Сайт Международного абазино-абхазского культурно-просветительского объединения «Алашара» - View News

Международное объединение содействия развитию абазино-абхазского этноса «Алашара»

СураткI атурых

История в одной фотографии

ТгIачвипхьадза щарда зхъыцIуа асуратква йрызсакъуа йынкъвыргитI, йалкIгIата бзи йырбауа, хвду зквырцIауа рцри гIвычIвгIвысква йырчIвызтын. Ажва аламкIва ауат йрыуата йаъапI апхъала бзазара гIазырбауа, турых магIны зму. Асуратква уырхъвыхуа уалагарквын атгIачва ртурых алагIащаквыргылх йауаштI, йгIаншитI ауат йрапшу асуратквала акъраль атурых анузыгIащаквыргылхуагьи. ЙалкIгIата, магIны рзыгIбитI адуней йыквхым хIапхъанчIвиква рсуратква.  

ХIара хIтгIачва суратква йрылата йджьащахъву сураткI сыла йгIацIашватI. Асурат йанкву рыуа азаджв – Ахба Ражден – йшихIвахуала, ауи асквш 1934 агIан йхъырхтI. Асурат хгIвы аныпI, ауат Ачандар апны йгылу, зхIагIара метр 50 айхIа йнадзауа ацIла ду адзхъа йгылапI. Апхьахьаква йшырхIвауала, ари ацIла ныбыжьта йамапI сквшызкь райхIа. Асурат ъахъыху ахакв зынзаман ахI Ачба Бата йчIвын, ауи асквш 1937 агIан сквшы 96 йныбыжьта дыркIытI. АхIбачва йшырхIвауала, Абашта айсра Ду агIан ащхъахъысыртаква гIазхчуз айсыгIвчва акыт йангIабгъалрыз ацIла ащапIкIынхIара ауацIа мца ацIырхъиуан, ацIлагьи йызнымкIва амцаблыра йнанауахвуан. Ауи йгIалцIла акIынхIара хметркIи бжакIи йнадзандзыкIьа йалахIатI. Араъа тшыгIвта узыцIагылитI, машинанадзарала хвитта акIынхIара уызкIылсуаштI. Йшцауала, ари ацIла ду щъата йазалуа ачва жвпIа акIвпI.   

Асурат йанкву рквтала атшы йаквчIву Ахба Бирам йакIвпI. Ауи арепрессияква дрылашватI, асквш 1937 агIан щра йыквырцIатI. Армали агъьмали асурат йгIанарбаквауа Лагъь КIавкIаз йауу сасчвапI, сабаду Шварахи йащайцIба Бирами рынбжьагIвчва аргванква ТекеевргIа агIвайщчва ракIвпI (йалныс ауыпI айщчва рыуа азаджв Халид йыхьызхарныс). АцIла йыквчIву ачкIвынхвыц Ахба Ражден йакIвпI. Ауи Абашта айсра Дугьи дпшцIан, дгIацапахын дъадзабгаз йтгIачвагьи йаргьи Ачандара кыт йтабзазатI. ТекеевргIа айщчва йрынбжьагIвын датшагьи Колги (Колбая) Мсурати ауи йпа Халити. Сабадуи ауи йащи щардала йрызгIайлун асасчва тлапIаква – рынбжьагIвчва абазаква, адгьаква, акъарчаква… ХIткъвым рнышвынтара апны абазаквагьи ыцIапI, ауаса ауат рхабар заман щарда ъахъыцIуа йгIалцIла йырмагIнугьи рыхьызквагьи гьхIыздырам.