International Association for Assistance to the Abaza-Abkhazian ethnos «Alashara»

Абаза бызшәа иахьа: аҭҵааҩцәа-аволонтиорцәа ргәаанагара

Абазинский язык сегодня: взгляд исследователей-волонтеров


"Абазақәа - згәы аарту уаауп", - абас ҳзырҳәоит Санкт-Петербургнтәи аҭҵааҩцәа Родион Светличныи Сергеи Биктимиркини, абри атәы рыҩуеит дара асоциалтә ҳақәа рҟны, абаза аулқәа рахь рныҟәараан иҭырхыз афотосахьақәа рыҵаҟа...

Еиҳа инҭкааны иуҳәозар, урҭ аекспедициахь идәықәызҵаз Алингвисттә центр  "Ажәа", Санкт-Петербург иҟоуп, дара еиуеиҧшым ақалақьқәа рҿы инхоит.

Родион Толиаттитәуп, имоуп арҵаҩи аҧсихологи рдипломқәа, Мешьериакова лметодикала англыз бызшәа астудиа анапхгаҩыс дыҟоуп. 2016 шықәсазы далахәын Дальни Восток имҩаҧгаз аекспедициа, иҭиҵаауан удегеаа рбызшәеи рыбзазашьеи. Сергеи дынхоит Улиановск. Иара занааҭ хадас имоуп - авеб дизаин азы аменеџьер, иара - ауаажәларратә еиҿкаара   "Аҿар аус руеит" дактивиступ, аҧышәа имоуп Кении зхыҧхьаӡара маҷу аплемиақәа аус рыдуларазы.

Родиони Сергеии еибадырит, ирыӡбеит Санкт-Петербург ацентр аҟны аволонтиорцәа ргәыҧ аиҿкаареи азыҟаҵареи хықәкыс иҟаҵаны имҩаҧгаз асеминар аҿы аус еицырурц. Зынӡа жәеиза гәыҧ аҧҵан, урҭ Урыстәыла еиуеиҧшым арегионқәа рахь идәықәҵан.

Родион Светличныи Сергеи Биктимиркини аус еицыруит Ҟарачы-Черқьес абазатә аулқәа рҿы, иааиҧмырҟьаӡакәа ҳазну ашықәс иун 12 инаркны  28-нӡа. Ирыҿцәажәон ахәыҷқәеи адуқәеи, ирҭаауан ахәыҷ баҳчақәа, ашколқәа, аҭаацәарақәа, иҟан ареспубликатә газеҭ    "Абазашҭа" аредакциаҿ, аҵарадыраа аусзуҩцәа рзанааҭтә зыҟаҵара ашьҭыхразы ареспубликатә институт аҟны, уаҟа ирҧылеит ахәыҷ баҳчақәа рааӡаҩцәа ргәыҧи, алагарҭатә классқәа рырҵаҩцәеи.

Аҳасабрбеи анаҩстәи анализ аҟаҵареи рзы аҭҵааратә материал зегьы авидеокамереи адиктофони рахь ианырҵон, иҟарҵон иара убас афотоҭыхымҭа.

 - Ҳусура хықәкыс иаман иахьатәи абаза бызшәа аҭагылазаашьа аҭҵаара, еиуеиҧшым ақәрақәа змоу абызшәа ахьынӡардыруа аҩаӡара ашьақәыргылара, абызшәа аиқәырхареи арҿиареи рыпроблемақәа раарҧшра, - иҳәоит Родион. - Убри азы ҳара ҳхы иаҳархәон идыру аметодика, ҳтәыла еиуеиҧшым арегионқәеи аҳәаанырцәи апрактикаҿы рхы иадырхәо, - атема иациҵоит Сергеи. - Ҳара ҳусура ҳалагеит аул Ҧсыж - ашкол аҿы иҟаз алагер аҟны абаза бызшәазы аҽазыҟаҵарақәа ҳрылахәын.

Аҭҵааҩцәа русура аформақәа еиуеиҧшымызт. Ахәыҷқәа ирыдгалан иаҧхьарц ажәеинраала, апроза ацыҧҵәаха, уи аҵакы рхатәы бызшәала, мамзаргьы урыс бызшәала еиҭарҳәарц. Аулк аҿы иҟаҵаз анҵамҭақәа, даҽа аулк аҿы ирзыӡырҩуан - абраҟа ахәыҷқәа ирыдгалан ираҳаз аҵакы еиҭарҳәарц рхатәы, мамзаргьы урыс бызшәала. Атекстқәа рыҧхьара инаваргыланы ирыдгалан абаза ашәак рҳәарц. Усгьы ҟалалон: абаза ҷкәынак амҩаду аҟны дырҧылар иҳәон, ихатәы бызшәала џьара лакәк рзеиҭеиҳәарц. Аҭаацәарақәа рҿы, убас иалацәажәон абаза бызшәа, еиҭарҳәон аҭоурыхқәа, ирылацәажәон иҟаз ауадаҩрақәа, аамҭакала аҭҵаарақәа мҩаҧыргон. Зынӡа ихарҭәаауп  35 анкета. Арҵаҩцәеи ааӡаҩцәеи, егьырҭ абаза бызшәа аспециалистцәеи рәцәажәараан иазааҭгылан абаза бызшәа аҭагылазаашьа  азҵаарқәа, уи аиқәырхареи арҿиареи рыпроблемақәа.

Аусеицурахь иааҧхьан ааӡаҩцәа, арҵаҩцәа, аҭаацәа, анапхгаҩцәа. Аусура мҩаҧыргон атапанҭа диалект ныҟәызго рҟнеиҧш, ашьхаруа бызшәа  зҳәо  рҿгьы.

Ирымаз аамҭа иалагӡан арҭ аҵарауаа қәыҧшцәа аус руит абаза аулқәка жәаҩа рҿы, иахьымӡеит Коидан ақыҭа мацара. Еидыркылаз аматериал мҽхакыла идууп, уи аус адулара аамҭа маҷымкәа иаҭаххоит. Ҳаиҿцәажәараан Родиони Сергеии иааркьаҿны аихшьаала ҟарҵеит, иаҳдырбеит аҭҵаара алҵшәақәа, иҳацеиҩыршеит ргәаҭарақәа, рцәаныррақәа.

 - Раҧхьатәи амшқәа рзы ҳара иаразнак иаҳнырит, абазақәа шаҟа иаарту, - иҳәеит Сергеи дҧышәарччо. Ҽнак ала хәба-фба еиҧылара анҳамаз ыҟан.   Иарбан ҩнаҭазаалак ҳахьнеиуаз, раҧхьа аишәа рхианы ҳахадыртәон: лассы-лассы иҟалон ҩынтә шьыжьхьа анаҳфоз, хынтә шьыбжьхьа ҳфон, ҩынтә - уаххьа. Ҳара ҳгәаҵанӡа инеит асеиҧш асасдкылара, даара иаҳгәаҧхеит амилаҭтә чысқәа.

Родион иазгәеиҭеит, русура аамҭа иалагӡаны дара ишырҧылоз збызшәа згәы азыбылуа, уи аҧеиҧш агәҭынчымра зызцәырнаго ирацәаҩны.

 - "Абазашҭа" агазеҭ аредактор хада Ф. К. Кулова даара ибзиан ҳлыдылкылеит, ҳусураҟны ацхыраара ҳадылгалеит, ҳаргьы ҳахәҭаахьала агазеҭ аиӷьтәразы идеиақәак лыҵаҳҳәеит,- иҳәоит иара. - Ҟубинатәи ашкол арҵаҩы Ф. К. Дохтова даара бзиа илбоит лусура, абар шьҭа 56 шықәса ҵуеит ахәыҷқәа аҵара длырҵоижьҭеи, ҳара уи ҳлыҿцәажәеит. Ажурналист Р. Х. Пазова еиҭалҳәеит аҭоурых рацәаны,  Ф. Ионова лакәзар абаза бызшәа аӡыргара даҿуп, онлаин-азыҟаҵарақәа мҩаҧылгоит, М. Ӡугова лдыррақәа халырҭәаауеит, гәахәарыла лыҷкәыни лареи рхатәы бызшәа  рҽазыҟарҵоит. Аинтерес аҵан убасгьы алагарҭатә классқәа рырҵаҩы  А. В. Хачукова лыҿцәажәара. Абазақәа рҭоурых атәы ҳзеиҭеиҳәеит, иара иаҧиҵаз амузеи аҿы М. Туков. Аҿырҧштәы бзиақәа рацәан, ҳаргьы асеиҧш аиҧыларақәа даара ҳреигәырӷьон.

Абар згәаҭарақәак аҭҵааҩцәа-аволонтиорцәа иҳацеиҩыршаз.

Ахәыҷқәа еиҳа имарианы ирыдыркылоит рықәлацәа зыҧхьо атекстқәа, аиҳабацәа рыбжьы адкылара рцәыхьанҭоуп.

Ахәыҷқәа аиҳарак ибзиан иаҧхьоит, аха рхатәы бызшәала еиҭарҳәарц уанрыҳәалак, ирцәыцәгьахоит. Дара еиҳа ирзымариоуп урысшәала аиҭаҳәара. Ахәыҷқәа, ибзиан иаҧхьаны, анаҩс рбызшәала ибзианы еиҭазҳәо зынӡа имаҷны иаҳҧылеит. Ари аганахьала аҽалнакааит Аул Красныи Восток.

Ақыҭақәеи ашколқәеи рнапхгаҩцәақәак агәҭынчымра рызцәырнагоит ахәыҷқәа ашкол аҿы, ахәыҷ баҳчақәа рҿы еиҳарак урыс бызшәала иахьцәажәо, уи анырра бааҧс ҟанаҵоит ахатәы бызшәа адырраҟны. Аҭаацәа жәпаҩык агәынамӡара аадырҧшуан рхәыҷқәа урыс бызшәала  еиҳа ацәажәара иахьалаго ахәыҷ баҳчақәа рахь аныҟәара ианалагалак.

Аҭҵааҩцәа иџьаршьеит, ахәыҷқәа рхатәы бызшәала ашәақәа ахьырзымдыруа: ирыҳәеит ашәа рзырҳәарц, аха акгьы рмаҳаит. Иззыҧшымыз акы акәхеит ахәыҷқәа абаза лакәқәа ахьырзымдыруа.

Аҵара апроблема акәзар, ахәыҷ баҳчақәа рааӡаҩцәа, арҵаҩцәа ргәы иаланы ирҳәон алабҿабатә цхыраагӡақәа шырзымхо атәы. Абаза бызшәала иахәҭоу ашәҟәқәа мамзаргьы ахәмаррақәа шыҟам атәы рҳәоит, ахәыҷқәа аҩны иазыҟазҵаларц зҭаху арҵаҩцәа.

Имаҷны имҩаҧыргоит адырра иаззырҳауа акружокқәа, раҧхьа иргыланы адекоративтә хырхарҭала - ахәыҷы ихатәы бызшәала ицәажәара беиахоит амилаҭтә культуреи аҟазареи ирыдҳәалоу уск инапы аналаку.

Апроблемақәа ыҟоуп абаҩхатәра злоу ахәыҷқәа аус рыдулараҿгьы. Красныи Восток арҵаҩцәа  руаӡәык ибзиан ашәа лҳәоит, уи ахәыҷқәагьы ирылалааӡоит. Ахәыҷқәа дырҭахуп апродиусер: раҧхьа аконцерттә гәыҧ аҧҵаны аулқәа зегьы рҟны ақәгыларақәа мҩаҧгазар.  Анаҩс аҵараҟны ацхыраара рыҭазар, аконкурсқәа рҟны рхы аадырҧшлар. Уи иалнаршон ашәатә культура арҿиара, абаҩхатәра арҿиареи аарҧшреи иацхраауан.

Родиони Сергеии зҿлымҳара арҭеит ашколтә библиотекақәа рҿы абаза бызшәала ашәҟәқәа ахьмаҷу. Урҭ руак аҟны абаза шәҟәқәа ихараны, џьара кәакьк аҿы икҿагылан, урҭ рӡыргаразы иубаратәы иахьыҟоу аҭыҧ аҿы ишықәыргылатәугьы.

 - Еиҳа ииашахон, - азгәеиҭеит Родион, - урыс бызшәала ақәҩырақәа ахьыҟоу зехьынџьара, абаза бызшәалагьы ақәҩырақәа авагылазарц: амҩадуқәа рыхьӡқәа, аусбарҭақәа рхыбрақәа рҿы адҩыларақәа, ашәҟәқәа ахьықәгылоу иадҩылоу акәзаргьы. Ари иарҭбаауан абаза бызшәа аҳәаақәа.

Аҧхьаҟатәи русқәеи планқәас ирымои рзы азҵаара аҭак ҟаҵо С. Биктимиркин иҳәеит:

 - Ҳара иаҳҭахын иааиуа аҧхынразгьы ҳаарц, аусура иацаҳҵарц. Ҳара иҳамоуп ажәалагала иаҧҵазарц иааиҧмырҟьаӡакәа аус зуа асаит абаза бызшәа аиқәырхареи арҿиареи рызҵаатәқәа рзы.

 - Уи еиҳарак изхьыҧшу апроект аҳәаақәҵаҩцәа роуп. Ҳара ҳазхиоуп  аусура ацҵара, абаза бызшәа аиқәырхара аус ҳахәҭаа алаҳҵарц азы, - иколлега  ихшыҩҵак дадгылеит Родион Светличныи. - Ҳара ҳгәаанагарала, аулқәа рҿы анхацәа абаза бызшәа бзианы ирдыруеит. Уи атәы дыршаҳаҭуеит анкетатә рбагақәа. Абри аҩыза атенденциа убартә иҟоуп: аул ақалақь шаҟа иацәыхароу аҟара, убриа аҟара ахәыҷқәагьы адуцәагьы рхатәы бызшәала ицәажәоит. Абаза бызшәа ҳара иаҳгәаҧхеит, ашьҭыбжьқәа даара аинтерес рыҵоуп, ҳара иаҳҵеит хазы игоу ажәақәа, есымшатәи аицәажәараҿы рхы иадырхәо ажәаҳәақәа. Ианаҳҵаз аматериал ҳхы иархәаны, ҳара ҳгәы иҭоуп иазҳархиарц аудиожәабжьқәа рцикл, аҭаацәа, арҵаҩцәа, ааӡаҩцәа рыцхрааразы. Ҳара ҳаршанхоит шәыҧсабара аҧшӡара. Ҳара иаҳдырбеит Красныи Восток аҿацәқәа, ашьхымӡаҿы ацха ҳҿарҵеит. Иааиуа ашықәс азы, ҳгәыӷуеит, еиҳа аамҭа ҳауп ҳәа, иагьҳалшап ҳәа Домбаии Архызи ашьхақәа рҭаара.