International Association for Assistance to the Abaza-Abkhazian ethnos «Alashara»

Абыжьбатәи Жәларбжьаратәи аҧсуа-абаза жәлар рконгресс аҟны. Раҧхьатәи амш.

На VII Конгрессе МАААН. День первый


Иахьа Аҧсны аҳҭны қалақь аҿы аусура иалагеит Аҧсуа-абаза жәлар рконгресс абыжьбатәи аизара ду.

Ассоциациа еиҿкаан 25 шықәса раҧхьа, актәи аизара ду мҩаҧысит 1992 шықәса, цәыббра мзазы, Аҧсны аибашьра анцоз. Иахьа шьыжьнаҵы, аделегациақәа ирылахәыз ашәҭқәа шьҭарҵеит,  1992-1993шш. рзы Аҧсны жәлар рџьынџьтәылатә еибашьраҿы иҭахаз рбаҟа амҵан.

Аизара ду Апленартә еилатәара аартуа, Адунеизегьтәи аҧсуа-абаза конгресс ахада Тарас Шамба иҳәеит: «Жәларбжьаратәи аҧсуа-абаза жәлар рконгресс аҧҵара ҟалеит Аҧсны азы иуадаҩыз   1992  шықәсазы, ҳҧыза Владислав Арӡынба изы хара иҧшуаз шьаҿаны. Лыхнашҭаҿы уи еиднакылеит аҳәаанырцә инхо аҧсуааи абазақәеи урҭ риешьаратә жәларқәеи, иҟалеит аӷа иҿагыланы ақәҧараҟны мыч дуны. Аҧсуа-абаза жәлар иахьатәи рхықәкы хада - аҧхьаҟатәи абиҧарақәа рзы рмилаҭтә акзаара аиқәырхара ауп. Ари ахықәкы анагӡара алыршахоит, ҳажәлар, зыҧсадгьыл аҿы инхои адиаспора аҿы инхои ҳәа еилымхкәа аус еицырур. Ишыжәдыруеиҧш, ҳҳәынҭқарра ҳамырхырц рҽаназыршәа, ҳара ҳҽеидаҳкылеит, иагьҳалшеит ашәарҭара аҿагылара, аӷа иқәцара, ахьыҧшымра аагара».

Жәларбжьаратәи аҧсуа-абаза жәлар рконгресс абыжьбатәи аизара ду аусура иалахәуп Аҧсны Ахада Рауль Ҳаџьымба, Аҧсны Ахада ихаҭыҧуаҩ Витали Габниа, абаза-аҧсуа етнос аҿиара ацхрааразы Жәларбжьаратәи аидҵа «Алашара» ахада Мусса Екзеков, егьырҭ Абаза жәлар иналукааша аҳәынҭқарратәи, ауаажәларратәи усзуҩцәа.

Рауль Ҳаџьымба аизара ду иалахәыз бзиала шәаабеит ҳәа раҳәо, иазгәеиҭеит ари шыхҭыс дуу ҳажәларқәа рыҿиареи, ракзаареи, реимадареи рҟны.

- Иахьа Аконгресс аҟны еизаз ауаа еиднакылоит хшыҩҵакык – зықьҩыла Аҧсадгьыл аҵеицәа рхы зқәырҵаз, Аҧсны ахьыҧшымреи аиааиреи аҧхьаҟа арӷәӷәареи аҿиареи рзы амҩақәа рыҧшаара. Ҳара ҳаиднакылоит абасеиҧш апроблемақәа рыӡбара, адемографиатә ҭагылазаашьа аиӷьтәра, амилаҭтә ресурсқәа реизырҳара, аҧсуеи абазеи бызшәақәа рыҿиареи реиқәырхареи, - иҳәеит Аҧсны Ахада.

Ҳара ҳполитикатә хықәкы хаданы Рауль Ҳаџьымба иаликааит аҧсуа-абаза жәлар ҧхьаҟатәи рҧеиҧш лаша. «Ҳара азин ҳамаӡам ари ахшыҩҵак ацәхьаҵра, мап анакәха ҳазҿу зегьы ҵакыдахоит. Ҳара жәларык ҳакәзар, мап рцәаҳкроуп ҳхатәы интересқәа, аус ҳаулароуп ҳаиашьаратә еизыҟазаашьақәа,, ҳакзаара, ҳаҧсадгьыл реиқәырхаразы», – ҳәа азгәеиҭеит иара, иқәгыларагьы хиркәшеит абарҭ ажәақәа рыла:

– Анцәа дахылаҧшааит аҧсуа-абазеи, ачерқьеси жәларқәа ракзаареи реилибакаареи! Ҳзеиҧш мҩа наунагӡа илашазааит! Аҧсны Анцәа дахылаҧшааит!