«Къарча-Черкес» телерадиуакомпания апны абаза бызшвала агIатраква адызгалуа агвыпи «Алашара» жвлара адкIылари ацыта асабиква рыхъазла «Марашта» ахьызта программа шIыц дрыхIазыртI. Йапхъахауа агIатра январь а 11 йгIадырбатI. Ауи акIвзыршауа Чачан Аза Пыжвбани абаза локIква йрылу ХъабыжьчкIвыни гIвзата йлыцпI. Ауат ари апрограмма ахъазла йырчпаз кIьанджьыпI. РыцIа йгватшну апшыгIвчва гвы арымтуата йгьгIанымхазапI Пыжвбани ХъабыжьчкIвыни «Амара» кIьанджь театр артистква Къвныжв Ратхи Къвапсыргьан Зураби рбыжьквала йшчважвауа.

Йапхъахауа агIатра апны Аза ХъабыжьчкIвыни Пыжвбани акытчаква шырдыруа лырхъвыхуан. Ауи акIвымкIвагьи апшыгIвчва хвыцква рыхъазла абаза бызшвала йатаркIыз амультфильм «Лунтик» гIадырбатI.

Видео. "Марашта". 11.1.2018.

Апрограмма шIыц згIахъвыцру Джьбаба Радмиргьи ауи йадынхалуа агвып шабгугьи йшджвыквырцIаз акIвызтын, «Марашта» ахвыцква шIыцра щарда днардыруаштI, даргьи йрымаджьащахъва йшапшуаш кьангьаш гьамам.