International Association for Assistance to the Abaza-Abkhazian ethnos «Alashara»

Мира Сахаҭ-Гери-иҧҳа Тлиабичева: Алитературатә институт аҟны лҵара

Мира Сахат-Гериевна Тлябичева: Учеба в Литературном институте


М. Тлиабичева лхатәы, лҵаратә усшәҟәы рҿы еиқәхаз лҧышәаратә бӷьыц иалнаршоит иарбан ҧышәарақәоу, иарбан мшқәоу, насгьы иарбан хәшьарақәоу илоуз рышьақәыргылара; аиҭаҳәаҩра – нанҳәа 4: «хар амам»; аурыс бызшәа – нанҳәа 7:  «ибзиоуп»; аурыс литература - нанҳәа 7:  «ибзиаӡоуп»; СССР ажәларқәа рҭоурых - нанҳәа  9: «ибзиаӡоуп»; аҳәаанырцәтәи абызшәа - нанҳәа 11:  «ибзиоуп».

Аинститут ахь дышрыдыркылаз азы аҵа ҟаҵан нанҳәа 22 рзы, уаҟа иаҳәон:

 «Арҿиаратә конкурси аҧышәарақәеи рылҵшәақәа шьаҭас иҟаҵаны, ҳазну ашықәс цәыббра 1 инаркны, актәи акурс аҟәша хадахьы иахыҧхьаӡалазааит анаҩстәи аҩызцәа: Апоезиа – 14. Тлиабичева М. С. –Г.».

Алитературатә институт аҟны лҵара аамҭа иалагӡаны абаза-студентка далкаан Владыкинтәи ашәыруҭраҭыхтә базаҿы активлатәи лусуразы, азин лыҭан арҿиаратә ҧсшьаразы 1964 шықәса, хәажәкыра 30 инаркны мшаҧы хҧанӡа, иара убас аҧсшьара асанатортә ҽыхәышәтәразы, 1964 шықәса,  жьҭаара 10 инаркны абҵара ҩбанӡа. 1965 шықәса жәабран 7 инаркны рашәара акынӡа, лара апрактика дахысуан Ҟарачы-Черқьестәи автономтә област ашәҟәыҩҩцәа Реидгылаҿы, уи ашьҭахь лара аҟазшьарбага лыҭан абаза газеҭ аредактор Х. Жирови акультуреи абзазареи рыҟәша аиҳабы Б. Ҭхаицухови рнапы аҵаҩны. Уаҟа иаҳәон:

  «А. М. Горки ихьӡ зху Алитературатә институт астудентка Мира Сахаҭ-иҧҳа Тлиабичева апрактика дахысуан аобласттә газеҭ «Коммунизми алашара» аредакциаҿы  1965 шықәса, жәабран инаркны нанҳәа мзанӡа. Апоетесса қәыҧш фымз ирылагӡаны ажурналисттә усура инарҭбааны еилылкааит, лыхгьы аалырҧшит арҿиара злоу, аинциатива аазырҧшуа журналистны.

Аҩыза Тлиабичева апрактика дахысуан акультуреи абзазареи рыҟәшаҿы алитературатә усзуҩы имаҵураҿы. Лыпрактика иалагӡаны Мира Тлиабичева илҩит астатиақәа, акорреспонденциақәа, аочеркқәа рацәаны. Ҷыдала азҿлымҳара иаҧсоуп лочеркқәа  «Стараиа Кува аҿара»,  «Аӡыбжьахала иаҵәа аҟны»,  «Ельбурган». Арҭ аочеркқәа анылеит  «Аули аамҭеи» арубрикаҟны, ирызкын дара ашьхатә аулқәа рхаҿра ҿыцқәа. Автор еизылгеит ибеиоу аматериал, аулқәа Старо-Кувинск, Ельбурган, Инжич-Чукун, Черқьесск ақалақь рҭоурых иазкны, насгьы ибзиан иаалырҧшит Асовет мчра ашьхарыуаа ирзаанагаз аҿыцрақәа. Аочеркқәа ибзиоуп ҳәа ахырҳәааит ажурналистцәа реилазаараҿ, урҭ ирызкны аредакциа иаиуит аҧхара зҵаз асалам шәҟәқәа.

Апрактика иалагӡаны Мира Тлиабичева илҵеит ақыҭатә корреспондентцәа рысалам шәҟәқәа аус рыдулашьа, лхала агазеҭ архиашьа. Лара илҩит ҿыц иалагаз апоетцәа ражәеинраалақәа рыхҳәаақәа хҧа.

Апрактикантка лхы аалырҧшит алеишәа бзиа змоу, ауаҩы иҳәатәы хазҵо аӡәы лакәны, аколлектив раҳаҭырқәҵара лҽаҧсалтәит. Аинтерес зҵаз арепортаж  «Ашьха аҩнхәыҷы» азы агазеҭ аредактор идҵала Мира Тлиабичева аҳаҭыртә шәҟәы ланашьан».

Лызшьаратә шәҟәы уахәаҧшуазар Мира Сахаҭ-Гери-иҧҳа еиҟарамкәа аҵара лҵон. Убас, актәи акурс аӡынтәи асессиа  «ибзиаӡаны» иалыркит, аҧхынтәи – хә-маҭәарк рахьтә хҧа  «ибзианы» илҵеит, ҩба - «ибзиаӡаны» ҳәа. Аҩбатәи акурс аӡынтәи асессиа раҧхьатәи аҧышәарақәа ҩба рзы ахәшьара бзиақәа лоуит, ахҧатәи – хар лымамкәа. Иҟаларын, лара аҽазыҟаҵаразы аамҭа лзымхозҭгьы, избанзар аҧхьатәи аҧышәара ҭиит 1963 шықәса, ажьырныҳәа 18 рзы, аҵыхәтәантәи – адырҩаҽны, ажьырныҳәа 19 рзы.

Абасеиҧш еиҭаҟалеит аҧхынтәи асессиа аангьы: актәи аҧышәараҿы адырра бзиақәа аарҧшны, аҩбатәи, ахҧатәи рҿы ибзиаӡаны, аҧшьбатәи аҟны илоуит ахәшьара  «хар амам». Азшьаратә шәҟәы иаанарҧшуеит аҵыхәтәантәи аҧышәарақәа ҩба Мира ҽнак ала ишылҭииз – 1963 шықәса лаҵара 15 рзы, ус анакәха аҵыхәтәантәи аҧышәара аҽазыҟаҵаразы аамҭа зынӡа илымаӡамызт.

Зегь реиҳа илаҟәыз аҵаратә рбагақәа Тлиабичева иаалырҧшит ахҧатәи акурс аҧхынтәи асессиеи (хә-маҭәарк рахьтә, ҧшьба – «хар амам», акы - «ибзиоуп»), аҧшьбатәи акурс аӡынтәи асессиеи рҿы (ҧшь-маҭәарк рахьтә хҧа - «хар амам», акы  «ибзиоуп» ҳәа). Уи зыхҟьаз иаалырҟьаны дзықәшәаз агәаҟра акәзар ҟалоит: 1964 шықәсазы иҧсҭазаара далҵит лаб, лара аҧсыжрахь даар акәын, нас аҧсхәра уб. иҵ. Хаҭала абри аҭагылазаашьа ауп илзыргаз арҿиаратә ҧсшьара, хәажәкыра 30 инаркны мшаҧы  3-нӡа,  аҧсшьаратә ҽыхәышәтәра -  1964 шықәса, жьҭаара 10 инаркны абҵара  2-нӡа. Анаҩстәи асеместр зегьы, 1965 шықәса жәабран 7 инаркны ҧхынгәы 31-нӡа,  Мира абаза газеҭ аҟны апрактика дахысуан, аинститут ахь дхынҳәит цәыббрамзазы, маҷк лгәы анылхашҭ анаҩс. Ахәбатәи акурс аӡынтәи асессиа дахысит адырра бзиаӡақәа лыманы, 1966 шықәса, хәажәкыра 31 рзы илыхьчеит адипломтә усумҭа,  «Аҧҭа шкәакәақәа» атемала «ибзиаӡаны» ахәшьарала. Рашәара  4 рзы аурыс, асоветтә литературазы аҳәынҭқарратә ҧышәара лҭиит «ибзиоуп» ҳәа. Рашәара  21 – аҳәынҭқарратә ҧышәара - марксисттә-ленинтә философиазы ахәшьара  «ибзиаӡоуп», абасала аҵара хлыркәшеит. Зынӡа астуденттә шықәсқәа ирылагӡаны лара илҭиит  43 зшьа,  32 ҧышәара: урҭ рахьтә  10 маҭәарк рзы ахәшьара бзиаӡақәа лзықәыргылан, 12 маҭәар рзы ахәшьара бзиақәа, даҽа 10 маҭәарк рзы  «хар амам».

1966 шықәса,  рашәара мзазы иҭыҵит адҵа, М. С. Тлиабичева, алитературатә усзуҩы ҳәа аквалификациа лыхҵаны алитературатә институт дшалгаз зыршаҳаҭуа, илыҭан изыхәҭоу адипломгьы.

Мира Сахаҭ-Гери-иҧҳа лыҧсадгьыл ахь дхынҳәит, аусура далагеит Ҟарачы-Черқьестәи ашәҟәҭыжьырҭаҿы аредактор еиҳабыс, лыҧсҭазаара зегьы, тәанчара дцаанӡа ари аусҳәарҭаҿы аус луан.