Сайт Международного абазино-абхазского культурно-просветительского объединения «Алашара» - View News

Международное объединение содействия развитию абазино-абхазского этноса «Алашара»

Акомпозитор Аджапуа Тото сквшы 80 йхъыцIтI

Композитору Тото Аджапуа – 80 лет


МартI а 10 сквшы 80 йхъыцIтI Аджапуа Тото Тараш йпа. Ауи йыртшхъвагаква, ъанатIата йынкъвигаз, йауыру йыршIыйара бзазара апны чIахIныгIва хьзыта йгIайквнадыргаз рашIыпхьадзара ауырапI: «Апсны Республика азъазара гIатгара зму анхагIвы», «Апсны Республика ауагIа рартист», Адгьыл ауагIахъаква рацзакIыра Адуней академия дакадемикпI, СССР акомпозиторква р-АдкIылара далапI, Апсны Республика акомпозиторква р-АдкIылара апредседатель дитарагылагIвпI, ареспублика амузыка фонд даунашвачпагIвпI, аконцерт гвып «Ашва хIва, Апсны!» даунашвачпагIвпI, Апсны арра дамайорпI, РФ а-Къазакъ экономика адкIылара дагенерал-майорпI, Апсны КъральыгIва филармония дашвахIвагIвпI, Апсны Республика аорденква «Леон», «Кърар йгьи чIахIныгIва», амедальква «Аркъвырльыкъв хьызхIвага», «Абашта ачIахIра ахьызла», адуней хьапщ орден «Сгвы асабиква йрыститI» дрынкъвгагIвыпI, асогIат «Айсра асквшгIвыра» далауреатпI, Адуней анкъвакъвра «Нальчик – анасып наль» Дуней анкъвакъвра далауреатпI йгьи ауи ахьапщ медаль данкъвгагIвыпI, апсуа музыка ацхърагIарала агвчIагIвчпара фонд «Тото Аджапуа» дапрезидентпI.  

Апсуаква ари апш ажважв рымапI: «АцIла злащаквгылу щайдзапI, агIвы дызлащаквгылу ъахIыльчвапI». Аджапуа Тото йгви йпси ркъару, йгIвычIвгIвысагIа агвапара, зынгьи йалагIваласуа лахIварала йырчву йдунейпшыща гIазхъшахъыцIыз адуней дгIаквызцIаз йгьи дгIадзынзыргылыз атшгIва акIвпI. Тото Тараш йпа ймагIну цIолата йгIаугвынгIвра ахъазла Очамчыра район ащхъа кыт Отап уазынадзата угIакIвшара, ацIисква рашваква, адзгIакIажжырта цкьадзаква рбыжьква урыздзыргIвра атахъыпI.

Аджапуа Тото сквшышв айхIа нызцIыз йбергьльу Апсны абзазагIв Аджапуа Тараш дипапI, йан Багателия ткъвым дауапI.   

Тото дсабиищтара музыка бзи йбун, йани йаби рунагIва уагIа музыка ршIыйарала апхьарта гIальаматта йзалтI. Амузыка аниъачIвагIаха дгьчкIвынхмызтI. Данстудентыз агIамта йапхъахауата йашва «Санду» алайцIатI, ауи ажваква ауысагIв Гургулия Б. йчIвын.

Асквш 1964 агIан аинститути аучилищи дацгIарылган Аджапуа Тото Тбилиси КъральыгIва консерватория ашвахIварала ахъвшара дыцIалтI. Ауи дйарыпхьагIвхатI йбергьльыз аопера ашвахIвагIв, СССР ауагIа рартист Амиранашвили П.

Хъвлапныла Тото Тбилиси аопери абалети ртеатр дцалун, ауаъа ауи йбергьльыз ашвахIвагIвчва дрыздзыргIвуамцара ашвахIвара азъазара амадзаква ййырдыруан. АшвахIвагIв шIа бзира щарда гIайыланацIатI адрама театргьи. АуагIа рпхыцIаква ъанйуз, абзии ачвгьи айрышта йъапшIагылуаз аспектакльква йбзазара лахIвараква дрыцIолун. Амиранашвили йпны гIвысквша данапхьа амщтахь апрофессор Шведов Дмитрий йпны дапхьауа далагатI. Ауи Апсны щарда цIуата дапщылан, йапхъахауа апсуа опера «Аламыз» даавторын.

АшвахIварала аконсерватория класс Аджапуа Тото асквш 1969 дгIалган йхIаракIу адырраквала йгIвбахауа адиплом гIапшцIигатI. Апсны дангIайх амщтахь Тото Апсны къральыгIва филармония апны гIвысквша райхIа ашвагIаларышвыгIвта дынхатI. Ауи йаццауата Согъвым музыка училища апны ашвахIварала йайрыпхьун. Ауаса йпсы бзи йабун рыцIа йхIагIу азъазара дадынхалырныс. Аопера спектакльква дрылазларныс йтахъыта Тбилиси аопери абалети ртеатр атруппа дрыцынхауа далагатI.

Асквш 1970 Аджапуа Тото йапхъахауата Палиашвили З. йопера спектакль «Даиси» апны йхъадаз атурасы Киазо йбжьыла дгIахъвмартI. АшвахIвагIв, актёр Аджапуа Т. ари асцена турасы анадзара хIаракIыта йгIайырбатI. Зкъару мчыз ауи йбжьы аспектакль агIаншараква йрыквшвауата акъральыгIвчва агъа йабакIырныс йаквгIазшIнатуан. Йквпшыралагьи, йхIаль-шанлагьи, йыршIыйара аъащалагьи Аджапуа зтурасыла дгIахъвмаруаз айсыгIв хъада Киазо дйыквшвадзун.  

ЙащтагIайуата ауи ддрайгватI йжвежвхуз асквшышв йбзазуз йбергьльу аитальян композитор Джузеппе Верди йопера «Травиата» апны рыцIа йалачпу Жорж Жермон йтурасы дадынхалырныс.   

ГIамта айшысла Аджапуа Тото ахор капелла аконцерт нхара дхънахтI, ауи даунашвачпагIвхатI йгьи дашвахIвагIв хъадахатI. Аджапуа друнашвачпагIвта акапелла концерт 1500 райхIа арттI. ЙалкIгIата чIахI ду аквнагитI ауи йыршIыйара абари ахъата.

Аджапуа Т. йгIанйыршуз ауарадква аздзыргIвчва ргвы ласдза йазынадзун. Ауат ашваква йрыуапI «ЙузысхIвитI сашва, Апсынра», «Апсны», «Апацха», датшагьи щарда. Арат ашваква зынла йбыжьгауа йджвыквылуан апхьарта хорква йырхIвауатагьи хъатачIв гIаджвыквцIарала йгIаншуз агвыпква йырхIвауатагьи.

Тото Тараш йпа йбзирала датшагьи адунейла шIырпшыра змам концерт гIахъвмарыртакI рзыгIаншатI ахор капелла. Зунашва хIхIвауа йгIважвахауа асквшышв й-70-хауа асквшква рагIан лапшыртата йырчпаз Афон ШIыц ахIатшпы акIвпI. Апсабара ари аджьащахъвара рылала йырбарныс араъа йгIайуан, уахьчIвалагьи йгIайитI Совет Союз йабзазагIвчваз йырхъазымкIва агIвымакъраль хъараква йгIартыцIуа агIамдагIвчвагьи. 

«Уахъынлата зны схъа йгIаташватI ахIатшпы ауацIа акапелла аконцертква гIахIырбаларныс», – йхIвитI аюбиляр. УадыргIвана акапелла адирижёр Судаков В. дйыцта агIвыджьгьи культурала аминистр Аргун А. тшизынадырхатI. АхыгIвгьи ацыта ахIатшпы йазцатI, йангIалуа уатыкв кIьыдакI гIалырхын дара-дара ашва рхIватI, ахIатшпы ауацIа абжьы шщаквгылуа дырхъвыхтI. УадыргIвана адгьылцIахь апны акапелла йакIвдыршуз аконцерт джьащахъваква рхабар адунейла хъарата йгатI. Аконцертква рунашва Совет Союзу ахабарргагаква йырхъазымкIва агIвымакъраль хабарргагаквагьи йгIарыквшвун. Апрограмма джьащахъва йахъвхъадата сквшщарда рурала йщаквгылан «Ахвра ашви» «Апсуа хъвмарра ашви», Аджапуа Тото ауат быжь пшдзала йгIалайрышвуан.    

АшвалацIара дъахънахуаз ахъазла ауи апхьара атагIащтIиххтI – Тбилиси консерватория акомпозитор хъвшара дыцIалын асквшква 1971-1978 руацIа дапхьатI. Композиция класс апны ауи арыпхьагIвта дйыман Грузия йгьи Апсны азъазара гIатгара змаз анхагIвы Шаверзашвили А.В.

Ауи диплом нхарата йадигалтI гIвкантатакI: «Апсуа чIвыла ашвахIвагIв» (ажваква Гулия Д. йгьи Амаршана В. йырчIвын) йгьи «ХIпсадгьыл ахъазла ахъвыцраква» (Щынквба Б. йроман «АцынчIварах» гIазквчважвауа агIаншараква рыщтала).

Аджапуа Тото ршIыйара нхарата 600 райхIа дыравторпI. Ауи ъамапсымала йаныргIалу амузыка алайцIитI, асабиква рыхъазла ашваква дрыдынхалитI, ауаса йалкIгIата айхIара дхъызхуа акантатакви ашвакви ракIвпI. ЙыршIыйара йауапI акантатаква «Йдуу Апсуа бльын», «Абрыскьал», «Эшба Ефрем», «Уарбану?», ахореография сюита «НартргIа», афлейти афортепиани йацгIартырщтуа асоната, афортепиано йанархару 8 вариациякI, «Апсуа литургия ашвахIвара», акантатаква «Члоу», «Отап», «ЙумагIныйа?», «ХIпсадгьыл ахъазла ахъвыцраква», асимфония оркестр ахъазла «Апсуа мшыркъвара ашва». Амузыка апхьартаква рапхьагIвчва рыхъазла фортепиано пьеса 80 райхIа гIанйыршатI. Асквш 1988 агIан ауи ашва 62 йгIвытI апсуа алфавит ахIарыфипхьадза йазынайырхумцара.

Ахореография сюита «НартргIа» а-КъральыгIва ансамбль «Шаратын» йдыргылын Апсны апны йахъазымкIва Венгрия, Индия, Шри-Ланка, Швеция, Франция, Норвегия, Финляндия, Алжир, Тунис, Марокко, датшагьи къраль щарда рпны йгIадырбауамцара йакIвшатI. Ауи акIвпIта, апсуа уагIа эпос адунейла йыргара, ауи атурасква гIахIвра джыпха йтагылата ргIаныршара ауыс йпшдзу, йлашару, йласу ймакъымквала йхатI алайцIатI акомпозитор Аджапуа Тотогьи.

Артист, актёр Аджапуа Тото уахьчIва йъагIадзазгьи амузыка дадынхалыркIвитI. Апсны амузыка азъазара атшауацIыхра йалацIара гIапхьадзахауата Апсны ЙхIаракIу а-Совет а-Президиум а-Унашвала йагIвсыз асквшышв й-80-хауа асквшква рагIан Аджапуа Тото йквнадыргатI ачIахIныгIва хьзы «Апсны азъазара гIатгара зму анхагIвы». Асквш 1992 агIан Апсны а-Министрква р-Совет а-Щаквыргылрала ауи йквнадыргатI Гулия Д.И. йыхьыз зхъу а-КъральыгIва согIат.

Асквш 1992 аквырджь айсыгIвчва Апсны амарагIатшкIарыцIырта чIвыла йгьи Согъвым ркIытI. АуагIа ргвала лашараква акIьагIваса квайчIви айсра ащи йхъыргIватI. Ауи азаман Апсны ахъахчара Министерства ацхърагIарала Аджапуа Т. йпа Олеггьи дйыцта айсыгIв ансамбль «Аиааира» ъагIандыршаз Гудаута агъа йкIыз ашта дгIатыцIын дгIайтI йыгIвза, акомпозитор, ареспублика азъазара гIатгара зму анхагIвы Ченгелия Константин. Абгата йгIанхаз ашвахIвагIвчви агIахIвыгIвчви адыркIылхын шIыцта йаларцIаз ашваква йрыдынхалуа йалагатI. ГвынгIвырапI ашваква апатриот фырра нархара шрымаз, датшагьи арепертуар йалан апсуа айсыгIвчва рхъацIари рфырри йырзынархаз апхъанчIви уагIа ашваква.

Ансамбль щардала йгIахъвмаруан Гумиста атланыкъвала зпсадгьыл йазгылаз Апсны айсыгIвчва рпахь. Амаль анырзыгIаншуз аконцертква радиуалагьи телебаралагьи йгIартуан, ауагIа ргвы алагIащтIырхуан. Ауи ауысла «Аиааира» ансамбль агIатгараква рыхв швабыж йдууын.

ХIпсадгьыл ахъазла йхьантаз ауи азаман йалкIгIата тшгIахънатIытI айсра апхъала агалагьи йпасата йбагъьахаз Аджапуа Тото йшан.

Айсра ъадзакIвшуз Аджапуа Тото йыквлагIвчвагьи йыцта рахIа йшварагIвараз айбащраква ъакIвшуз ашIыпIаква гIамырдатI, ауат йамайчуата рашваквала агъа йпшIагылан. Ауи асквш аурала йбыжьгун йара йажваквала йгIанйыршаз ашваква «Апсуа дъанызлакIгьи», «АщхъагIв» батальон», «ЙгьагIвхIщтуашым», «ХIахщчва», датшагьи щарда.

Айсра йазынарху ашва абаркIыра йрылапI Аджапуа йашвакI ажваквагьи йара йчIвыта. Ауи мартI мыз агIан Согъвым йанагвыквс йаладзыз ачкIвынчва йырчвахъабагапI, йахьызпI «Акъва». Йара ауаса угвы ацIгIвадза йнадзауата йаъапI «Айщчва рашвагьи». Ари ашвала акомпозитор рфырра щтихтI апсуаква йырцхърагIауата йгIарыцIагылыз, агъа йпшIагылыз райщчва – КIавкIаз шла апачва.

«Апсны Республика агIахчара апны йгIайырбаз ахъацIари афырри гIапхьадзахауата» асквш 1998 сентябр мыз агIан Апсны Республика а-Президент й-Унашвала акомпозитор йквнадыргатI Леон йорден.

Ужвы азаман Аджапуа Тото Согъвым азъазара апхьарта а-ЧIахIныгIва унашвачпагIв ъанатIа нкъвигитI, ашвахIвара йгьи акомпозитор хъвшараква друнашвахъцIагIвпI, аконцерт нхара йхъвдаквцIарапI.

Сквшы 80 ракIвпI уахьчIвала Аджапуа Тото йхъыцIуа. Ауи хъацIарати багъьарати йынкъвигауа анубара кьангьаш гьазгIаугуам асквшышв юбилейгьи абараса йкъару тата дшазынадзуш.