Международное объединение содействия развитию абазино-абхазского этноса «Алашара»

Абаза бызшва уахьчIвала аъаща: архъвыхыгIвчва шIаква рхъвыцща

Абазинский язык сегодня: взгляд исследователей-волонтеров


«Абазаква ргвква швабыж йхътIыпI», – абараса хIунашва рхIвитI Санкт-Петербург йауу архъвыхыгIвчва Светличный Родиони Биктимиркин Сергейи, йара ауаса йхIылачважвитI абаза кытква йангIарыкIвшуз йхъырхыз асуратква интернет йангIатарцIауа асхъан йрыцырцIауа агIвыраква рпынгьи.

Тамамта йухIвушызтын, Санкт-Петербург апны йаныргIалу ауат рхъвыхра нхара йгIазщтийыз Абызшвадырра квта «Ажва» акIвпI, дара ъауу датша къалапI.

Родион Тольятти дауапI, арыпхьагIв, психолог ъачIвагIаквала йхIаракIу адырраква йымапI, Мещерякова В.Н. лметодикала йынхауа англьыз бызшва а-Студия даунашвачпагIвпI. Асквш 2016 МарагIацIцIырташта Хъара апны дынхатI архъвыхра гIамдара далата, аудэгейква рыбызшви рбзазащи тшрыхайыргIвазатI. Сергей Ульяновск дтабзазитI. Ауи йъачIвагIа хъадала веб-дизайнла дменеджерпI, ажвлара организация «ЧкIвынргIа рджьгарра» анхара апны дамальчыпI, цIыпх Кения къраль апны зпхьадзара мачIу ауагIахъаква дрыдынхалтI, рыбызшви рбзазара тшрыхайыргIвазатI.

Родиони Сергейи Санкт-Петербург апны йабадыртI, адгалра семинар апны йацынхуш ачкIвынчви ахIвсси андрыхIазыруаз, гвып-гвып йаныршуз агIан йацынхарныс йангIалтI. Россия аштаква рпны йынхарныс йгIандыршан йамцIырщттI 11 гвыпкI.

Родиони Сергейи абаза кытква рпны йапынкIылата сынчIва июнь а 12 йгIашIарышвта июнь а 28-дза йынхатI. Дугьи хвыцгьи йрачважватI, асабигIзартаква, апхьартаква йгIарыкIвшатI, атгIачваква йрынйатI, ареспублика газет «Абазашта» аредакция апны йаъан, арыпхьагIвчва рдырраква йъарыладырхIауа ареспублика институт апны асабигIзартаква рбжьагIвчва, апычIв классква рарыпхьагIвчва йрынйатI, йрачважватI.

Рынхара шабгу авидеокамери адиктофони йырнырцIатI, сурат щардагьи хъырхтI, ауат агIвыраква зымгIвагьи рынхара йагIарбарата рунашвачпагIвчва йырнапIыцIадыршвахуаштI, йдырхъвыхуата йрыдынхалхуаштI. 

– Мурадта йхIымаз ари акIвын: уахьчIвала абаза бызшва аъащата йызтагылу хIырхъвыхырныс, зныбыжьла йапшым абазаква рыбызшва шырдыруа щаквхIыргылырныс, ауи агIахчари атшауацIнарыхри руысла баргвырата йаъу гIахIрыбергьыльырныс, – йхIвитI Родион.

– Ауи ахъазла хIкъраль ауацIала йгьи агIвымакъральква рпны йгIадрысабапуата йбергьльу амальквала хIынхатI, – йгIацицIахитI Сергей. – ХIынхара Псыжв кыт апны йджвыквхIцIатI – апхьарта тшпсщарта апны асабиква абаза бызшвала йшрыдынхалуа хIапшытI.

АрхъвыхыгIвчва рынхара квпшыра щарда аман. Асабиква уыса йа гIахIвахра тшыткI йадрыпхьун, йгIазпхьаз йгIаныцIуа абазала йа урышвла йыддырхIвахуан. КыткI апны йгIазпхьауата йрыгIвуаз атекстква датша кыткI асабиква аздрыдзыргIвхуан, ауатгьи зздзыргIвыз йгIанакIуа абазала йа урышвла йырхIвахырныс йрыхIвун. Апхьара йахъазымкIва абаза ашваква рзырхIварныс тшырзынадырхалун. Арасагьи йгIаншун: акыт аурамла йшымгIвайсуамцара дабазата чкIвынкI дгIарынйарыквын дгIашIадрысуанта йдыруа абаза локIкI гIарайхIвырныс йыхIвун. АтгIачваква рпынгьи абаза бызшва йалачважвун, хабар рхIвун, цри бызшва ауысла баргвырата йаъу гIадрахун. Ари анхара йаццауата азцIгIараквали аджьауапквали йадгалу ашвъаква рыгIвуан. Ауат ашвъаквала азцIгIараква джьауап рырттI дугьи чкIвынгьи шалу 35-гIв. АрыпхьагIвчва, асабигIзартаква рбжьагIвчва, абаза бызшвала анахьанат аъачIвагIагIвчва йанрынйуз абаза бызшва аъащата йызтагылу, агIахчари атшауацIнарыхри рпны баргвырата йгIаншауа йрылачважвун. Архъвыхра уысква рырхъйара апны йгIарцхърагIун арыпхьагIвчва, абжьагIвчва, анчва-абачва, аунашвачпагIвчва. Архъвыхра нхараква тIапIанта диалектла йъачважвауа йахъазымкIва щхъарауа диалектла йъачважвауа акытква рпынгьи йакIвшатI.   

Йырзалхыз агIамта ауацIа арат ачкIвынчва 12 абаза кыткI йгIарыкIвшатI, йызхамдзаз Къвайдан кыт заджвыкI акIвпI. ЙадыркIылыз агIарбараква швабыж йщардапI, ауат рырхъвыхра гIамта бзидздза атахъхуштI. ХIайчважвара апны Родиони Сергейи руысква шцаз айшыста йгIаквчважватI, джьауапта йрауыз агIарбараква гIадрахатI, рлахIваракви рырхъвыхракви хIыцагIвыршатI.

– Йапхъахуз атшын йгIашIарышвта швабыж йхIгвапата зынла йхIылахIхIватI абазаква ргвхътIыра, – йхIвитI Сергей дпшвырхъыччауа. – МышкIы апны анйарата хвба-цба акIвхIыршун. УнагIвата хIъанашыллакIгьи апхъапхъа йадгалу айшва хIадзхъадырчIвун: щардала йгIаншун щымти хъвлапни гIван-гIван, щыбжьан хын хIдырчауата. Швабыж йхIгвапапI араса джькIхбастала хIъагIадрайгваз, швабыж йхIгвапхатI абаза фачIвквагьи.

Родион йгIаликIгIатI йъадзанхуз амшква руацIа згвы цхIауа, цри бызшва бзи йызбауа, ауи агIащаквхара йахъгвыргIвауа уагIа щарда шгIарынйаз

– Швабыж дгIахIайгвыргъьатI «Абазашта» газет аредактор хъада Къвыл Ф.Кь., дгIахIцхърагIарныс дшхIазыру гIахIалхIвтI, хIаргьи агазет анхара ауысла йрыхъвуш хIгвгIанаграква лыцагIвхIшатI, – йхIвитI ауи. – Къвбина кыт апхьарта арыпхьагIв Дохвта Ф.Къ. луыс швабыж бзи йылбитI, сквшы 56 цIуата асабиква цри бызшвала йалрыпхьитI, хIара ауи интервью гIалыквхIхтI. Ажурналист ПIаз Р.Х. хабар щарда гIахIалхIвтI, Йуан Ф. абаза бызшва атшауацIыхра дацхърагIитI, интернет апны арыпхьара сахIатква акIвлыршитI, ДзыгIва М. лара лдырраквагьи йрылалырхIитI, лпагьи дйыдынхалитI. Швабыж йджьащахъвапI апычIв классква рарыпхьагIв ХIачвыкъва А.В. йхIыцагIвылшаз лхъвыцраква. Йхъатала йгIанйыршаз амузей апны хIирайгван абазаква ртурых швабыж джьащахъвата даквчважватI ТIыкIва М. Абарат йрапшу ашвапха бзиква швабыж йщардапI, араса заджвы хIйынйапхьадза хIайгвыргъьауата, хIгвы йалахIауата хIынхун.   

Абар апхьахьа шIаква ргвгIанаграква хIыцагIвыршауата йызлачважваз архъвыхраква.

Асабиква рыцIа майрата йырзалыргитI рыквлагIв дгIазпхьаз йгIвыта йаназдзыргIвуа, ахIбачва рбыжьква йанрыздзыргIвуа рыцIа йырчвыбаргвпI.

Асабиква рщардагIв бзита йапхьитI, ауаса йгIазпхьаз цри бызшвала йангIархIвахуа рыцIа йырчвыбаргвхитI, йгIашIанакIитI. Йшцауала, урышв бызшвала йгIархIвахырныс рыцIа йырзымайрахитI. Бзита йгIапхьауа, йгIазпхьазгьи бзита йырзыхIвахуата хIзынйаз асабиква мачIыгIвпI. Ауи ауысла йгIалкIгIа йауаштI Гвым кыт.

Акыт уыснкъвгагIвчвагьи апхьартаква рунашвачпагIвчвагьи гвыргIва гIарыланацIитI апхьартаква рпынгьи асабигIзартаква рпынгьи асабиква цри бызшвала ацкIыс урышв бызшвала рыцIа щарда йъачважвауа, ауи цри бызшвала рдырраква арльальауата йырпхьадзитI. Анчва-абачва йрыуата щардагIвы тхIаусыхитI асабиква асабигIзарта йцауа йаналагара абаза бызшвала ацкIыс урышв бызшвала рыцIа щарда йъачважвауа ахъазла.    

АрхъвыхыгIвчва йджьарщауата гвы артатI асабиква цри бызшвала саби ашва шрымдыруа: йырзырхIварныс йахIвун, ауаса ашвакI рзызхIвушыз дгьгIанымшатI. Йара ауаса йрымдырдзакIва гвы артатI асабиква абаза локIква шрымдыруа.

Арыпхьара абаргвыраква гIахIахвырквын, арыпхьагIвчвагьи асабигIзартаква рынхагIвчвагьи ргвы йасуата йгIалыркIгIатI ацхърагIагаква швабыж йшмачIу, йшырзымхъауа. Цри бызшвала зсабиква йрыдынхалырныс зтахъу анчва-абачвагьи йырхIватI йгIадрысабап йауаш акнигаква, ауи йаквыргIапсу ацхърагIагаква шаъам.

МачIпI асабиква йанрыдынхалуа ауагIахъа пкъыгIваква дара рнапIыла йырзычпауа йырбжьарныс. Йара акIвпIта, асаби ауагIахъа культура, азъазара йырпщылу уыскI данадкIылу йыбызшва рыцIа майрата тшауацIнахитI.  

Баргвыра гIаншитI талант зму асабиква рыдынхалра апынгьи. Гвым кыт апны арыпхьагIвкI пшдзата уарад лхIвитI, ауи ауыс йадылкIылитI асабиквагьи. Ауыс ззадгалуаш ъачIвагIагIв датахъыпI: апхъапхъа концерт гвыпкI адкIылзарквын акытква йгIарыкIвшауа йынхарын. УадыргIвана йазалху адырраква гIапшцIыргарын, анкъвакъвраква, афестивальква йрылалуамцара рылшара гIадырбарын. Ауи ашва культура атшауацIыхра, талант зму ашIаква ргIарыбергьыльра йацхърагIушын. 

Родиони Сергейи апхьарта библиотекаква рпны абаза бызшвала акнигаква рпхьадзара шмачIу гвы арттI. Зджьара абаза книгаква хъарата гъыцIаракI апны йщтIан. Ауат йрыпхьара, йыргвапхара ахъазла уаннашылра уыла зынла йшгIацIашвуш апшта йаныргIалра атахъыта йырпхьадзитI.

– Бзихушын урышв бызшвала агIвыраква уъарынйауа йъакIвызлакI йауата йаъазтын абаза бызшвалагьи йгIвыта йацхъадыргылзарквын: аурамква рыхьызква, анхартаква рыхьызква, йара ауат акнигаква зхвынгылу акIарышвтаква йрыквгIву ажваквагьи. Ари апш амальла абаза бызшва агIарысабапра рыцIагьи тшауацIнарых йауашын.  

Ари архъвыхра нхара апхъахьыла йшакIвшуш ауысла сазцIгIара джьауап гIайтуата С. Биктимиркин араса йхIватI:

– ХIара хIапхъа апхынгьи хIатагIайхта хIынхарныс хIтахъыпI. Абаза бызшва ауысквала, ауи агIахчара, атшауацIнарыхра анархарата йазалху интернет сайт кIьыда гIанхIыршарныс хIтахъыпI.

– Ауи ауысла зажва апхъу апроект аунашвачпагIвчва ракIвпI. ХIара абаза бызшва агIахчара хIкъаругьи алахIцIарныс хIтахъыта хIызлагазла хIгIашIамсуа хIынхарныс хIхIазырпI, – йыгIвза йхIваз йацикIитI Светличный Родион. – ЙшыгIбазла, акытква рпны цри бызшва бзита йырдыритI. АзцгIараквали аджьауапквали йадгалата йхIрыхIазырыз ашвъаквагьи ауи йаквшахIатпI. ЙшгIахIгвынгIвызла, акыт акъала рыцIа йачвыхъарата йчIвазтын ауи абзазагIвчва дугьи хвыцгьи цри бызшва рыцIа бзита йырдыритI. Абаза бызшва хIгвапхатI, ауи абыжьква шIырпшыра рымамкIва йджьащахъвапI, ансимш бзазара апны йырхIвауа ажваквакIгьи хIхIырдыртI. Авидекамери адиктофони йрынхIцIаз апхьараква гIахIрысабапта бжьыла йадгалу агIахIвахраква рдиск хIрыхIазырныс хIмурадпI – ауи анчва-абачвагьи, арыпхьагIвчвагьи, асабигIзартаква рынхагIвчвагьи цхърагIага амальта йырзалуаштI. ХIара швышта апшдзарагьи швабыж йхIылахIхIватI. Гвым ашIыпIаква хIдырбатI, йгIамыгIдатI, щхархIартакI апны йцIдрычIвагIвацаз цха хъгIагьи хIшIашватI. ХIапхъа, хIшгвыгъауала, араъа рыцIа щарда хIаъазлуштI, Домбайи Архызи ларпшра хIцарнысгьи хIылшуштI.