Сайт Международного абазино-абхазского культурно-просветительского объединения «Алашара» - View News

International Association for Assistance to the Abaza-Abkhazian ethnos «Alashara»

«Игрок» Искандер итеатр аҿы

«Игрок» в Театре Искандера

Фазиль Искандер ихьӡ зху Аҳәынҭқарратә аурыс драматә театр ахәаҧшцәа ирыднагалеит аурыс литература аклассик Фиодор Достоевски иҩымҭала иқәыргылоу аспектакль ҿыц апремиера. Ашәҟәыҩҩы еицырдыруа ироман «Игрок» асценатә қәыргылара лнапы алакын Елиа Џьыкырба, лара лоуп ари аусумҭаҿы асценарист ироль назыгӡазгьы.

Аспектакль аҿы ароль хада наигӡеит Шьукин ихьӡ зху Атеатртә институт астудент Гәырам Кәыҵниа – иахьа еиуеиҧшым урыстәылатәи аҵараиурҭақәа ртеатртә факультетқәа рҿы аҵара зҵо,  ҳгәыӷрақәа здаҳҳәалоу актиорцәа қәыҧшцәа рабиҧара ахаҭарнакцәа ируаӡәку. Кәыҵниа идагьы аспектакль аҿы ихәмаруан Шьукин итеатртә институт егьырҭ астудентцәагьы – Милана Ломиа, Девид Ҧлиа, Осман Абыхәба, убасгьы Русдрам атруппа актиорцәа Наталиа Папасқьыр, Лиупчо Спасов, Марина Сыҷынаа.

Аспектакль «Игрок» ақәыргыламҭа арежиссиор  ихшыҩҵак ауп. Иара изныкымкәа атеатр аус ациухьан, адекорациеи акостиумқәеи ахьыҟам атеатртә хәмарраҟны. Иара атеатр аҿы ари аспектакль аформа «концерттә нагӡамҭоуп» ҳәа иалыркааит.

«Аконцерттә нагӡамҭа иаанаго, атекст ахәҭа ахьадаҳго ауп. Уи ҳара иадаҳгоит асценаҿы аицыхәмарра аҟнытә. Ҳара артист ҳицыхәмаруеит аинструменттә оркестр еиҧш», - иҳәоит арежиссиор Киселиус.

«Игрок» аҟны зегь раасҭа угәаҿы инхо акы акәхеит Аҧсны Жәлар рартист Нодар Ҷанба инапхгарала аҳәынҭқарратә хортә капелла алахәра. Аспектакль зегьы иаҵоуп Моцарт имузыка ҳаракы. Ҷыдала ацәанырра урҭон Моцарт «Иреквием» ахыркәшаратә аккордқәа.

Ахәаҧшцәа хнахит Гәырам Кәыҵниа ихәмарра. Гәырам Русдрам иеиҭаз аинтервиу аҟны иаартны иҳәоит иара игәы шыхнахыз аспектакль ахаҿсахьа хада – Алексеи Иван-иҧа ироль анагӡаразы иоуз ааҧхьара. Актиор қәыҧш иара иҟазшьаҿгьы иҧшаауеит ахәмарҩы илаз ахалагалара, аха иара усҟак ирласны деицрашәом, еиҳа дҭынчуп аҧсҭазаараҿы, ифырхаҵа иаасҭа, убри аҟнытә асценаҿы иаразнак аицрашәара иара изы усҵәҟьа имариамызт. Аҽазыҟаҵараан ауадаҩрақәа рацәан – иҟамызт адекорациа, иҵатәын Достоевски иуадаҩыз ибызшәа, аха апремиера аҽны иааҧшит урҭ ауадаҩрақәа зегьы актиор имарианы дшыриааиз. Ахәаҧшцәа, Кәыҵниа ихәмарра иацклаҧшуаз, аспектакль ашьҭахь агәра ганы ирҳәон: «Агәра игоит».

Аспектакль збаз аӡәырҩы иазгәарҭон, аспектакль аҿы ҩаӡара ҳаракыла ишынагӡаз алашара азҵаара, уи инапы ианын алашаразы асахьаҭыхҩы Евгени Лисицын, иара убас музыкала аиқәыршәара. Ахортә капелла, аспектакль зегьы убри аҩыза мчык анаҭеит, актиорцәа ишьҭыхыз аҩаӡара рҽақәдыршәар акәын. Абар, ари аспектакль аҿы ахәмарра аҷыдарақәа рзы илҳәо, Полина лроль назыгӡоз Шьукинтәи аинститут астудентка Милана Ломиаҧҳа: «Даҽа форматк аҿы аусура еиҳа исзымариахон сызҳәом, избанзар ароль, зегь акоуп  даара ицәгьоуп. Акапелла анааи, сара сеигәырӷьеит, избанзар дара рашәаҳәара ухәажьы еиланаргылоит. Иҳацхрааит, иара атруппа ҳара даара иҧханы иахьаҳҧылаз – убри аҩыза ацәанырра ҳамоуп, ҳара  ҧшьышықәса зегьы абраҟа аус ҳуазшәа».

Аспектакль «Игрок» ацәанырра ӷәӷәақәа ацын, ахәаҧшцәа аӡәырҩы атрагедиатә ҵыхәтәа рылаӷырӡқәа аанагеит. Иара ҩымш ракәын Искандер итеатр аҿы иахьцоз, аха ахәаҧшцәа рҟны иаиуз аихьӡара ду иабзоураны, Фазиль Искандер ихьӡ зху аҳәынҭқарратә аурыс драматә театр анапхгара ирыӡбеит ари аспектакль ррепертуар иаларҵарц. Уи иаанаго, аҧхьаҟа  «Игрок» апремиера иақәымшәаз алшара роуеит уи Русдрам асценаҿы ахәаҧшраз.