Международное объединение содействия развитию абазино-абхазского этноса «Алашара»

Апсны апны аджьузымрхарджьра атурыхи атшауацIнарыхри

История и развитие культуры виноградарства в Абхазии


Апсны акытмлыкврхIара апны аджьузымрхарджьра анархарта ауралагьи амагIны дууын. Ауи йацхърагIун араъа йщаквгылу асубтропика псабара ахъгалраквагьи.

Апсны апны аджузым апхъанчIви заман йшгIаншаз йаквшахIатпI йбайу археология йгьи афольклор-бызшва рхъвыхра гIарбараква, агIвыра гIалцIыртаква. 

Аджьузым апхъанчIвидза заман йгIашIарышвта АпсынчIвыла апны йшгIайуаз рзахвахитI Согъвым ботаника цIлауатра апалеоботаникква, апрофессорква Колаковский (асквш 1958) йгьи Рухадзе (асквш 1964) рырхъвыхраквалагьи. Дуаб дзыгIв атшпква рпны Колаковский йгьи анахьанат апхьахьаква архъвыхра жраква анакIвдыршуз сквшы хмильуанкI раъара зхъыцIуаз аджьузым жвлаква гIараутI.

Асквш 1964 Рухадзегьи анахьанат апхьахьаквагьи археолог Соловьёв Согъвым ашIыпIаква рпны йгIазикIкIыз аторф хъвашаква дырхъвыхуата аджьузым жвлаква гIараутI, ауат рныбыжь сквшы хынзыкь-хвынзыкь гIацIанакIитI.

Афольклор гIвыраква Апсны апны аджьузым агIаншара рыцIагьи йхъару апхъанчIвидза заман йазыргитI, атурых апны зунашва джьащахъвата йщаквгылу нартргIа рткъвым йапщылата. Ахабар йшгIанахIвауала, нартргIа йгIарбжьашваз амакIыраква йыршвхIаусыгIвахатI аджьузыми ачагIыр зтаз ацIыкв дуи, ауи йапшвымахуш ауысла йапшIагылын райщчвара дрыдзтI. Зымч дууыз апельуан Сосрыкъва амакIыра шымчхауа аниба дгвыжвкIын ацIыкв АпсынчIвыла ахьыла ащхъа сырт йхъирышвттI. «АцIыкв ду» адгьыл йанаквшва йхъвашан ацIгIва йыдыз агвква адгьыл йыквпIлатI. Ауат гIайтI, къвадама ауырщттI, йаргьи ауи аджьузым апсуаква нарт гIайырахIва йапхьауа йалагатI. Абараса Апсны апны аджьузым рхарджьра йазхIауа йджвыквылтI. Датша хабаркI йшгIанахIвауала, адуней зымгIва йрагъьу чагIырта йырпхьадзуз нарт джьузымла йцIдрычIвуз акIвпI.    

АпхъанчIвидза гIвыраква равторква аунашва рхIвитI ачагIыр амшын КвайчIва атшпчIвылаква йырхъазымкIва АпсынчIвылагьи йштыргуз. АгIаджьам къала Султаний архиепископ Иоанн де Галонифонтибус асквш 1404 йгIвыз «Адуней ардырра книга» апны Апсны дангIаквчважвауа йгIаликIгIитI араъа «чагIыр гIальамат» шырчпуз.   

XVII асквшышв агIан йбзазуз аитальян диннкъвгагIв Джиованни Лукки (Жан-де-Лукка), асквшква 1625-1634 руацIа доминикан хъвдаквцIарала КърымчIвыла дтабзазауата йызнымкIва йгIамидун ататар, анагIвай, ачеркес шIыпIаква ауаъа йбзазауа ауагIахъаква йырмагIну тшахайыргIвазарныс ахъазла. Апсуаква рпынгьи даъан, рунашва джьащахъвара щарда алата йгIвыхтI, араъа «чагIыр щардата йшырчпауагьи» далачважватI.

Йбергьльу аквырджь апхьахьа Вахушти й-XVIII-хауа асквшышв агIан йшигIвуазла, «Апсны ашвыр квпшыраквала йахъыгIвгIвуата йбайан, ауат йрылапхьадзан аджьузым гIайыраквагьи».

Апсны апны аджьузымрхарджьри ачагIырчпари рунашва ргIвытI йжвежвхауа асквшышв автор щардагIвгьи. Йжвежвхауа асквшышв агIаталымта Броневский С. йшгIаликIгIузла, «Апсны апны аджьузым чагIыргьи рчпитI».

Асквш 1829 агIан Навицкий аубыхкви апсуакви дгIарыквчважвауата йшыгIвуазла, «арат ауагIахъаква рпны аджьузым ауи аъара щардата йгIайитIта атшыгIвра абгата йацIаргахырныс ркъару гьаквхъум», йырчпауа ачагIыр «агьама бзипI».

Йжвежвхуз асквшышв й-30-хауа асквшква рагIан Фр.Дюбуа йшигIвуазла, апсуаква йырчпауа ачагIыр «агьама бзипI». Йара ауи атлахан йаквшвитI Апсны апны аджьузымрхарджьра ауысла Торнау йажваквагьи: «ауат акъвадамаква щардата йгIаршIалуа аджьузым чагIыр бзи гIахъшахъыцIитI». Альбов Н. йынхара «Апсны ацIлауатраква раъаща» апны йшгIаликIгIазла, «Апсны злабергьльыз араъа йырчпауа ачагIырква ракIвпI… Абар уахьчIвалагьи акытква рызбжа (Аацы, Дурипш, Ачандара) рпны афыгIв мчы пшдзаква зхъагылу ачагIыр гIальаматква цIдрычIвитI, йалкIгIата арат ашIыпIаква йгIадриуа аджьузым квпшыраква йгIарылхта: амлаху (аджьузым чвапщ ажвумпква чIвырдза йаъата), качич (аквпшыра къапщ аквыршвыта, ажвумпква йгьажь чIвырдза йаъата), ауасархуажь (аквпшыра шкIвокIвата, ажвумпква гьажьыта)

Аджьузымрхарджьра, ауи йаццауата ачагIырчпара, ачагIырыжвра йырпщылу акультура цIасква апсуаква рпны апхъанчIвидза заман йшщаквгылыз йашахIатхитI Лыхны (Бамбора) кыт аргванква йгIарауыз археология пкъыгIваквагьи – уахьчIвала Эрмитаж апны йынкъвыргауа аджьаз скульптура «бамбора чагIырыжвыгIв» йгьи ачагIыр гIатачвара йазалхта йынкъвыргуз амачва «ритон» ахьызта (уыжвгIанчIви заманпхьадзара апхъала II асквшызкь). Датшагьи Диоскурия – Себастополис (Согъвым) къала апны археологква архъвыхра жраква анакIвдыршуз зцIолара хметркIгьи бжакIи йнадзуз амаша апны йгIараутI амфора йгьи ачагIыр мачва птштшква. Адгьыл йара ауи ацIолара апны йгIараутI аджьузым гвква. Апрофессор Рамишивили йшипхьадзазла, ауат апхъанчIвидза апсуа джьузым квпшыра «качич» йауапI (уыжвгIанчIви заманпхьадзара апхъала III-II-хауа асквшышвква).

Анакопия къала Баграт йуыхвара-багъьата йгьи а-Келасур бльын ащапIы рпны чагIыр зланкъвыргуз ацIыкв дуква гIараутI, ауат ныбыжьта йрыму VI-ХII-хауа асквшышвква йгIаршIарышвта йпхьадзахитI. Согъвым ахва апынгьи V-IV-хау асквшышвква рагIан йырчпата йгIанхаз ацIыкв птштшква щардата йгIараутI. Согъвым ахва апны йгIарауыз амфораквала йшщаквдыргылызла, сквшы 2500-2600 щтахьла утхъахырквын ачагIыр цIыквква нархарта щарда рымата йгIадрысабапуан. I-Х-хауа асквшышвква рагIан апсуаква рпны адгьылрхарджьра хIаракIын, ауи йаквшахIатпI Пицунда, Согъвым, Цебельда йгьи Дранда рпны йаъаз акIара нкъвгага мачваква. Датшагьи апсуаква рпны ауи агIан аджьузымрхарджьри ачагIыргIацIщтри шщаквгылаз йаквшахIатхитI аджьузым гIайыра йызладынхалуаз ахIваспаква, ацалдаква, анахьанат аунагIва ъамапсымаква.  

Аджьузым гIайыра апхъанчIвидза заман йгIашIарышвта апсуаква рыпшцIа айхIара ркIитI. Апсуаква рызджьакI йкIвыршата «къваца» – хIва йзпхьуз ацIла гвыпква гIадриуан аджьузым ъагIайуаз ауатраква рпны. АзджьакIгьи аджьузым щайдзаква ацIлаква йраргванта, йхъылапсата йларцIун. Арахвхчачви ашварацыгIвчви абна апны щардала йрынйун хвитта ацIлаква йрыкIвырша йгIайуаз аджьузым къвадамаква.

АцIла апны йанаура аджьузым агьама швабыж йбзихитI, йшпакIву ухIварыквын ахIагIара апны жьора гьгIаншум, амара щардата йгIаквпхитI. АгIапын гIаталра апхъала щарда атахъыркIвата аджьузым къвадамаква дрыцкьитI, йазалху ахIваспала агIваракви ачIыдаракви амырхитI. Йара ауи агIамта ащайдза адгьылрбзигаква ацIарпситI. Йауыз аджьузым октябр-ноябр мызква рагIан йазыркIкIыхитI, зынзамыза – декабр агIан. Апсуаква йшырхIвауала, рыцIа йбзийу ачагIыр гIазхъшахъыцIуа ахьта ззынадзата йа йапхъахауата асы ангIасра амщтахь йаззыркIкIыз аджьузым акIвпI.  

Аджьузым азкIкIра джвыквырцIара апхъала анчва йыхIвун, йазалху ацIасква нардасуан, йазызкIкIуа ачкIвын ацIла дгIакIамшварныс ахъазла. АцIас нкъвызгуз ачкIвын йани йандуи ракIвын. 

Апсуаква амхIаджьырра заман йанташва аджьузымбнаква кIапсахатI, аджьузымрхарджьрагьи кIашватI. Ауаса ага баргвыра йрынйарыгьи апсуаква ауи архарджьрагьи ачагIырчпарагьи гьашIадымрыстI. Ауи йгIалцIла уахьчIвала Апсны апны джьузым шIыпIа йатачIв квпшырата 60 раъара нкъвыргитI.  

Апсуаква ачагIыр хвду аквырцIун, йалкIгIата анчва йанйыхIвузи адин цIасква анынкъвыргузи акIвын йангIадрысабапуаз, къару мчы гIанарыцIсуата йырпхьадзун.

АдгьылрхарджьыгIвчва щардагIвы адгьыл йыцIажта йырхьымсуа йынкъвыргун чагIыр зтаз ацIыквква, ауат сквшыкI апны йакIвшуз аныхIвара атшын йазалхын, ажва ахъазла, Дыдрыпщ-ныха, Илыр-ныха, Инал-Куба, Лдзаа-ныха рпны.

АчагIыр тыдз шIыцкI ауыхвара йаналгарызгьи йгIадрысабапуан, аунагIва насыпли баракьатли йчвызларныс ахъазла.

АныхIвара цIас акIвзыршауа ахъацIа (йа апхIвыс) тшыткI-тшыткI гIакъвитшуанта ачIахъвагьи, акъвырман рахв агвгьи, ачIвагьи арса йхIвун: «АчбаргIагьи ЧачбаргIагьи зымгIва азскIкIуаштI, ари арызкъи дсымрыфкIва ачагIыр мачIкI дсымрыжвкIва згIвагьи рыцхIагIагьи гIарыдымсылрагIатI ари аунагIва абзазагIвчва». УадыргIвана арызкъгьи ачагIыргьи йазалху аныхIварта йщтIайцIун. УадыргIвана апхъапхъа йхъатала мачкI йфун, чагIыр тIакIв дахвунта ахIбачва рпныла дгIалагун, зымгIвагьи йыршIайыршвун.

Апсуаква асасчва пшдзата йшырзынадасуа ахабар ауралагьи хъарата йгун, йапхъахауа ашIа анчва йызщтIырхуан. Ауи асхъан айшва йадзхъачIваз зымгIвагьи гIагылуан.