Международное объединение содействия развитию абазино-абхазского этноса «Алашара»

МАААН йбыжьбахауа а-Конгресс. Йапхъахауа амш

На VII Конгрессе МАААН. День первый


ЙахьчIва Апсны акъала хъада апны Апсуа-абаза уагIахъа р-Дуней ассоциация йбыжьбахауа а-Конгресс анхара джвыквылтI. 

Ассоциация гIаншищтара сквшы 25 цIитI, йапхъахауата ауи асъезд Лыхны кыт апны асквш 1992 сентябр мыз агIан йакIвшатI. Ауи агIан Апсны айсра амца йалан. ЙахьчIва щымта асъезд йгIадгылыз агIащтийыгIвчва гвыпква асквшква 1992-1993 рагIан йакIвшаз Апсны Абашта айсра йаладзыз рсин ащапIы апны ахIврапшдзакви ахIвралапакви щтIарцIатI.

Айззара ду гIахъитIуата Апсуа-абаза уагIахъа р-Дуней Конгресс апрезидент Шамба Тарас араса йхIватI: «Зыхьыз фыррала атурых йгIалахаз хIапхъагылагIв Ардзынба Владислав хъарата дпшуата Апсны ахъазла швабыж йхьантаз асквш 1992 агIан Лыхнашта апны йгIанйыршатI Апсуа-абаза уагIахъа р-Дуней Конгресс.  Агъа йпшIагылыз къару мчыта ауи йаднакIылтI агIвымакъральква йгьи зцришта рпны йбзазауа апсуаква, абазаква, анахьанат айщчва уагIахъаква. Атурых асквшква рурала йшгIамгIвайсыз йапшта уахьчIвагьи мурад хъадата апсуа-абаза уагIахъа хIпахь йгылапI йгIадзынгылуа абанпараква рыхъазла хIуагIахъара агIахчара. Ауи амурад хъйара ахъазла гIвымакъраль йбзазауа, зцришта йбзазауахIва тшагIвхIымшауата хIацынхара атахъыпI. Йшыжвдыруа апшта, агъа хIкъральыгIва йкIырныс дангIагвыквс тшхIзадкIылтI, ашварагIварара хIапшIагылтI, ауи хIышта дтхIцан ахъахвитра гIатыгIгатI». 

Апсуа-абаза уагIахъа р-Дуней ассоциация йбыжьбахауа асъезд анхара йалапI Апсны Республика а-Президент Хаджимба Рауль, Апсны а-Вице-президент Габния Виталий, абаза-апсуа уагIахъа ртшауацIыхра ацхърагIара знархару а-Дуней адкIылара «Алашара» апрезидент Эгьзакь Мусса, датшагьи абаза уагIа рквтала йбергьльу акъральыгIва йгьи ажвлара уыснкъвгагIвчва.

Хаджимба Рауль айззара йалакваз зымгIвагьи хIвахIвра ажвала тшырзынайырхатI. Ари айззара ду хIуагIахъаква ртшауацIыхра, разакIыра, ращтаныкъвара апны швабыж магIны ду зму гIаншарата йхIватI.

– УахьчIва йакIвшауа а-Конгресс апны йгIайззаз ауагIа йара хъвыцщакIпI йадызкIылуа – апхъахьыла Апсны атшауацIыхра, айгIайра йгьи ахъахвитра ррыбагъьара знархару амальква рлыхра. Апсны ахвитра бзазара ахъазла Абашта апачва фырква зыкьпхьадзара йнадзауата рхъа пшцIарцIатI. ХIара хIадызкIылуа ауыс рхъйачIвква йрыуапI адемография аъаща агъьчIвра, акъральыгIва гIалцIыртаква йрылархIара, апсуа йгьи абаза бызшваква ргIахчари ртшауацIыхри, – йхIватI Апсны а-Президент.    

Политика мурад хъадата Хаджимба Рауль йгIаликIгIатI апсуа-абаза уагIахъа руачIв лашара азычIвырхъара. «ХIара хIгьхвитым ари ауыс апны щтахьла хIгIатхъаныс, момызтын, уыста йхIчпалакIгьи магIныдъа йгIанхуштI. ХIара хIуагIахъакIызтын хIхъатачIв гIальаматраква щтахьла йнахIрыскIьата хIайщчвара ащтаныкъвара, хIазакIыра, хI-Псадгьыл ргIахчара багъьата хIазгылата хIацынхара атахъыпI», – йхIватI ауи, уадыргIвана йгIачважвара арат ажваквала йнайырдзахтI: 

– Анчва йылпха рауыргIатI айщчва апсуа-абаза йгьи ачеркес уагIахъаква рацIагылри рангIалри! Йара мгIва лашаракIла анцIара йацымгIвайсуаш Анчва хIрыуайчIвтI! Анчва йылпха азыгIабгъалыргIатI Апсны!