Международное объединение содействия развитию абазино-абхазского этноса «Алашара»

АпхъанчIви хабарква йрыуата

Из преданий старины

Апсны апны йбергьльыз ауасаражв Колги Халит Мсурат йпа сара ссабийищтара дыздырхитI. Саби йари бзита йабадыруан, йащтаныкъвун, щардала хIпны дсасуан. Халит дуасаражвын, ауагIа ршIалахIвара бзидздзата йдыруан. Ауи йгIахIвахраквала апсуа уагIа ршIалахIвара шбайу уылаухIвун. Саби ауии хъвлапныла ацIх йаласкIьакIьандзыкIьара айшва йадзхъачIвата йапшым хабар джьащахъва щарда рхIвахуан. Ауат рыуа щарда здырхитI.

Асквш 1986 агIан йбергьльу апсуа этнологква Акаба Л.Х. йгьи Бигуаа В.Л. сыцта Колги Халит Мсурат йпа йцри кыт Абгархук хIцан хIйынйатI. Ауи асхъан Халит Мсурат йпа сквшы 86 дыртан.

Сара ауи йхIвуз швабыж йсымагIальаматта саздзыргIвуан, ауаса, ага йгвасразтынгьи, йсзыгIвыз мачIпI. ЙзгIвыз йрыуата гIахIвахракI швгватра азынасырхитI.

  

Бзира чпата адзы йатх

 

Апсны апны даъан-дбзазун пIатIу ду нкъвызгуз хъацIакI. Ауи хыгIв пачва йыман. Йпачва андуха мгIва йыквылныс йадигалтI, сом хвышв-хвышв ритын араса райхIвтI:

– ШвымгIвайс, кьахвта тшпсшвща, ауаса ахча швахьымсын, абгата йгIацашвырпах.

ЙпахIба дангIацапах асхъан аба араса дицIгIатI:

– УышпагIамда, сычкIвын?

– Сара бзита тшпсщатI, ауаса ахча сгьахымстI, йшсымаз сгIацапахтI, – йхIватI апа.

– ЙахьчIва йнанаркIыта уара хIунагIва уаъазлуштI, – йхIватI аба йпа тшизынайырхауата.

Аквтанайгьи йахча шйымаз дгIайхтI. Аба ауыгьи йайхIвтI ауи атшын йгIашIарышвта рунагIва дшаъазлуш.

АйцIба дангIайх аба ауи араса дицIгIатI:

– Уара йучпа ачIвыйа щта?

– АуагIагьи збатI, ахчагьи салгатI, – йджьауапхатI апайцIба.

– Ахча йалаучпа ачIвыйа? – йхIван дазцIгIатI аба.

– ГIвычIвгIвыскI дпсыта сйыквшватI, ауи псарчIвыта сом пщышв йыквын. АпсарчIвы зитхра атахъкваз апсы йъахIыльчва йгIархъатачIватI рахча рыртхырныс ахъазла. Сара ауат асом пщышв рысттI рпсарчIвы аларшвахырныс, йгIанхаз асомшвкIгьи апсы далагвындыргIвныс йрысттI.

Арат ажваква рымщтахь аба йпайцIба йайхIвтI ауи атшын йнанаркIыта аунагIва апны йпшвыма хъаду ауи шйакIву.

Зны апайцIба гIамдара дджвыквылтI. ДшымгIвайсуазымцара ауи хъацIакI дйынйатI. АчкIвын агIамдагIвы ймагIныз дазцIгIатI, уадыргIвана дызламгIвайсырныс рыцIа йагъьу анархартала дйайкьангьаштI.

– АмарагIацIцIыртала уцарныс шварагIварапI, ауыла заджвгьи дгьгIацапахуам. Ащхъаква рахьылагьи шварагIварапI. Амараташвартала уымгIвайс йауаштI, – йджьауапхатI агIамдагIвы.

– Ауи асхъан сара амараташвартала сцуштI, – йхIватI апайцIба.

– Саргьи суыцнайуаштI, гIвзата суыцгIамдуштI.

– Унай, – дадгылтI ачкIвын, – ауаса закIыла суангIалырныс стахъыпI: йгIахIнапIыцIашвауа йачIвызлакIгьи йаъарата йагIвхIшуштI.

Абараса йангIалын ауат амараташвартала йджвыквылтI. Ауат мгIвайсуамцара абзазагIвчва зымгIвагьи джьабара чгIвыча ъанкъвыргуз ахIыгIвакI йтанагатI.

АхI йхъатала ауат дгIарпыралын йрайгватI. АчкIвын дазцIгIатI ауагIа зджьабауа ашвхIаусыгIва.

– ХIара нагIлат гIахIархтI. Сара пхIа пшдзакI дсымапI, ауи зымгIвагьи гIалайлахIитI, ауаса хъапщылата дызгауа зымгIвагьи пситI, – йджьауапхатI ахI.

АхI йпхIа даниба ачкIвын бзи дибан пхIвыста дгIайгтI.

Хъвлапны аннадза ачкIвын йыгIвза ауахъ ашв цIапха шайымтуаш йайхIвтI. АчкIвыни апхIвыспи анычвх амщтахь ахъацIа йыкъама хIазырта йымата ауат ъачвуаз апещ днашылын апхIвыспа длызцатI. Ауи асахIат апхIвыспа лшIа ащтанчIвыкI гIатыцIтI. АхъацIа ауи ахъа хъирышвттI, уадыргIвана йыгIвбахузгьи йхпахузгьи гIаншатI. Ауатгьи рхъаква хъисатI. АчкIвыни апхIвыспи ычванта закIгьи гьрымбатI.

Ащымта ахIыгIва абзазагIвчва ачкIвын дабгата, дызгIвадата данырба швабыж йгвыргъьатI. АхI агвыргъьара далата ачкIвыни апхIвыспи ахчагьи согIагьи щардата йритын ачкIвын йыгIвзагьи дрыцта йгIайдасхтI. ЙгIамгIвайсуамцара ачкIвыни  аахъацIи ъашIашваз ашIыпIа йгIадзатI. Араъа агIвза дыркъвыцIхырныс йгвыгъьата агIвыджь тшгIарзынайырхатI. АчкIвын ауи дарынашхыйатI – йыгIвза дауищтхырныс гьитахъымызтI, ауаса ауахьауи дгьадымгылуазтI. УадыргIвана ачкIвын ауат анашIашва йызлангIалыз гIайгвалашвахын апхIвыспа дагIвыршара шатахъыз йхIватI. ЙыгIвза апхъапхъа дкшарныс йтахъыта йакъама апхIвыспа лхъахьла йанщтIих ауи лшIа ащтанчIв квтIагъьква гIатпIлатI. Йакъама йгIванхуз йанщтIих лшIала аща гIаджвыквылтI. Ауи амщтахь ахъацIа ачкIвын дщаквикIуата йайхIвтI ужвы апхIвыспа дйыцта закIгьи дахъымгвыргIвауа йунагIва дадгылх йшауаш.   

– Уара бзира щарда сзухатI, ауаса сара уара уыхъазла закIгьи гьсылымшастI, – йхIватI ачкIвын. 

– Уара уангIамдуз хIадагIвачата стгIачва угIарыднагалтI, спсарчIвы ушвахтI, спсхъа зландыргIалуашыз ахча руттI, ауыла спсы уыртынчтI. Уара рыцIхIагIа уашIашвушта йаныздыр саргьи закIыла суыхъварныс стахъыта суызгIайтI, – йхIватI ахъацIа.

«Бзира хата адзы йатх, абзазара апны ауи ажва аламкIва уанйахуаштI йгьи йгIауцхърагIахуаштI», – рхIвитI апсуаква.

Асквш 1990 агIан хIара Черкесск къала апны гIарбарта адыгIгалтI араса йахьызта «Апсуаква рнапIлачпара ршIыйара азъазара». Ауаъа йгIахIырбатI Апсны къральыгIва музей ащтацIарта йгIахIахвыз апкъыгIваква. АгIарбарта амщтахь съахIыльчва рахIбадза Ахба Уасман йпны Хъвыжвду хIцатI. Ауи ауырата хIйыдзхъачIван, щардагьи хIрылачважватI. Колги Халит хIшынйазгьи йасхIвтI, ауи хIпны даъата йанйахьанта дидыруан. Уасман швабыж йгвапхатI Халит йгIахIвахра, уадыргIвана йгIаликIгIатI абазаквагьи йара ауи ажважв шынкъвыргауа: «Бзира чпата адзы йатх».

 

Асурат дгIанарбитI Колги Халит.