Международное объединение содействия развитию абазино-абхазского этноса «Алашара»

  • Главная
  • International journal «Country of Abaza»
  • Литература институт – абаза гIвгIвчва рылахь апны. ЧквтIу Микаэль ХIаджьы йпа: «Днахвра… хIакъта, Литинститут апны дапхьарныс!»

Литература институт – абаза гIвгIвчва рылахь апны. ЧквтIу Микаэль ХIаджьы йпа: «Днахвра… хIакъта, Литинститут апны дапхьарныс!»

Литературный институт в судьбах абазинских писателей. Микаэль Хаджиевич Чикатуев: «Принять… в Литинститут непременно!»


 

ЙыршIыйара-бзазара йгIаквчважвауата атакIраквала йалу азкIкIра «Ашва зхIвауа агвы» (Москва, асквш 2010) йгIаншвалыз агIвыра апны ЧквтIу Микаэль йгIайгвалашвахуан Ставрополь педагогика институт йапхъахуз акурс данапхьуз агIан ауи «Ленинец шIа» газет аредакция апны алитература адкIылара аунашвачпагIв Гнеушев Владимири рыцIа йахIбаз астудент Романов Игори гIайцхърагIата йуысаква рсатырцIахь атакIраква ширыхIазырыз, Литинститут апны аршIыйара анкъвакъвра далалуата йшищтийыз. Ауи йащтагIайуата йгIаншаз йавтобиография апны араса йгIарбапI:

«Амызква агIвстI. Йапхъахуз акурс хIгIалгатI. ХIаргьи, йгIвбахауа акурс йахъысыз астудентква, аэкзаменква анхIкIы амщтахь зынла «Темижбек» совхоз чвахъыхра хIырщтитI <…>. Бзита йыздырхитI: июн а 20 атшын хIара асовхоз хIаъахьата атшчвахыгаквала йырхуаз ачва хъыхIхуан. Ачвахырта гъвгъваран, йдууын. Саргьи атшчвахъыхга аквчIварта сыквчIва кьахвдза чва хъысхуан, амбатаква сатыр-сатыр рейша йадзхъата йгIащтIасцIун <…>. МызкIы абгата (июн а 20 йгIашIарышвта июль а 20-дза) сынхатI ауи атшчвахъыхгала. Июль а 20 атшын, сымгIващузтын, асахIат а 10-ква рапш, йсыцапхьуз сыгIвзачва Лагунов Саши Останкович Владики гIасыдххылтI. Рлактаква гвыргъьара ду гIарныпщуан – араса йанаъазара хабар бзикI гIаргтI. Атшчвахъыхга гIашIасрысын кьахвдза сгIакIапатI.    

– Миша! Миша! – хIва йацшIакIта йгIацIрытI. – Ставрополь уцара атахъыпI, деканат апны. Литинститут аршIыйара анкъвакъвра укIылстI, июль а 27 атшын Москва уаъазара атахъыпI!»

Йара ауи атшын дакъикъакIгьи дымкъвауата Микаэль Ставрополь дцатI, ауыла дтыцIхын – йцри ЙынджьыгьчкIвын кыт, йхабар бзи йан йылзигатI. Ауыгьи лпа дйыздзыргIвытI, ачвчIвыс лтйытI, лпа сам гIвышв йнапIыцIалцIан мгIва дыквлыжьтI.

Июль а 27 атшын, йшгIайархIвыз апшта, ЧквтIу Микаэль Литинститут аудиториякI апны ауысагIв Коваленков Александр йпахь дчIвата дгIайачважвун. АзцIгIара-джьауапла йалу айчважвараква араъа апхьара йгIацIалуа зымгIва рыхъазлагьи йхачIвборчу рхъвыхгапI, аршIыйара анкъвакъвра амщтахь абитуриент йдырракваква, йлитература лшараква знархару йгIвбахауа рхъвыхгата йгIайитI. Коваленков А.А. Литинститут апны уысарала асеминарква друнашвачпагIвзаджвын, ауыгьи дрылата арыпхьагIвчва абитуриентква йанрачважвара амщтахь ргвгIанагра ашвъа йаныта аршIыйара кафедра йрыртуан. ЧквтIу Микаэль уацIыхъван йшгIайдырхызла, Коваленков йгвгIанаграква сатырквакI йыртайыршватI: «Зхъвыцща цIабыргу, зхъа йайгвыгIвуа дщхъабзазагIвпI; зынла йубитI ауысара ачIвец шйылу, бзи йбитI КIавкIазгьи, Пушкингьи, Лермонтовгьи. Толстой Лев йгIвыракванадзара дрыпхьахьатI! Джьащахъвата далачважвун «ХIаджь-Мурат». Сшхъвыцуала, закI гIайылцIуаштI».

Йара ауаъа, аршIыйара акафедра апны, ЧквтIу Микаэль тшрыхайыргIвазатI аршIыйара анкъвакъвра йгIайщтийыз ауысаква йгIарыквчважвауата йщтIаз ашвъаква. Ашвъаква йыравторын Журавлёв Василий йгьи Щипачёв Степан. ЙгIвыджьхуз аэксперт йрецензия арат ажва рейшаквала йнайырдзахтI: «ЧквтIу Микаэль Литинститут дгIахвра атахъыпI, ауи хIакъпI!» 

«Ауи ажванахъа Степан Пётр йпа къарандаш къапщыла гIван дацIачIвагъвахтI…» – йгIаликIгIауата йхIватI ауысагIв йгIагвалашвахраква рпны.

Архъвыхра айчважвара амщтахь цIаста йщаквгылаз аэкзаменква ракIвын йакIвшуз, Микаэль ауат йкIын йапхъахауа акурс дапхьауа далагатI.

МагIны амата йхIпхьадзитI ауыс абари ахъатагьи: ауи асквш аршIыйара анкъвакъвра йалалуата ргIвыраква рщтитI уагIа 3000-гIв, ауат йрыуата йнарахвыз 116-гIв ракIвпI, аэкзаменква рымщтахь йатаркIвах 86-гIв гIахъшвалын 30-гIв ракIвпI йгIанхаз. «УагIа 30-гIв – ари апхьадзара ансисквша Литинститут йнарахвта йстудентхауа рпны тшзымпсахуа пхьадзарапI. Ауи Совет Союз шабгу гIацIанакIуата! Абари апхьадзара хвыц салашварныс сынасып йгIанакIытI сара ащхъа абаза кыт йауу ачкIвын – Къарча-Черкес апны зымгIва срапхъахауата! ГвынгIвырапI сара ауи швабыж сшайгвыргъьуз йгьи сшаладухуз! Ауи йгIалцIла швабыж сахъуан анахьанат а-29-гIв сгIархьымшвауата бзита сапхьарныс ахъазла. ЙшпакIву ухIварыквын сабаза уагIа хвыц йгьырхъазымызтI, Къарча-Черкес шабгу рыхьызла сапхьун ауаъа!»

Абараъа ЧквтIу Микаэль йбиография аквчважвара зныкI ахъазла йгIашIахIрыспIта Литинститут архив апны йынкъвыргауа ауи йхъатачIв швъакви апхьара швъакви тшырзынахIырхапI. Ауат ашвъаква йхIзыгIахъыртIитI аршIыйара ахъа йгылаз абаза уысагIв акъраль апны хъгалра змаз йхIаракIу апхьартаква йрыуазакIу дшыцIалыз атурых амадзаква, йара йбзазара йауу анапаквагьи рыцIа йауацIырхитI, Ставрополь педагогика институт дшапхьузымцара Литература институт дшнарахвыз атурых рылахIзырхъвыхитI. ЙгIалкIгIара атахъыпI ауи агIаншара апхъала адгалра нхарата йакIвшазгьи шмачIмыз.

Йапхъахауата, ЧквтIу Микаэль ахIвара швъа йгIвыта Черкесшта алитература адкIылара тшырзынайырхара атахъын ауатгьи дара рыхьызла ахIвара швъа шгIайыртуаш апшта, ауи ари ауыс асквш 1956 агIапын агIаталымта йаквйыршватI. МартI а 21 атшын йакIвшаз Черкесшта аобласт адкIылара абюро алачIвара йалан Гъвашокъва ХIвсин, Абдулжалилов Фазиль, Атмакин Иван, Охвта АбдулахI, Джьгватан Къальи. Абар йызлапшыз ахIвара швъа ауысла ауат рщаквыргылра йгIанахIвауа:

«ХIрыхIвитI СССР агIвгIвчва р-АдкIылара а-Ставропольшта хъвшара СССР агIвгIвчва р-АдкIылара асекретариат тшырзынадырхарныс зыршIыйара джвыквызцIагIвацаз абаза уысагIв шIа ЧквтIу Михаил ХIаджьы йпа Литература институт дшнарахвуашла йыхьыз гIадырбарныс – ауи асквш 1938 дйытI, дабазапI, асквш 1939 йгIашIарышвта ВЛКСМ далапI, апхьарта 10 класскI дгIарылгатI, аобласт газет «Социалист Черкесшта» аредакция йадкIылу алитература гвып дрылапI, асквш 1951 йгIашIарышвта ауысара дадынхалитI, уыса 50 раъара йыгIвхьатI.

Аобласт газет «Социалист Черкесшта» аредакция йадкIылу алитература гвып аунашвачпагIв, алитература гвып абюро йалу Джьгватан Къальи йыхъвдаквхIцIитI ЧквтIу М. СССР агIвгIвчва р-АдкIылара йадкIылу Горький йыхьыз нкъвызгауа а-Литература институт днарахвырныс ахъазла гIарбага швъа йгIвырныс».

Апротокол ацIахь йымачв ацIан алитература адкIылара аунашвачпагIв Гъвашокъва ХIвсин.

Астудент ЧквтIу М. йхъатачIв швъаква йрылапI абаза газет йадкIылаз алитература гвып рыхьызла Джьгватан Къальи йгIвыз агIарбага швъагьи:

«ЧквтIу Михаил асквш 1952 йгIашIарышвта джьгарта далапI ари алитература гвып рынхара. Ари азаман ауацIа аобласт газет анапаква йгьи Черкесшта гIвырагIацIщтырта апны йгIацIцIыз азкIкIраква йгIарыквшватI ауи йуысата 50 раъара.

Йуысаква рпны ЧквтIу М. абзазара гIаншараква рмагIны гвацчпа амальла йшгIахъитIуаш дащтапI. Ужвыгьи йщаквымгылс йыршIыйара джыпха йгIаныпщитI ауысагIв шIа йхъатачIв лахIвараква, йдунейпшыща. ЧквтIу М. йаъащала аршIыйара дазычпапI йгьи йылшуштI загIа йнадзаз длитераторхарныс. 

ЧквтIу М. дашIамсуата йдырраква йрылайырхIитI – дапхьитI, ауысара апны йъазара щтIихитI. УахьчIвала ауи Ставрополь педагогика институт йапхъахауа акурс дапхьитI.

Алитература гвып йшырпхьадзауала, ЧквтIу М. йапхьара Горький йыхьыз нкъвызгауа а-Литература институт апны йнайырдзахра атахъыпI, йшпакIву ухIварыквын литература акIвпI йхъатачIв бзазара апны уыс хъадата йгIаликIгIауа.   

Алитература гвып йацшIакIта ЧквтIу М. Горький йыхьыз нкъвызгауа а-Литература институт днарахвырныс йахIвауата йыхьыз гIадырбитI».

Ашвъа анхIазырха атшын гьаным, ауаса алитература адкIылара абюро алачIвара йащтагIайуаз амшква йырхърымгахуата йшдрыхIазырыз гвынгIвырапI, датшата йухIвушызтын асквш 1956 мартI а-20-ква рагIан.

Литинститут адиректор йыхьызла йырщтийыз ашвъа йымачв ацIапI Ставропольшта агIвгIвчва р-АдкIылара ахъвшара асекретар Туренской В.И. Ауи араса йгIанахIвитI:

«ЙшвзынахIщтийитI абаза уысагIв шIа ЧквтIу Михаил ХIаджьы йпа йахIвара швъа, йуысаква, ауат ратакIраква йгьи йуысаква рсатырцIахьква.  

АршIыйара анкъвакъвра далажвжьырныс хIнашвыхIвитI.

ЧквтIу М. дамайчуа, ауыс дазгIашыкъта дынхитI, Черкесшта литература адкIылара йшгIадырбауала, зылшараква дуу  дуысагIвхушта уйайгвгъа йауаштI, джьгарта далапI ЧквтIу М. Ставропольшта чкIвынргIа ргазет «Ленинец шIа» алитература гвып анхарагьи.

ЙшIаркIву абаза литература уахьчIвала Литература институт йгIалгаз авторкIгьи дгьалам.

ЧквтIу М. аинститут дыцIалуазтын ауи абаза литераторква зымгIвагьи цхърагIара дута йырзалуаштI».

Ашвъа апрель а 2 йдрыхIазыртI. Ауи акIвпIта, ЧквтIу М. йшвъаква Литература институт асквш 1956 апрель йапхъахауа амшква рагIан йырщтитI, ауи ахIатырла гIващарапI йара йавтобиография йгIанарбауа ажванахъа – йшвъаква мартI мыз йырщтита.

ЙащтагIайуаштI...