительского объединения «Алашара» - View News

Международное объединение содействия развитию абазино-абхазского этноса «Алашара»

ВААК а-Устав дрыбагъьатI йгьи ЙхIаракIу а-Совет алырхтI

Принят Устав и избран Совет ВААК


МартI а 22 атшын Согъвым апны йакIвшатI Адуней апсуа-абаза Конгресс VII Айззара йгIвбахауа алачIвара.

Айззара йапхъахауа ахъвы асквш 2017 декабрь а 7 йгIашIарышвта декабрь а 9 атшындза Согъвым апны йакIвшатI. Ауи агIан а-Конгресс щаквгылищтара ауи алаща псахра аларцIарныс ахъазла йапхъахауата ащтийыгIвчва напIы щтIырхтI. ЙхIаракIу а-Совет даунашвачпагIвхатI йбергьльу апхьахьа, амеценат, ажвлара уысхагIв Эгьзакь Мусса, АААК дархъйагIв секретарта далырхтI Гицба Инар, апхъала ауи Трыквшта апны Апсны дакъральыгIва щтийыгIвын.

СынчIва Апсны, Россия, Трыквшта, Сирия, Йордания ргIащтийыгIвчва злата йакIвшуз алачIвара цIыпх декабрь агIан зынхара джвыквызцIаз айззара йахъвын. АгIвалачIваракI йгIарбжьалыз агIамта ауацIа аустав апроект йадынхалтI, ЙхIаракIу а-Совет йгьи аревизия комиссия рпны йалырхуаш рыхьызква щаквдыргылтI, Адуней аинтернет-портал abaza.org гIандыршатI.

Айззара йалакваз тшырзынайырхауата дгIачважватI Апсны апрезидент йкьангьашыгIв Зантария Владимир. Ауи йгIайхIватI Апсуа-абаза уагIа Конгресс ащтийыгIвчви асасчви йрызцуз Хаджимба Рауль йхIвахIвра гвапакви йацкIра ажвакви.  

Айззара йалаз рпахь дгIачважвауата Адуней апсуа-абаза Конгресс ЙхIаракIу а-Совет аунашвачпагIв Эгьзакь Мусса йгIаликIгIатI араъа абаза уагIа радгылри рбзири знархару апрограмма абзазара йалажьрала ащата шщтIарцIаз. Ауи АААК анхари амурадкви дрылачважватI: «Аустав апны йапхъахауата йгIахIырбатI Адуней Конгресс алалра ауыс. Юстицияла Апсны а-Министерства ауи хабза щата анартра амщтахь зынла шIыпIипхьадза ЙхIаракIу а-Совет йалу рыуа заджвы-заджв ауысхагIвчва р-Президиум йаларцIуштI. Асквш ауацIа ашIыпIаква зымгIва кIьыда-кIьыда йырнархару атшауацIыхра программаква хIрыхIазырта йхIрыбагъьуштI. СынчIва Апсны, Къарча-Черкес йгьи Трыкв рпны абзазара йалалуа апроектква хIацрыдынхалуаштI. Ажва ахъазла, ауат йрылапхьадзапI абаза уагIахъа культура Амш, «Абаза хъвмарраква» зхьзу аспорт проект, «Азъазара фестиваль».  

Москва йту апсуа диаспора рхъада Агрба Беслан йгIаликIгIатI адуней акъральква йыртабзазауа абазаква, апсуаква зымгIвагьи рпахь хачIв хъадата йгылу Апсны агIахчари атшауацIнарыхри шакIву.

«Сара сдыргвыргъьатI агIвымакъральква рпны йбзазауа хIхаквлагIвчва рапхъанчIви псадгьыл йазгIацапахырныс ауысла адгалра нхара йгьи ауат акъральыгIва тшауацIыхра ркъару рзалацIарныс знархару а-Устав ажванахъаква. ХIара къральыгIва хIымапI. Ауи апш хъгалра адунейла уагIахъа щарда йгьрымам. ХIаргьи, адунейла аныла-арыла йбзазауа апсуаква, йхIылшауа зымгIва хIчпара атахъыпI ауи гIащаквхарныс йгьи тшауацIнахырныс ахъазла», – йхIватI Агрба Б. 

Ауи йшгIаликIгIазла, зпхьадзарала йара Апсны йтабзазауа йрайхIу апсуа-абаза диаспора акъару акъральыгIва арыбагъьара йанархарата йгIарысабапра атахъыпI. 

ЛахIвара щарда гIайрыцIсуата, напIасра дула йызнымкIва дапыркъьауата дгIачважватI Трыквшта апсуа культура квтаква р-Федерация аунашвачпагIв Атанур Акусба. Зпхьадзарала уагIа зыкь 500-гIв раъара йнадзауа адиаспора апхъагылагIв йгIаликIгIатI абаза уагIахъа рпахь абзазара йгIаннаршаз баргвыра дута йаъу ауагIахъа тшдырра ъарчвыдзуа шакIву. Акусба швапхата йгIайгтI Трыквшта апны зны апсуа кытта йырпхьадзуз кытквакI мачI-мачIымцара апхъанчIви уагIахъа культурагьи цри бызшвагьи шырчвыдзыз. Къару ду рзынархара атахъыпI апсуакви абазакви руагIахъа культура агIахчари атшауацIнарыхри, цри бызшва агIащаквыргылхра. «ХIара хIайщчви хIахщчви р-Псадгьыл йазгIацампахуата йъабзазауа йгIатахарыгьи ргвыгIв хIчпара атахъыпI, ауат апсуа жвлара йшрыднакIылуа дхIырдырра йгьи хIырцхърагIара атахъыпI», – йхIватI ауи.  

Айззара агIащтийыгIвчва АААК а-Устав шIыц нарахвтI йгьи уагIа 26-гIв йнадзауата ЙхIаракIу а-Совет алырхтI:

Апсны Республика ахьызла – Барцыц Марина, Ашуба Арда, Инджгия Джамбул, Чирикба Вячеслав, Кварчия Нури, Алшундба Инвер;

Россия Федерация ахьызла – Барцыц Олег, Агрба Беслан, Кобахия Беслан, Уырчыкъва Мурадин (Москва); ШенкIауа МухIадин, Мыхц Рамазан, ДзыгIва Зауыр, Чагва Армида (Къарча-Черкес Республика) Пшеноков Владимир, Къарма Руслан (Къабард-Балкъар Республика);

Трыкв Республика ахьызла – Ахмат Хапат (Джейлан), Мурат Махариа (Гюмюшь), Мурат Гечба (Йылдырымгеч), Мехмет Али Гюль (Дохмаа), Эрджан Башнуху, Ведат Мекер;

Йордан Хашимит ПаштахIыгIва рыхьызла: Чква Ануар;

Европа рыхьызла: Эркан Хаджимба;

Аджария рыхьызла: Натали Лазба;

Сирия рыхьызла: Шараф Маршан.

АААК ЙхIаракIу а-Совет апрезидиум йаларцIатI Чирикба Вячеслав, Агрба Беслан, Ахмет Хапат, Мыхц Рамазан, Къарма Руслан, Ануар Чква, Эркан Хаджимба, Натали Лазба, Шараф Маршан.

Айззара йалакваз йыддырбатI АААК аинтернет портал шIыц abaza.org. Ауи даунашвачпагIвпI Лазба Амина. Ауи йшылхIвазла, апортал йархъйуштI адуней хабарргагаква рквтала Апсны агыларта хIагIахарныс знархару ауысква. Апортал ххъвыкIла йалапI: йапхъахауа ахъвы аконгресс анхара, Апсны апынгьи агIвымакъральква рпынгьи апсуа-абаза уагIа рбзазара йгIаквчважвуштI. ЙгIвбахауа ахъвы нархарата йамазлуштI аэтнография, акультура, афольклор, апсуа йгьи абаза уысхагIв дуква йгIарыквчважвауа агIвыраква. Йхпахауа ахъвы адиаспора рабадырра, ращтаныкъвара йазынархапI. «АгIвыраква зму цбызшвакIла йадгалазлуштI – апсуа, абаза, урышв, трыкв, гIарып йгьи ангьльыз», – йгIалылкIгIатI Лазба Амина.

ЙакIвшаз айззара амагIны гIаликIгIауата ауи анхара йалаз аэтнограф- кIавкIаздырыгIв, Москва йту апсуа диаспора ргIащтийыгIв Анчабадзе Юра араса йхIватI: «Ари агIаншара ажвлара бзазара апны зджьара йгIанымхауата амагIны хIаракIыпI, йшпакIву ухIварыквын ауи йалаз агIащтийыгIвчва рылшара швабыж йауацIыхын – Апсны абзазагIвчва йырхъазымкIва айззара анхара йалан Къарча-Черкес, Къабард-Балкъар, Трыкв, Сирия йыртабзазауа хIдиаспора ргIащтийыгIвчва. ЗымгIва рацкIыс йхъадата а-Конгресс зквшахIатхаз хIара хIдиаспора адгылри ацынхари йъарызгIашыкъу акIвпI».