Международное объединение содействия развитию абазино-абхазского этноса «Алашара»

Айщчвара ацIасквала

По законам братства


Сентябр а 29 атшын цба йнадзуз амашинаква рколонна Апсны Абашта айсра апны АйгIайра асквш 25 йадахIвуата йдрыхIазырыз арыпшдзагаквала йаныргIалта Къарча-Черкес йтыцIын Апсны йцатI.

Ари ауыс адыргалтI абаза кытква йрыуу апхIвысква ркоординация совет йгьи атшыгIвчва рклуб «Гвымлокт». Аколонна тшрыдыркIылырныс йызтахъу зымгIвагьи йрылшун.

Амашинаква Гвымлокт апны мгIва йыквылтI, акыт аурамква йанырбжьысуаз атшыгIвчва йнардастI. Псыжв кыт апны амашинаква датша уагIагьи рыцылын рымгIва хъара йыквылтI.

Апсны абзазагIвчва гвапата йгIарпылтI амашинаква рколонна. Апсны акъральгIвына йгIашIарышвта Согъвымдза ауат акъральыгIва автоинспекция анхагIвчва рыцта, амгIва аурала йгIарынйуз атачIв бзазагIвчва гIарайхIвахIвуамцара йымгIвайстI. Согъвым уъарылалуа апны ауат йгIарпыралтI АААК архъйагIв секретарь Гицба Инар йгьи Апсны агIвымакъраль министерства Аргван МарагIайырта ауысла адепартамент аунашвачпагIв Алшундба Инвер.  

Сентябр а 30 атшын амашинаква рколонна йацта йцаз зымгIвагьи агвыргъьахъв айззараква йрылан, АчIахIра апарк Йымчвуа амца апны хIврапшдзалапа щтIарцIатI, Апсны Абашта айсра йаладзыз квырмыш рзырчпауата дакъикъакI ауацIа йырджьабатI.

Къарча-Черкес йауаз асасчва Согъвым адзтшпурам апны Адуней апсуа-абаза конгресс йаланакIуа ЧкIвынргIа рсовети АпхIвысква рсовети йадыргалта йакIвшуз асаби гвыргъьахъвгьи йалан, адгалагIвчва йрыртатI йрыцыргаз абаза хIальыуа, акъальтамаква, ахъгIараква, ауаъа йаъаз асабиква зымгIвагьи йыршIадыршватI. Акъвабызчы Архагъ Льиди адауыласыгIв ХIачвыкъва Зураби рмакъымква зымгIвагьи ргвы гIащтIнахтI, йаркьахвтI, заджвгьи гвалымста йгьгIанырымыжьтI. АгIахIвракви анапIасри гьашIамсуазтI. 

Гвымлокт ахъада ХвытI Игорь агвыргъьарамш йалакваз драйхIвахIвтI: «УахьчIва йакIвхIыршауа ауыс – амашинаква рколонна агIамгIвайсра – хIаднакIылитI, чкIвынргIа рпсадгьыл бзи йырбауа йшгIадзынгылуаш йазнабжьитI. РыцIа йхъадугьи, Апсны ахвитра ахъазла зхъа щтIазцIаз афырква йатаркIвах квырмыш рзыхIчпарныс хIылшатI». Ауи Апсны абзазагIвчва пхата йъагIарпылыз ахъазла швабыж дшырзыразу йхIватI. 

Йара ауаса разыра ажвала, АйгIайра аюбилей йазынарху ахIвахIвра ажваквала агвыргъьахъв йалаз зымгIвагьи тшырзыналырхатI абаза пхIвысква ркоординация совет аунашвачпагIв МалхIваз Зальиха: «АйгIайри Апсны Ахъахвитри рымшла  снашвайхIвахIвитI зымгIвагьи. Ари агвыргъьарамш Апсны абзазагIвчва  ргвала лашара йадамыгъапI. Ауи агIатгара гIамта ауыра йазабакIтI, ажвала йузымхIвуш къару ду аларцIатI. Ареспублика абзазагIвчва зымгIвагьи йырзыстахъпI анасып, абзира, акъагIара».

Автоколонна йалан уагIа 26-гIв. АдгалагIвчва ауат зымгIвагьи йшырзыразу, ари агIаджвыквцIара цIаста йщаквдыргылырныс шыртахъу рхIватI. Гвымлокти Согъвыми рбжьара мгIва йъадзаквыз йгIаншуз зымгIва адгьыл апны йахъазымкIва ахъахьылагьи дрон гIадрысабапуамцара йхъырхтI. ГвынгIвырапI абари йджьащахъваз агIамдара йалаз зымгIвагьи анцIрала ргвы йшгIатахаз, йадзхъагылата ауи йаквшахIату суратгьи рхъырхтI.