Международное объединение содействия развитию абазино-абхазского этноса «Алашара»

АнцIрала йщаквгылу ацIасква

Под запретом Вечности

АпхьагIвчва тлапIаква! Швгватра азынахIырхитI Апсны йауу хIавтор Айба Мактина лгIвыра. Мактина Виктор йпхIа – атурыхдырра наукаква дыркандидатпI, наука гIвыра щарда дыравторпI. Ауи лтгIачва КIавкIаз ащхъа гьабаква рыгIвхъатакI рпны йбзазауа Абаза уагIахъа азакIыра йашвапхапI: Мактина лхъапщыла Гвагв Амырби Гвым кыт дауапI, ауи ахIатырла ажваква «Апсуара» йгьи «Абазара» рмагIны йацапшыта йларгванпI. Ауат ажваква йаларпата Абаза уагIахъа рбзазари ркультури йрыщайдзапI. УахьчIва йгIаквхIцIауа Айба Мактина лгIвыра Апсуара аъадаб-намыс ацIас хъадаква йгIарыквчважвитI. 

 

ХIсабихъа йацгIамгIвайсуа арат ажваква ауи апстхIва хъващы йгIалпшуан, ауат абальигъра ныбыжь аламгылра йалагIващунта уадыргIвана атшдырра ныбыжь асквшква руацIа псейспамцара йрагIахун. «ЙгьцIасым», «ъадабсызрапI» рхIвун ахIбачва асабиква рчпаща апны йамуа аъаща-чпащакI гвы артзарквын; абари «йанымгIалуата» ззырхIвуз асабиква рхъвмарра акьахвра ашIакIра амаль ткIьийта йахъагылуан; йарауи уагIахъа ткъвымкI йрыуу агIвычIвгIвысква йрылархIвауата рща йалалуан, рхъвыцща апны йара агыларта айауанта абзибари апIатIууи йыргIарбагата йщаквгылуан, цIаста рбзазара йацгIамгIвайсуан. АцIасква аткъвым рбзазара андыргIалуан: агIвычIвгIвысква рныбыжь йгIаквхта апшцIа апны, аунагIва апны, айшва йанадзхъачIву, йанацу йа йанкIьыду, йанадзхъачIву йа йанамцIыху, ныбыжьта йызтагылу, хъацIа турасыта йа пхIвыс турасыта йызтагылу, ахIбара-айцIбара йгIарыквхта йщаквнаргылуан раъащагьи, рчпащагьи, рщагащагьи.    

АгIвычIвгIвысква агIамта йгIашIыркъьун асатей ахвитра, асатей йгIашIыркъьун агIамта, ауаса анцIрала йщаквгылата асквшышвква рыцIгIвала йгIахъалуаз ацIасква рпахь тшгIашIаркIыхуан.

Ауат агвыргъьарамшква рагIангьи, ансимш бзазара бжьараква рпынгьи, мадзара злу агIвыраква рпынгьи, йачIвала йхърысу ауахъ жвгIванд апынгьи йрылырбгIун анцIрала йщаквгылу ацIасква.  

Шлацла йхърысыз аэзегетква ахъвшва зхъагылаз атшгIва мца йадзхъачIвата йырхIвун ауат зымгIвагьи рдаква йыртаныкъвауа аща шазакIу, Анчва ауат йжьыкIу-йбгIвыкIу уагIата йшгIайшаз, ргIариквагьи йара ауи азакIыра шрылу – рхIальшанла, рлахIвараквала, рызгIваквали ауат ръазагIваквали, рныхIвартаквали йащтагIайыз азаман апны «Ащацкьа» – хIва зхьырцIаз р-АпхъанчIви-уасаражв квырмышта йзырчпузли.

Ауи агIамта хъара аткъвым рчвагъвартаква, рхIвыртаква, рыбнаква, рдзыгIвква азакIын, ЙхIаракIу Айззара йалаз агIвычIвгIвысква хъвдаквцIарата йрыман аныхIвара, айсра, ахвгIахвтра уысква рырхъйара, айгварала йызпщылаз агвла ткъвымкви дари ращтаныкъвара аныргIалра.

АхабаргIвоуква йырхIвахуан рткъвым атурых гIаншараквала йшбайаз: тшыгIврадъа йангIанхуз агIамтаквала, йгIарылалуаз азгIва чвгьаквала, ащхъахъысыртала йгIаргвыквсуаз ачвгьахагIвчва рабакIрала, дада Уча йгIариква мышкIы бжьыгIв сабичва шрауызла, йапхъахуз амхIаджьыр йгIацапахра агвыргъьахъв хабарла, ауасамцара датшагьи щардала.

– Щта! – йпсыцхIа йщтиуан ауасаражв. – Агвымхара рыцIа йщардан. Анчва хIара хIбагъьара йырхъвыхуазарын. Ауаса хIара хIгIащаквхатI. Ауи збзиру хIгIазхъшахъыцIаз хI-АпхъанчIви-уасаражв йакIвпI. Ауи йакIвпI апIатIуквцIара, аныхIвара гIахIылазцIаз, ацIасква рхчара, ащажвла аркIьыдара, агвымхара атшачвхъыхчара хIырзызбжьаз (йцIыхъвахауа ажваква анихIвуз дкIаджвджватI).  

ЙакъвидыргIазйа ауи алыгажв гвыбзыгъа датша урышв уасаражвкIгьи арат ажваква йрыквшвауата йара йхъвыцща шигIвыз: «ЦIабыргыта, ари апш агIмыста акъыль цIола щаквгылра ахъазла абанпара къомкI тшырпсахуа йгIабзазара атахъын – рхъамаль рзыбауа йщаквгылта, акIасамсра, агIщара, ахвамыхвра йзайгIайуата, ахъахвитра, амчхъара, абзазара цIаскви апсабара цIаскви раквыршвара рыцIа хвы рзырбауата ахъыхчарагIваци ахъаргIачIварагIваци рацкIыс» (Лосский Н.О.).

АгIвадахь уахъ лащцараква рсахIат тынч ауасаражв йчважвара рнархаран адуней цIашвкъвалра, адуней птшыгIа, адуней йыкву зымгIва рпхыцIа аъаща, ащхъаква, агвалква, амшынква шгIаншаз, апхызква, апшаква, анашхыйари агвыргъьари рмагIны, КIавкIаз агIахчагIвчва рфырра, аурым айсгIвы фыр Язон йджьаз хъылпа йхъатала йшгIайауыз (уадыргIвана зны алыгажв ауи сасыкI согIата йыйтхтI), ацIас бзиква рынкъвгаща, датшагьи щарда, – ачвасысра йайгIайта зныкI ахъазла цIыхъва змам йхабархIвара апышвтындзыкIьара…

…Йлашару агIапын нашх йгIашIыхуз апсабара абыжьква йрыцта аткъвымлагIвчва йыруацIсуан. АуагIа агвнахIазыргIвага рахвщри аныхIвари рымщтахь, асогIаква анамырда, йанайчважва, ахIвайраква анаквдырпшы дугьи чкIвынгьи атшшарта Ду апны тшазыркIкIуан. Араъа ахъвмарраква акIвшушта ауат йрызпшуан аджьма чваква зкврышву амшыркъвагIвчва, рылаква рыхъазла кIынхIара зму аджьагIафа машаквчкIвынква рхъаква йырхъарпата, рхъапахьква джьма чIвгIва рылагылата, алокI мшынхIвсысаква амца чва зму гIаджьым швыгала рхъабра ауыраква швыта, айныжвква, ацанква, анажгIвыршIыдзаква, анартква, датшагьи ачвгьи абзии гIазырбауа йапшым анахьанат алокIтурасква. Агвымхара гIазырбауа атурасква агалагьи рыцIа йщардан, йаргьи ауи агIахъвмарра шаъазлуш йаквыргIапста йаъан, ауи шабгу аткъвым ЙхIаракIу Айззара йалата ари апхъанчIви азъазара зхъвдаквцIару агIвычIвгIвысква йырхъпшылран.

Зпхьадзара рыцIа ймачIыз абзиква ргвып йгIагвыквсуан быжь чIвыхь гIазхъыцIуаз, злактаква йапшымкIва йхъгIваз агвымхаква ргварта чвгьа. Ауат йрылан хъачвамщара гIазныпщуаз, зпынцIа дукви зшIыдздза цIаракви хъарххылыз ахъардучва, намхъара ззгIайта зылаква амца гIацIкъьуз апсычвгьаква, йжвагваз ркIлат дуква рыщтахьла йгIадырхIвхIвауа, пхащара зымдырхуата анымхахъари агIщари йхънарчIваз ацыблакьква, рпIайра здыргалуаш анаспынтшаква йырзыпшгIуз, аъадабсызра йнанауахвыз амахагьаква, цныхчылра квайчIвала збзазара рчву ахIарамква, чагIыр зтаз агъьаша дуква зырхIвхIвауа йзжвуаз аджьнышква. Ахъарчвыгъьра турасы йхъа йахъаз амашаквчкIвынла йгIайырбун ауи ашвхIаусыгIвала айбащра апны йгIалахаз ар рапхъагылагIвгьи. АгIахъвмарыгIвчвагьи апшыгIвчвагьи ауи аъара йщарданта атшшарта Дунадзара гьырзымхъузтI.

Атшшарта Ду ахъвлапын гIахъагылуан, агIахъвмарыгIвчва алагIваласуан, быжь ду рхъыцIуа рпынцIаква дрыцкьун, тшдрычвгьун, йкъвакьчакьуан, ажва гвымхашIымхаква гIаршIыцIуа йайсуан, йшвиуан.

ЙцIыхъвахауата АпхъанчIви-уасаражв йтурасы дтагылата чва бзи зхъу ахъацIа йауыру ачгIвыча шкIвокIва йышвата дгIаквылуанта агвымхаква амцIицун арат ажваква йхIвауамцара:

 

ГвымхашIымхапI швара йынкъвшвцауа,

Ачважь йану ашвра швагIвыза.

ТшазшвкIкIын швара

Аткъвым рща йамыкIв азгIажвгитI.

ШвхIщуашма? Швара хIшвапшхушма?

Момо! ХIыла швыцIцIырквын рыцIа йагъьпI!

ЗакIыпI мгIвата йшвзалху –

ХIткъвым анцIрала шврылцIырныс.                                 

                                 .                       

– ХI-АпхъанчIви-уасаражв йуыртла дхIагIан, далакъьан, йхъабри йжакIьи амца ачва рымата йкъапщын, дласын, дымчхъан, – йатаджвыквицIахтI йхабар ауасаражв. – Йакъыль анирыпшгIара амадза хвыцква йзыгIахътIуата дцIарахун, ауаса ауат йгIархъшахъыцIхуан ауыс дуква. Ауи йхIальшан йалан ачIвыла йачIвыз адгьылрхарджьыгIв ткъвым ръазарагьи заъащаква ажвгIвандла йнархаз ащхъагIвчва-шварацыгIвчва ткъвым рамайчрагьи. Йныбыжьла рыцIа данчкIвыныз АпхъанчIви-уасаражв ацIабыргри абзири дырхчагIвыта, йджьащахъву йгьи сабап злу пкъыгIва щарда йзычпауата йхабар гун. Ауи агвахъвара дазгIашыкъын, нчвахъвыта йпхьадзун. Ауи апшта, агIвычIвгIвыс ачIвара йыхъуата датша гIвычIвгIвыскI дибата тшангIащтIихра гвахъвата, сабап алата йбун, асабиква ауи асабап дйырдыруан, рмахъащахъаква шынкъвырыжьуаш йазибжьун, даргьи ркъару гIаталуан, азадартаква майрата йырхъалуа йащцун. Ауаса ауатква ауасаражвква йырхIвахуаз АпхъанчIви-уасаражв йгIахъвыцран, йшпакIву ухIварыквын уыжвгIандзара хIакъта йгьалыргам йапхъу – афачIвгIалцIырта амальква ракIвма, агвахъвара чпащаква ракIвма.

…Заджвгьи йгьидырхуам адгьылрхарджьыгIвчва рткъвым тлапIа апны хIва цIыхъва змаз асаби адуней дангIаквыл. ЙтамщахIахауата йакIвшаз ЙхIаракIу Айззара апны аткъвым йшщаквдыргылызла анчваква ръамырла агIвычIвгIвыс йквпшыра тшапсахуата акIвпI, ауаса йалкIгIата йгьырзалмыргатI ахIва атурасы закIву йгIаншауа. Анчваква йырпшIамгылуата ари агIаншара ахIва квайчIва асурат зну ныпла бзазара цIаста йщаквдыргылтI. ЗаманкI анахъыцI йарауи апш гIаншара рызгIайтI ашварацыгIвчва рткъвымгьи – ауат рпынгьи адуней дгIаквылтI хIва цIыхъва змаз асаби. Ауи амщтахь йгIадриуа йалагатI дерт змаз асабиква. Ауи ахъахьгьи удын хвыцкI, хвырта тшыткI зквшвуз асабиква псуа йалагатI. Абараса асабиква йрыквшватI агIвткъвымкI разазаъаща, рбзазаща аквымшвараква. Абараъа адауышвара ауыра пнатшуата йгIахIвачватI АпхъанчIви-уасаражв йбжьы. Ауи йгIайхIватI аткъвымква рбзазара амыгIвхъгараква йшгIархъшахъыцIыз асабиква рпсра. АнцIрала йпрымтшуата йынкъвыргара атахъу ацIасква щаквйыргылтI, йабгата йгIанхата агара йылаз асабизаджвыкI дихъагылтI. Ауи атшын йгIашIарышвта абанпара шIыцта йгIаншауа йзапшызлакIгьи арахчына ахъвыкI рыдкIылата йгIабзазара атахъын. Аща къапщ ачва апхъа йдыргылтI, нчвахъвыта йырпхьадзатI, атшшарта Ду йахьырцIахтI атшшарта Къапщы, АхIва квайчIва аныпгьи къапщ чвала йыршвыхтI, бзирала аткъвым тшгIарылзырхIвуз ауагIагьи ауи ачвала йшвыз ачгIвыча нкъвыргауа йалагатI. АткъвымлагIвчва зымгIвагьи табу йзырчпауата р-АпхъанчIви-уасаражв «Ащацкьа» – хIва йыхьырцIатI.

АнцIрала йщаквгылыз ацIасква рашIыпхьадзара йалан аныхIвара, джьыкIахбастала асасчва рнадасра, ашвирагьи йаткъвымлагIвчву рунагIвагIаныршарагьи ррыхIарамра, датшагьи щарда.

АнцIрала йщаквгылыз ацIасква рунашва загIаз анахьанат аткъвымквагьи ари агIаншара гвыбзыгъа йацыркIын йрыларкIтI, АпхъанчIви-уасаражв йхъарапшыра абзазара йалалуата аткъвымква тшадыркIылуа, къральыгIва гIандыршауа, агIвычIвгIвыс жвлара тшауацIырхуа йалагатI.   

– АпхъанчIви-уасаражв йхIйырбатI ацIабыргра, абзира, агвчIагIвра рымгIва, – йхIвун алыгажв. – Ауи тынхата йхIызгIанижьтI анцIра йынкъвыгIгара атахъу ацIасква.

– ХIара хIапсыуапI, – йчважвара далгауата йгIацицIахтI ауасаражв. – ХIара хIткъвым аткъвымква йырткъвымпI, апсуара ацIасквала хIъадаб-намыс щаквгылапI, ауат анцIрала йщаквгылу цIаспI.