Международное объединение содействия развитию абазино-абхазского этноса «Алашара»

Литература институт – абаза гIвгIвчва рылахь апны. ЧквтIу Микаэль ХIаджьы йпа: Литинститут апны апхьара сквшква

Литературный институт в судьбах абазинских писателей. Микаэль Хаджиевич Чикатуев: В стенах Литературного института


Ари агIвыра Горький йыхьыз нкъвызгауа а-Литература институт абаза гIвгIвчва рылахь апны гылартата йамаз йгIаквчважвауа агIвыра абаркIыра йаланакIитI.

 

ЧквтIу Микаэль а-Литература институт даныцIалуаз хвэкзаменкI йкIытI: август а 1 – алацIара, август а 3 – урышв бызшви урышв литератури, август а 8 – СССР аистория, август а 10 – география. Ауат йрыуата апщба «бзита» йкIытI, алацIара ахъазла «хпа» гIайгтI. Абарат агIарбараквала ауи анкъвакъвра дкIылсын шIырпшыра змам ари аинститут дастудентхатI. Аинститут дшнарахвызла аунашвачпагIв йунашва август а 24 мачвы ацIайцIатI: «АршIыйара анкъвакъври ацIалра экзаменкви ргIарбараквала Горький А.М. йыхьыз зхъу а-Литература институт йхъаду ахъвшара йапхъахауа акурс дгIахвра: г/ ауысара асеминар – 12. ЧКВТIУ Михаил ХIаджьы йпа».  

Сентябр а 13 атшын 56026 номер змаз астудент билет гIайыртатI, йара ауи аномер амата йгIайыртатI зачёт книгачкIвынгьи. УадыргIвана астудент бзазара джвыквылтI.

Литература институт йара йачIвыта ацбзазарта ъамамыз ашвхIаусыгIвала СССР а-Литфонд Москва йтаз агIвгIвчва рдачаква багьандата йгIарахвуан (Переделкино апны йаныргIалын), ауат рпны астудентква тарцIун. Астудентква апхьара сквшы йалгата йанамцIыцIхрыз дара агIвгIвчва апхын мызква руацIа ауат атдзычкIвынква йырпшвымахун.

Йапхъахуз агIвысквша руацIа ЧквтIу Михаил апсуа чкIвынчваква Гогуа Алексейи Анкваб Владимири йыцта Панфёров йдача йыгIвнабзазун. Щымтала астудентква гIвавтобус дукIла Москва апхьара йыргун, апхьарасахIатква йанрылгара дара ауат автобусквала йгIацадырпахуан. Апщашаква рагIан йбергьльу агIвгIвчва, акомпозиторква, асуратгIвгIвчва, артистква рызгIайта анйара анакIвдыршуз йгIахвитхандзыкIьара автобусква рызпшуа йгылан.

«Анйараква швабыж йджьащахъван, – йгIайгвалашвахуан Микаэль ХIаджьы йпа. – ШвхIаусыгIваквакIла ауи атшын апхьарасахIатква хъызрыпузнадзара астудентква анйараква гьагIврымщтуазтI. ЦIабыргыта йджьащахъван Шолохов, Твардовский, Эренбург, Иванов Всеволод, Паустовский, Чирков Борис, Липкин Семён, датшагьи щардагIвы-щардагIвы урыздзыргIвырныс. АршIыйара знархараз, гвыхътIыла йакIвшуз арат айчважвараква абаза студент йгIайыларцIуз щардан – агвышхвара, ймадзу акIкIара, лкIгIаракI змата анцIрала йгвы гIазрылашаруз анурква».

УадыргIвана, асквш 1958 май мыз агIан, Литфонд Москва, Добролюбов йурам апны быжьбата йаквгылу ацбзазарта аныруыхва амщтахь астудентква заджвы-заджв закI-закI пещ йыртарцIатI рурала-рганла йгIауахвырквын 18 квадрат метркI йнадзауата. «Ауи апш амаль МГУ астудентквагьи йгьрымамызтI», – йгIаликIгIун ЧквтIу М. 

Ари атдзы ахIауа ршIыйарала йшырчвыз араса далачважвахуан ауысагIв: «Уахъгьи тшынгьи ацбзазарта ащхамартан йагIвызадзата быжь ду ахъагылан. ЙтIыз ахъышвква зымгIвагьи йгIаркIылпIлун ауысара ажваква, асатырква, ауысаква, йара ауаса быжь дула, йхътIыта, аджвырагIв йгвы хIасума аъамкIва, хъацIа-хъацIа йрыдгылуан йа йгьрыдымгылуазтI ауысаква! Литинститут апны хъгалра змаз закIзаджвыкI акIвын – бзита йгIвыз, нчвахъвы гIазныпщуаз ауыса!..»

АуысагIв кIьыдата далачважвун ауаъа алекцияква шакIвшуз: «Ауи аинститут апны анахьанат аинститутква рфилология факультетква рпны йызпхьуз апредметква йырхъазымкIва хIырхъысуан ауысара атеория, апроза атеория, адрама атеория; адуней музыка аистория, адуней суратгIвра аистория, адуней театр аистория. Ажва ахъазла, Чайковский П.И. йыхьыз зхъу а-Консерватория, Третьяков галерея, Пушкин А.С. йыхьыз зхъу асуратгIвра азъазара а-Музей, Бахрушин йыхьыз зхъу а-Театр музей рпны хIара архъвыхракви аэкзаменкви хIдыркIуан. Пушкин йыхьыз нкъвызгауа Москва атеатр хIара астудентква йхIчIвыта йхIпхьадзун: хIстудент билетквала ауи атеатр хIцалун…»

ЧквтIу М. йапхъахуз агъын сессия (6 зачёткIи 3 экзаменкIи) асквш 1956 декабр агIан йкIытI – бзита йахъазымкIва, апIатлала дапхъанысуата. Ауи йгIалцIла декабр а 26 йгIашIарышвта январ а 25-дза тшпсищарныс ддырхвиттI. Йуысара дадынхалырныс ахъазла йащтагIайуаз апхьара сквшква руралагьи ауи йызнымкIва йгIайахвуан аршIыйара-тшпсщара мшква. 

Йапхъахауа акурс амщтахь ЧквтIу М. Москва тыдз уыхвартакI апны практика дахъысуата гIвымызкI руацIа (июль-август) дынхатI. АршIыйара-рхарджьра практика йгIвбахауа акурс ацIыхъва Подольск адзахырта завод агазет редакция апны дахъысра атахъын, ауаса агIвгIвчва р-АдкIылара Къарча-Черкес аобласт хъвшара алитература секция рахIварала Микаэль амаль йыртатI Черкесск, абаза газет «Коммунизм алашара» аредакция апны практика дахъысырныс. Йхпахауа акурс данапхьуз ЧквтIу Микаэль Кемерово къала агазет «Кузбасс акомсомолец» зхьзу агазет аредакция апны дырщтитI, йпщабахауа акурс аурала хпрактикакI дырхъыстI: асквш 1959 октябр а 15 йгIашIарышвта а 20-дза Воронеж апны, асквш 1960 январ а 22 йгIашIарышвта а 31-дза Ленинград апны, асквш 1960 апхын – йатаркIвах «Коммунизм алашара» газет апны (Черкесск къала).  

Аинститут аунашвачпагIвчва ЧквтIу М. чва бзила йгIайпшуан. Ауи йаквшахIатпI асквш 1958 октябр а 20 атшын мачвы зцIарцIаз аунашва № 206. Ауи йгIанахIвитI джьгарта комсомол нхари ажвлара нхари дъарылу ахъазла швабыж йшизыразу, йхъатачIв швъаква рабаркIыра апны ауи аразыра швъа шбжьарцIауа. Датшагьи йгIащаквхатI асквш 1960 апрель а 6 атшын йапхьари йаъащакви йгIарыквчважвауата йдрыхIазырыз ашвъа – ауи мачвы ацIарцIара атахъын аинститут адиректор, апартбюро асекретар йгьи апрофком апредседатель: 

«ЧквтIу Михаил ХIаджьы йпа <…> Горький А.М. йыхьыз зхъу а-Литература институт апны асквш 1956 сентяб мыз йгIашIарышвта уахьчIва йъагIадзаздза ауысара хъвшара апны дапхьитI.

Йапхьаща уарыразитI. ЙыршIыйарала дджьгарпI. Ауи йгIвыраква Къарча-Черкес автоном област агазетква йгIарыквшвахьатI.

Джьгарта тшгIайырбитI ажвлара нхара апны. ВЛКСМ акомитет йгьи ацбзазарта астудкомитет рынхара далан. Ажвлара бзазара джьгарта дъарылу ахъазла разыра швъала дгIалкIгIахатI.

АгIвымакъраль Эфиопия дщтира ауысла йыхьыз хIхIвитI». 

Микаэль ХIаджьы йпи сари хIанйаракви хIайчважваракви рпны ауи зынгьи дгьаламчважватI Эфиопия ацара ауыс. Аинститут аунашвачпагIвчва ауи ауаъа дырщтийырныс рмурадта йшвъаква адыргалуазарын, ауаса швхIаусыгIваквакIла йаквымшварныс ауыпI, йгIайыквчважвауата йдрыхIазырыз ашвъагьи гIачIыдахан мачвы гьацIарымцIахтI.

Ауи а-Литература институт апны дъадзапхьуз ахвсквша руацIа зачётта 58, экзамента 31 йкIытI. Ауат йрыуата агIбала «хпа» гIайгтI, а-19-ла – «пщба», ахпала – «хвба». Ауи акIвымкIва йрыхIазыртI йгьи асквш 1961 мартI а 9 агIан «хвбала» йхчатI йдиплом нхара «Йынджьыгь амакъымква» ахьызта, июнь а 6 урышв йгьи совет литературала къральыгIва экзамен йкIын «пщба» гIайгтI, июнь а 20 атшын – «пщбала» йкIытI диалектика йгьи история материализмла акъральыгIва экзамен. Йара ауи атшын акъральыгIва рхъвыхра комиссия рщаквыргылрала литература нхагIвы квалификация гIайырттI, хымшкI анахъыцI – асквш 1961 июнь а 23 а-Литература институт дшгIалгазла адиплом № 514906 гIайнапIыцIарцIатI.

Асквш 1961 Микаэль ХIаджьы йпа йхъатачIв бзазара апынгьи йыршIыйара бзазара апынгьи гIаншарала йырчвын: йуысаква йгIвбахауа разкIкIра «Йынджьыгь амакъымква» гIацIцIтI, Къарча-Черкес педагогика институт апны йынхара джвыквицIатI, унагIва далалтI, йапхъахауа саби дйаутI – йпа Азамат… «Ауи акIвпIта, асквш 1961 сара сбзазара апны насып дудздза гIасыдахIвта йгIалскIгIитI», – абарат ажваквала йалйыргатI ауысагIв йстудент бзазара атурых.