Международное объединение содействия развитию абазино-абхазского этноса «Алашара»

Ужвыгьи здахIвраква хIаракIу апсуа пхIвыспачкIвынкI

Еще одна супердевочка из Абхазии


«Уара усуперпI!» зхьзыта йакIвшуз ателебара шоу йапхъахуз апроект йапхъагылагIвхаз Валерия Адлейба йлыщтагIайуата агIахIвра анкъвакъвра йалалта Россия ателебара апшыгIвчва ргвква рхвгIарныс рмурадта Апсны йтыцIын Москва йцатI Капба Леон йгьи Тачулия Милена.

Асаби гIахIвра шоу «Уара усуперпI! АгIахIвраква!» йрылан атгIачваква йрыдыркIылыз асабиква, апхьарта интернаткви асаби тыдзкви рпны йгIадзынгылуа 7 сквша йгIашIарышвта 18 сквшадза зныбжьу ачкIвынчви ахIвсси. Россия Федерация акъалакви аштакви йырхъазымкIва апроект йалан Белоруссия, Узбекистан, Казахстан, Туркмения, Эстония, ГIвадахь Осетия, Апсны, Азербайджан йгIартыцIыз асабиква. Апроект абзазара йаналарыжьуаз ачкIвынчви асабикви ателебара атраква йрылазлара, хореографияла йагъьу арыпхьагIвчва, арежиссёрква, апродюсерква рыдынхалра йахъазымкIва ауат апхьарта апрограммала йадрыпхьун, апсихологква рыдынхалуан, дара ашIаква йшырхIвазла, джьащахъвара щардагьи йрынйатI.  

АгIахIвра гIарбара йапхъахуз амшква йгIаршIарышвта ауи Апсны апны ауагIа швабыж йыргвапхатI. АгIахъвмарраква ангIадырбуз амшква ауагIа аурам экранква, ачартаква рпны ателевизорква йырпшуан, гвыргIва рылата ажюри ражва йазпшуан.

14 сквша зныбжьу апсуа гIахIвыгIв шIа ъаза Тачулия Милена Согъвым къала 14 апхьарта дыцIапI, Апсны Республикала гIатгара зму артистква Чкадуа Циала йгьи Аршба Алексей унашва зхъырцIауа агIахIвра апхьарта «Абаза» апны агIахIвра тшазылбжьитI. Йапхъахуз атур апны ауи йгIалырбатI «Адзыхь апны» зхьзу ауагIахъа гIахIвра агвагванчкIвынгьи лымата. ЙгIвбахуз атур апны апшыгIвчва швабыж йыргвапхауата Гагарина Полина лашва «Драма гьаъахым» абжьыла ауи йгIалырбаз агIахIвра датша квпшыра аман. АпшыгIвчва напIасра дула днардасуа афинал дызлазынадзаз агIахIвра апны зыпкъ тIахсу, йтIатIу апсуа пхIвыспачкIвын йблыз ацIла атурасы дтагылата дгIахъвмартI.    

Къраль щарда злаз ашоу ду йцIыхъвахуз аконцерт асквш 2017 декабр а 23 атшын йакIвшатI. АйгIайра гIатылгатI Кострома йауу Родионова Валерия, Тачулия Милена йагIбахуз агыларта лкIытI.

«Сара афинал салапI, сгIахIвыща хвы аквырцIун акъраль апны йагъьу ахореографква. Амастер-классква, шоу-бизнес апны йбергьльу агIвычIвгIвысква рынйара, Москва апны агIамдара гIальаматква – абаратква дзачIв гIвычIвгIвысызлакIгьи йгвалапI. Ари анкъвакъвра апны айгIайра гIатзымгазтынгьи, сшхъвыцуала, адуней шабгу йдсырдырныс сылшатI бзи йызбауа, йпшдзу сцри хагIахв ахабар», – лхIватI Тачулия Милена интервьюкI апны.

Миленагьи лахщагьи ландуи лабадуи йырхьпшырапI. АпхIвыспачкIвын хысквша даныртал йгIашIарышвта ауагIахъа гIахIвракви аклассика гIахIвракви тшырзылбжьитI, уахьчIвла Апсны апны йагъьу асаби ансамбльква йрылапхьадзу ансамбль дасолистпI. Ауи анкъвакъвра щарда рсогIатква дырпшвымапI, ауат йрылапхьадзапI адуней анкъвакъвра согIатквагьи. АгIахIвра йахъазымкIва бзи йылбитI адзцари асуратчпари. Аратква ракIвымкIва Милена ажурналистикагьи дхънахитI йгьи Апсны къральыгIва телерадиуакомпания асаби хабарквала дакорреспондентпI. Тачулия Милена гвалата йлымапI йдуу гIахIвгIвыта лыхьыз лыргарныс.