Сайт Международного абазино-абхазского культурно-просветительского объединения «Алашара» - View News

Международное объединение содействия развитию абазино-абхазского этноса «Алашара»

Искандер йтеатр апны «ХъвмарыгIв» дыргылтI

«Игрок» в Театре Искандера

Искандер Фазиль йыхьыз нкъвызгауа АкъральыгIва урышв драма театр йапхъахауата апшыгIвчва йыддырбатI аурышв литература аклассик Достоевский Фёдор йгIвырала йадгалу аспектакль шIыц. Йбергьльу ароман «ХъвмарыгIв» асцена ргылчIв дадынхалтI Джикирба Эля йгьи ауи дасценаристпI.   

Йхъаду атурасыла дгIахъвмартI Щукин йыхьыз нкъвызгауа атеатр апхьарта астудент Квициния Гурам. Ауи йыхьыз рылапхьадзапI зылшара хIагIу апсуа артист шIаква. Россия йхIаракIу апхьарта театр факультетква рпны адырраква гIацIыргитI ауат ймачIгIвымкIва. Гурам йхъазымкIва аспектакль йалан датшагьи йара ауи атеатр апхьарта йыцIу астудентква – Ломия Милана, Пилия Дэвид йгьи Абухба Осман. Атеатр атруппа актёрква йрыуата йгIахъвмартI Папаскир Наталья, Спасов Люпчо, Сичинава Марина.

ЙызнымкIва атеатр йрыцынхахьу арежиссёр Киселюс Антон ари аспектакль йыла йшгIацIалуаз декорациякIгьи сцена фашакIгьи гIамрысабапхауата акIвпI. Йара атеатр апны ари аспектакль аквпшыра «концерт гIахъвмарра» ахьырцIатI.

«Концерт гIахъвмарра анхIхIвара хIара йгIаныхIщтуа атекст ъакIьыдахауа акIвпI. Датшата йухIвушызтын агIахъвмарраква, асцена апны апIатIаураква зымгIва атекстла йаларпапI. Артист йгIахъвмарща оркестр апны аъамапсыма агIарысабапща йапшхитI», – йхIвитI арежиссёр Киселюс.

Атеатр гIахъвмарра апны лахIвара щарда гIанарыцIсуата йалан Апсны ауагIа артист Чанба Нодар дзунашвачпагIву акъральыгIва хор капелла. Аспектакль ъадзакIвшауа йбыжьгитI адунейла йбергьльу акомпозитор Моцарт ймузыка. ЙалкIгIата алагIваласра ду гIауыларцIитI аспектакль йцIыхъвахауа аккордква: Моцарт й-«Реквием» ахъвмарра згIвыра йтнацаз афыр хъада йпсы йаджьабарата йхIвачвитI.

АпшыгIвчва швабыж йыргвапхатI Квициния Гурам йгIахъвмарра. Атеатр асайт ахъазла йадыргалыз Гурам йинтервью апны ауи йшгIаликIгIазла, афыр хъада Иван Иван йпа йтурасыла дгIахъвмарныс дъагIадрайгваз йхъа ду йнарбатI. Актёр шIа йгьцIайкIуам йара йхIальгьи йшалу «алашра», ауаса абзазара апны ауи йфыр йацкIыс рыцIа дщаквкIыпI, ауи ахIатырла йуыс гьмайрамызтI асцена апны «агIахъжвараква» тшанрзирыхIазыруаз. Баргвыра гьмачIмызтI, ауи йапшпI актёрква ргIахъвмарра йацхърагIалауа адекорацияква ъанымыз, йара Достоевский йыбызшва баргвгьи уылаукIра атахъын. Ауаса апремьера атшын йгIанарбатI актёр шIа йчвхIатламкIва ауат абаргвыраква зымгIва дшгIарыцIсыз. Квициния Гурам йгIахъвмарра йаквшахIатыз апшыгIвчва аспектакль амщтахь кьангьаш рыламкIва йырхIвун: «ЙхъасцIитI», – хIва.   

АпшыгIвчва йгIалыркIгIатI амзакIкIара агIарысабапра анадзара хIагIагьи, ауи йхъвдаквцIаран аршIыйагIв Лисицын Евгений, амузыка адгалрагьи. Ахор капелла йгIандыршаз ахIагIара ауи аъара ймчынта актёрквагьи рылшараква гIанадмыркъвуата йара ауаса йнардзата йгIахъвмаруан. Абар йылхIвауа Полина лтурасыла аспектакль апны йгIахъвмарыз, Щукин йыхьыз нкъвызгауа атеатр апхьарта апхьагIв Ломия Милана: «Датшата сгIахъвмарныс рыцIа йсзымайрахарын гьсзыхIвушым, йшпакIву ухIварыквын атурасы швабыж йбаргвыпI. Акапелла ангIалал тIакIвгьи съанквынхатI – ауат рашвахIвара алагIваласра ду гIауыланацIитI. Атруппа швабыж пхата йъагIахIпылызгьи гвапарапI, апщсквшагьи араъа хIынхузшва тшыгIбун».  

Аспектакль «ХъвмарыгIв» угвы йнадзауата, лахIвара цIола гIанарыцIсуата йщаквгылтI, ацIыхъва ъагврыдзгу ахъазла апшыгIвчва щардагIвы рыладз гьырзымкIтI. Ауи Искандер йтеатр апны гIвымшкI йгIадырбатI, ауаса апшыгIвчва рпны дахIвра ду ъамаз абзирала атеатр аунашвачпагIвчва аспектакль ррепертуар йаларцIарныс йщаквдыргылтI. Йшцауала, «ХъвмарыгIв» апремьера апны йаъамыз апшыгIвчвагьи йрылшуштI апхъахьыла аурышв драма театр асцена апны ауи йапшырныс.

 

(Асурат Спутник – Апсны сайт йгIахъыхпI)