International Association for Assistance to the Abaza-Abkhazian ethnos «Alashara»

Аешьара азакәанқәа ирықәыршәаны

По законам братства


Цәыббра 29 рзы ф-машьынак злахәыз аколонна Аҧсны Аџьынџьтәылатә еибашьраҟны игаз Аиааира ҳәа аҩырақәа рынҵаны, иара убас абираҟқәа рыманы Ҟарачы-Черқьесынтәи Аҧсныҟа амҩа иқәлеит.

Машьынала аныҟәара еиҿыркааит абазатә аулқәа аҳәса ркоординациатә хеилаки аҽтәы клуб «Гумлокти». Аныҟәара рҽаладырхәыр рылшон изҭахыз зегьы.

 Амашьына абзиабаҩцәа рныҟәара хацдыркит Красныи Восток ақыҭа аҟынтәи, аколонна уи амҩа ианысит аҽцәа рыцны. Ҧсыж автомашьынақәа дырҭәит иагыз апассаџьырцәа рыла.

Аҧсны ауааҧсыра гәахәарыла ирыдыркылеит автоныҟәара иалахәыз Аҧсны аҳәаа аҟынтәи аколонна мҩаҧыргон аҳәынҭавтоинспекциа, амҩан ирҧылоз аҭыҧантәи ауааҧсыра рыбжьы ҭыган бзиала шәаабеит ҳәа рықәҿырҭуан. Аҟәа уахьалало дара ирҧылеит Адунеизегьтәи аҧсуа-абаза конгресс анагӡаратә маӡаныҟәгаҩ Инар Гыцба, Аҧсны адәныҟатәи аусқәа рминистрра Ааигәатәи Мрагылара адепартамент аиҳабы Инвер Алшундба.

Цәыббра 30 рзы автоныҟәара иалахәыз рҭааит аныҳәатә уснагӡатәқәа: дара ашәҭқәа шьҭарҵеит Ахьӡ-аҧша апарк аҿы, минуҭктәи аҿымҭрала иргәаладыршәеит Аҧсны жәлар рџьынџьтәылатә еибашьраҟны иҭахаз зегьы.

Убасгьы Ҟарачы-Черқьесынтәи асасцәа алахәын Аҟәа аҧшаҳәаҿы Адунеизегьтәи аҧсуа-абаза конгресс аҿартә хеилаки аҳәса рхеилаки еиҿыркааз ахәыҷқәа рныҳәа. Дара аиҿкааҩцәа рнапаҟны ирырҭеит итрадициатәу абазатә хаа-мыхаақәа. Ахәыҷқәа рныҳәа иалахәыз зегьы урҭ ахаақәа ргьама рбеит. Лида Архаговеи Зураб Хачукови ракәзар зегьы дырлахҿыхит амилаҭтә мырзакани адаули рҟны ахәмаррала. Урҭ рыхәмарра иаршанхеит зегьы – хәҷгьы-дугьы акәашара иалагеит, ахәаҧшцәа  ракәзар иааҟәымҵӡакәа рнапы еинырҟьон.

Красновостоктәи ақыҭатә еиланхарҭа ахада Игор Хутов аныҳәа иалахәыз рахь ихы рханы иҳәеит:  «Иахьатәи автоныҟәара зегьы ҳаиднакылоит, аҿар ирылаанаӡоит апатриотизм. Зегь реиҳа ихадоу – алшара ҟанаҵоит даҽазныкгьы Аҧсны ахақәиҭра зыхьчаз ҳаҭырла ргәаларшәаразы». Иара иҭабуп ахыиҳәааит гәык-ҧсыкала иахьрыдыркылаз. Убасгьы Аҧсны Аиааиреи Ахьыҧшымреи рыдныҳәало дықәгылеит абазатә аулқәа аҳәса ркоординациатә хеилак ахантәаҩы Залиха Малхозова: «Ишәыдысныҳәалоит, Аҧсны иқәынхо зегьы Аиааиреи Ахьыҧшымреи рымш. Ари аныҳәа – милаҭрацәала еилоу Аҧсны жәлар, акыр шықәса раахыс иззықәҧоз ргәазыҳәара иасимволуп. Ишәзеиӷьасшьоит шәара, Аҧсны иқәынхо зегьы анасыҧ, аразра, ашәҭкакаҷра».

Автоныҟәара иалахәын 26-ҩык. Аиҿкааҩцәа ари ауснагӡатә иалахәыз зегьы иҭабуп ҳәа рарҳәеит, агәыӷрагь аадырҧшит уи наҟ-наҟгьы традициак иаҩызахап ҳәа. Красныи Восток инаркны Аҟәанӡа ахырхарҭа зегьы ҭырхуан адгьыл аҟынтә еиҧш ажәҩан аҟынтәгьы. Ҳәарада иҭыхын убасгьы ари аныҟәара џьашьахә агәаларшәаразы зегьы,  еидгылан рфотосахьа.