International Association for Assistance to the Abaza-Abkhazian ethnos «Alashara»

Даҽа ҭыҧҳа ссирк Аҧснынтәи

Еще одна супердевочка из Абхазии


Ателехәаҧшратә шоу «Ты супер!» раҧхьатәи апроект аҟны аиааира згаз Валериа Адлеиҧҳа иналышьҭарххны, акәашацәа рконкурс аҟны урыстәылатәи ателехәаҧшцәа рхыхразы Аҧснынтәи Москваҟа ицеит Леон Қапбеи Милена Ҭачлиаҧҳаи.

Акәашаратә шоу  «Ты супер! Танцы!» иалахәын быжьшықәса инаркны жәаа шықәса рҟынӡа зхыҵуаз, аҭаацәарақәа ирыдкыланы ирымаз ахәыҷқәеи, ашкол-интернатқәеи ахәыҷқәа рыҩни рааӡамҭацәеи, Урыстәылатәи афедерациа еиуеиҧшым ақалақьқәа рҟынтәи, иара убас Белоруссиа, Узбекисҭан, Казахсҭан, Туркмениа, Естониа, Аахыҵ Уаҧстәыла, Аҧсны, Азербаиџьан рхаҭарнакцәа. Апроект цонаҵы дара, апрограммаҿы аҭыхрақәа рымҩаҧгареи, иреиӷьу апрофессионалтә рҵаҩцәеи, арежиссиорцәеи, апродиусерцәеи ахореографиазы иахьазыҟарҵози рыдагьы, ашколтә программала аҵара рҵон, ахәыҷқәа иааиҧмырҟьаӡакәа аус рыдырулон апсихологцәа, алахәцәа ражәақәа рыла, ирацәан иззыҧшымыз аҳамҭақәа.

Акәашаратә шоу актәи амш инаркны Аҧсны зегьы азҿлымҳахеит. Ақәгыларақәа рыҽны ареспублика азеиҧш екранқәа акаҳуажәырҭақәа, ақьафурҭақәа рҟны ауаа ишиашоу ицоз аефир иахәаҧшуан, ргәы хыҭ-хыҭуа иазыҧшын аӡбаҩцәа рыхәшьарақәа.

Жәиҧшь шықәса зхыҵуа Аҧснынтәи аеҵәа қәыҧш, ахореографиа ҟаимаҭ аазырҧшуаз Милена Ҭачлиаҧҳа, Аҟәатәи ажәабатәи абжьаратә школ аҿы аҵара лҵоит, лҽазыҟалҵоит ахәыҷтәы аҳәынҭқарратә акәашаратә школ «Абаза» аҟны, Аҧсны зҽаҧсазтәыз артистцәа Циала Ҷкадуаҧҳаи Алықьса Аршбеи рнапхгарала. Актәи атур аҿы лара иналыгӡеит амилаҭтә кәашара аирыӡ кны «Аӡиас ахықәан» захьӡу. Аҩбатәи атур аҟны аҧсуа ҭыҧҳа ҧшӡа ателехәаҧшцәа рҿаҧхьа дцәырҵит зынӡа даҽа стильк ала: азал аҿы итәаз аршанхеит Полина Гагарина лашәа «Адрама уаҳа иҟаӡам» иацналыгӡаз акәашара контем, Милена анаҩстәи атур ахь диасуеит. Иблыз аҵла ахаҿсахьа аарҧшуа, зыбаҩ таруаз Аҧснынтәи акәашаҩ еихымсыӷьуаз анапеинҟьабжьқәа лыцны афинал ахь днеиуеит.

Жәларбжьаратәи ашоу афиналтә концерт мҩаҧысит ҩнызқьи жәибыжь шықәса, ҧхынҷкәын ҩажәи хҧа рзы. Аиааира лгеит Валериа Родионова Костромантәи, Милена Ҭачлиа аабатәи аҭыҧ лгеит.

«Сара афинал аҟынӡа снеит, ахәшьара сырҭон атәыла иреиӷьу ахореографцәа. Амастер-классқәа, ашоу-бизнес аҟынтәи еицырдыруа артистцәа рҧыларақәа, Москва аҩныҵҟа анеиааирақәа – ари дарбанзаалак ауаҩы игәазыҳәароуп. Ари аконкурс аҿы аиааира сзымгазаргьы, исылшеит ҳәа сгәы иаанагоит бзиа избо стәыла ҧшӡа атәы адунеи зегьы иасырҳаит ҳәа», - азгәалҭеит Милена Ҭачлиаҧҳа линтервиуқәа руак аҟны.

Милена лаҳәшьеи лареи рхылаҧшуеит рандуи рабдуи. Аӡӷаб хышықәса анылхыҵуаз инаркны жәлар рыкәашарақәеи аклассикатә кәашареи рзы лҽазыҟалҵоит, иахьазы солисткас дыҟоуп Аҧсны иреиӷьу ахәыҷтәы ансамбльқәа руак аҟны. Милена ирацәаны аконкурсқәа рҿы аҧхьахәқәа лгахьеит, жәларбжьаратәиқәагьы убрахь иналаҵаны. Акәашарақәа рыдагьы, лара гәахәарыла лҽазыҟалҵоит аӡсареи асахьаҭыхреи. Убри инаҷыданы, ажурналистика бзиа илбоит, Аҧснытәи аҳәынҭқарратә телерадиоеилахәыраҿы ицо ахәыҷтәы жәабжьқәа корреспондентс дрымоуп. Милена Ҭачлиаҧҳа дкәашаҩ духарц агәазыҳәара лымоуп.