Международное объединение содействия развитию абазино-абхазского этноса «Алашара»

Гварамия Милана л-«Паноптикум»

Паноптикум Миланы Гварамия

«Паноптикум» – араса йахьзын апсуа суратгIвгIвы шIа Гварамия Милана йапхъахуз лхъатачIв гIарбарта. Апсны асуратршIыйагIвчва рквтала зыхьыз бергьльымыз апхIвыспа лгIарбарта джьащахъва асуратгIвра абзибагIвчва ргватра гIанарыцIстI.

Дута йчпаз асуратква рпхьадзара 48 йнадзун, йзлачпаз ашвыгаква лащцаран: квайчIван, удзышва лащцаран. АгIарбарта рымаджьащахъвахатI ауи ъаныргIалыз апещ йнашылырныс згвыгъамкIва йагIвсуаз ауагIагьи, ауат закIы йаргъаруазшва йнашылуанта асуратква йырпшуан.

Сквшы 22 йырту Гварамия Милана дсабийищтара сурат лчпитI, ауаса пщысквша ракIвпI йцIуа лбзазара апны уыс хъадата йгIалылхищтара. ЙцIыхъвахауа асквшква руацIа ауи йылгIвыз асуратква рпхьадзара 60 йнаднацалитI. «АршIыйара саналу сгвы швабыж йалахIитI, закIылагьи сгьгIапсум, уадыргIвана сазхъвыцтI: араса йанаъазара йачIвыйа щта ауи тшауацIнасрых йзамуахIва?» – лхъа дазцIгIахуазшва йылхIвитI Милана. АсуратгIвгIвы шIа суратгIвра ауысла йазалху адырраква гьлымам, ауаса щарда мцIуата МГУ дыцIалын азъазара атеория ллырдыритI. Ужвы йлыму аъачIвагIала дюристпI, ауаса агIарбарта шахIатхауата дхъызхуа ауыс юриспруденция закIылагьи йгьапщылам.    

ЦIабыргыта, Милана щардала йлыздыргылуа азцIгIараква йрыуазакIыпI ари: лсуратква ауи аъара йзхъващу. Лара асуратгIвгIвы ари апш хъвыцща дгьадгылуам, лсуратква рпны «ймадзу акъару лащцараква» ларгванта ъархIвауа йгьылуам, йылмудзахуагьи абзазара йлащцару ашвыгаквала дапшуата йъахъвыцуа. «УахьчIвала схъагвы аквыта, тынчта сынхитI ауат ашвыга квпшыраквала, ауаса апхъахьыла ари аъаща тшапсахуашта гIацIцIуаштI, ауи ауысла «момо» гьсхIвум», – арса дхъвыцитI Милана. 

АгIарбарта адгалагIв Цикутания Адица йшылхIвауала, ауи Гварамия Милана лгIарбарта гIальаматра злазылбауа ашвхIаусыгIваква йрыуапI гвчIагIвчпара нархара ъаму. Зсуратква зымтиуа асуратгIвгIвы азакIы аукционла йпшцIырщтырнысла дшразу лхIватI, йгIатныцIуа ахча агвчIагIвчпара организацияква рыуа азакIы йазырщтиныс ахъазла.  

– Аукцион ауыс гIазхъвыцыз Милана лакIвпI, ауи апш амаль нахIахвхьан анахьанат агIарбартаква рпынгьи, ауаса а-Квта гIарбарта зал апны ари аукцион пычIвпI, – лхIвитI адгалагIв. – Сара швабыж сайгвыргъьитI ари агIаджвыквцIара, апхъахьыла ауи цIас бзита йщаквгылныс стахъыпI. 

Йшцазла, аукцион апны Гварамия Милана лсурат сом зыкь 150-ла йпшцIыцIтI, ауи ахча а-Культура-гвчIагIвчпара фонд «Ашана» йырзырщтитI. 

АгIарбарта даквгIацапахуата Цикутания Адица йгIалылкIгIатI лара Гварамия Милана лыршIыйара джыпха заджвыкI йтагылата йшаъам. Йшылпхьадзауала, «сюрреализм, авангард, декаданс ззырхIвауа йырбжьазшва йаъапI».

АгIарбарта ахьызгьи хIадагIвачата йгьгIанымшатI. «Паноптикум» урым бызшвала йгIаныцIитI «зымгIва нахвапI», араса йрыпхьун йгвынгIвырам, гIвымара, шварагIварара гIазныпщуаз апкъыгIваква рмузей. ЙжвагIхуз асквшышв агIан философ джыпха йтагылата ажва «паноптикум» йгIанырщтуан цIбакIгьи зцIам ахIапса, чIапщагIв заджвыкI йтакIкву зымгIва дырхъпшылуа, даргьи йара ддырхъвыхуа. Цикутания Адица йшылхIвауала, агIарбарта ари апш нархара амазларныс йгIалхъвыцтI лара асуратгIвгIвы. 

– Асуратква тIакIв йхIырхъвыхырквын алакви алапшкви йъакIвызлакIгьи йубитI, апортретква щардапI, ауи ахIатырла апшыгIвчва асуратква йшырпшуа апшта дара  асуратквагьи ауагIа йырпшитI, – лхIвитI ауи.

АгIарбарта апны рыцIа уыла йгIацIашвауа йрыуапI «Аида» зхьзу асурат. Автор ауи асурат йнардзамкIва йылпхьадзитI, ауаса лыршIыйара апны йхъадата йгIалылкIгIитI, йаргьи ауи ашвхIаусыгIвала агIарбарта йалалцIара атахъыта йылпхьадзатI.

– Сара ссуратква йгIадырбауа салачважварныс гьстахъым, – лхIвитI Гварамия Милана. – Ауи чIыдазшва йзбитI. Йара ачважвара бзи йгьызбум, схъвыцраква ршIыйара турасы йтагылата акIвпI йшгIасырбауа.

Милана лынхараква портрет щарда рылапI. «Сара заджвыла ауагIа гIвбата йагIвсшитI – йпшдзата йырпхьадзаквауи сара схъатала швабыж йпшдзата сыла йгIацIалквауи алысхитI. Ауат ракIвпI йсыгIвзу, щардала ауат рпортретква згIвитI», – лхIвитI асуратгIвгIвы лсуратква дырбжьагылата. АхIвсса портретква бзи-бзи уырпшрыквын йуылаухIвитI ари «Паноптикум» апны агIарбарта асасчва рлактаква йыртапшуа алаква лара Гварамия Милана лылаквагьи шрылу.